ထဝါဲ၊ မာတ် ၂၇
ကြဴနူဒပ်ကံၚ်ဇြဳပၞာန် လုပ်စိုပ်ဍိုက်ဗ္တိုက် ဗ္ဒမ်ညးဍုၚ်ကွာန်တံဒၟံၚ် နွံဗ္ဒါဲခဠာတ်ကွဳစက်ဓရိပ်တရဴဇမ္ၚောဲ အရာပ်(အိမ်ရှေ့ပြင်) ဍုၚ်ထဝါဲ ရးတၞၚ်သဳဂှ်တုဲ ရပ်ဏာလဝ် ညးဍုၚ်ကွာန်ဒေသ ၂၀ တၠပြၚ်ရောၚ် ဂြောဝ်ဂတာညးဒးဒုၚ်ရပ်လဝ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂကောံဒပ်ပံၚ်ကောံကံၚ်ဇြဳပၞာန် ဇြဟတ်မၞုံ ၜိုတ် ၄၀ ပြၚ်ဂှ်ဝွံ ပ္ဍဲဂိတုမာတ် ၂၅ လဒေါဝ်တ္ၚဲ ၜိုတ် ၁ နာဍဳဂှ် လုပ်စိုပ်ဍိုက်ဗ္တိုက်လဝ် ဒၞါဲဗ္ဒမ်ညးဍုၚ်ကွာန်တံမံၚ် နွံဗ္ဒါဲခဠာတ်ကွဳစက်ဓရိပ်တရဴဇမ္ၚောဲဂှ်ရ။
အပ္ဍဲပရေၚ်ဍိုက်ဗ္တိုက်ဏံဂှ် ဒဝ်အေသဳတာ အာယုက် ၅၀ သၞာံမွဲတၠ မပါလုပ် ညးဗြဴ၊ ညးတြုံ နူအာယုက် အကြာ ၂၀ စိုပ် ၆၀ ဂှ် ၂၀ တၠပြၚ် ဒးဒုၚ်ရပ်လဝ်ရ။
ညးဒးဒုၚ်ရပ်လဝ်ဂမၠိုၚ်ဝွံ ဟိုတ်နူဟွံတေၚ်စရၚ်ကၟုဲကီု၊ တေၚ်လဝ်စရၚ်ကၟုဲတုဲကီုလေဝ် မံၚ်တ္ၚဲလောန်ၜက်အာကီု၊ လ္ၚဵုတံဂှ်တှ်ေ ဒးဒုၚ်ရပ်လဝ် နကဵုတၚ်စောဲစပ် ထံက်ပၚ်ဇရေၚ်ဒပ်စဵုဒၞါညးဍုၚ်ကွာန် PDF တံရ။
ညးဒးဒုၚ်ရပ်လဝ်ဂမၠိုၚ်ဝွံ ညးပါဲဘဲပၞာန်တံကဵု ကောန်ကလောန်ဆုဲပြံၚ် ဗွဲမဂၠိုၚ် ပါလုပ်တုဲ ညးတံဂှ်တှ်ေ ရပ်ကော်ဏာလဝ် ပ္ဍဲဗ္ဒိုပ်ဗၠာဲသၟိၚ်ၝောံဍုၚ်ထဝါဲကဵု ပ္ဍဲဒပ်ပၞာန်တုဲ ထိၚ်ဒဝ်လဝ်တုဲ စဵုကဵုဂိတုမာတ် ၂၆ အခိၚ်နူဂယးဂှ် ဟွံကလေၚ်ဗၠးကၠုၚ်ဏီပုဟ်ဂှ် ဂွံတီကေတ်ရ။
လ္တူဍုၚ်ထဝါဲဂှ် အပ္ဍဲဂိတုမာတ် သတ္တာဟလက္ကရဴအိုတ်ဂှ် ညးဒးဒုၚ်ရပ်လဝ် နကဵုဟိုတ်စရၚ်ကၟုဲဂှ်ကဵု ဟိုတ်ဒးလုပ်ယိုက်ဝန်ပၞာန်တံဂှ် ပွဳပွူ ၄၀ တၠနွံရောၚ် ဂွံတီကေတ် ဇရေၚ်ညးဒေသတံရ။
အတိုၚ်လိက်ဒုၚ်စဳရေၚ် ဂကောံသုတေသနအပ္ဍဲဒေသ FE5 Thanintharyi ဂှ်မ္ဂး ပ္ဍဲရးတၞၚ်သဳဂှ် အပ္ဍဲဂိတုဖေဖဝ်ဝါရဳပွိုၚ်မွဲဂိတု တုဲကၠုၚ်တေံ ဒၟါနူကံၚ်ဇြဳပၞာန် ထ္ၜးဟိုတ်နာနာ ရပ်ဒက်ကၠုၚ်တုဲ ညးဍုၚ်ကွာန်ဒေသ ၃၂၆ တၠဟွံအောန် ဒးဒုၚ်ရပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ