လိုၚ်ဗၠဲ၊ မာတ် ၂၇
ဗ္ဒိုပ်ဒပ်ကံၚ်ဇြဳပၞာန် ဗ္ဒိုပ်(ခလယ်ဒေး) ဖျေံလဝ်ဒပ် ပွိုၚ် ၄၀ သၞာံ ပ္ဍဲပွိုၚ်ဍုၚ်လိုၚ်ဗၠဲ တွဵုရးကရေၚ်ဂှ် ဗ္တိုက်သီဂွံလဝ်ရောၚ် ဗော်သွးကောန်ဂကူကရေၚ် KNU ဗဟဵု လလောၚ်ပ္တိတ်လဝ်ပရိုၚ် ပ္ဍဲဂိတုမာတ် ၂၆ တေံရ။
ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ စဗ္တိုက်လဝ် ဗ္ဒိုပ်(ခလယ်ဒေး) ပ္ဍဲဂိတုမာတ် ၂၂ တေံတုဲ ပ္ဍဲဂိတုမာတ် ၂၅ ဂှ် ဗ္တိုက်သီဂွံလဝ် အလုံဗ္ဒိုပ်မွဲရ။
အပ္ဍဲပေါဲဗ္တိုက်သီဗ္ဒိုပ်ဂှ် ကောန်ဒပ်ကံၚ်ဇြဳပၞာန်ဂမၠိုၚ်ဝွံ စံၚ်ပလီုလဝ် မကမ်လွဟ်လက်နက်ညးတံတုဲ ဂြိပ်တိတ်အာလဝ် နူဗ္ဒိုပ်ဂှ်ရောၚ် KNU သ္ဂးရ။
ကြဴနူသီဗ္ဒိုပ်တုဲ အခိၚ်ၚးတးဒၟံၚ်တိဍာ်ဂှ် ဂွံဆဵုကေတ်လဝ်ဇွ ကောန်ဒပ်ကံၚ်ဇြဳပၞာန်ၜါတၠတုဲ အပ္ဍဲပေါဲဗ္တိုက်ဂှ် သီဂွံလဝ်မကမ်လွဟ်က်နက် ဗွဲမဂၠိုၚ်ရ။
ဗ္ဒိုပ်(ခလယ်ဒေး) ဝွံ ပ္ဍဲသၞာံ ၁၉၈၉ ဂိတုသေပ်တေမ်ဗာ ၂၂ ဂှ် ဒှ်ဗ္ဒိုပ်ဒက်သိုၚ်ခၞံလဝ် နကဵုတၚ်ရန်တၟံ သ္ဂောံထိၚ်ဒက်ဒေသပယျဵု သေံ−ဗၟာဂှ်တုဲ စနူအခိၚ်ဒက်ပ္တန်ဗ္ဒိုပ်တုဲ နကဵုညးဍုၚ်ကွာန်ဒေသဂမၠိုၚ် ဒးဒုၚ်သၞောတ်ဗ္ၜတ်ကၠုၚ် အခေါၚ်အာကၠုၚ်ချဳဒရာၚ် မံၚ်စံၚ်စသုၚ် ဗွဲမဗၠးၜးတံဂှ် KNU သ္ဂးရ။
အပ္ဍဲပေါဲဗ္တိုက်သီဗ္ဒိုပ်(ခလယ်ဒေး) ဂှ် လ္ပာ်ကံၚ်ဇြဳပၞာန် ညံၚ်ဗ္ဒိုပ်ဏံ ဟွံဂွံစှ်ေအာဂှ် တဝ်စၞေဟ်ဗ္တိုက်လဝ် နကဵုပၞာန်ကျာ ဗွဲမသ္ကာတ်မြဟ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး KNU ဂှ်ရ။
ပရိုၚ်−သြၚ်လောန်တိုၚ်(မ်)
ဗီု−KNU