မတ်မလီု၊ မာတ် ၂၇
ပ္ဍဲတွဵုရးဍုၚ်မန် ကၠောန်ဗဒှ်အာ သ္ဘၚ်အတးကၠောံသၞာံတၟိဏံ မိပ်ပ်ဏောၚ်ဂှ် သ္ကိုပ်ဝန်ဇၞော်တွဵုရးဍုၚ်မန် ဥူအံၚ်ကျဳတုၚ် ကံၚ်ဇြဳပၞာန်ခါန်ကၞက်ပ္တိုန်လဝ်ဂှ် ဟီုရ။
ဟီုကၠုၚ်လဝ် ပ္ဍဲကောံဓရီုပညဳပညပ်ကမၠောန် ညံၚ်ဂွံကၠောန်ဗဒှ်သ္ဘၚ်အတး ၂၀၂၅ ဗွဲမအံၚ်ဇၞးမာန် မကၠောန်ဗဒှ်လဝ် ပ္ဍဲရုၚ်အလဵုအသဳတွဵုရး လ္တူဍုၚ်မတ်မလီု ပ္ဍဲဂိတုမာတ် ၂၅ တေံရ။
ညံၚ်ကာလသ္ဘၚ်အတး ဂွံမိပ်စဳဒၟံၚ်ဂှ် လ္တူဍုၚ်မတ်မလီုဂှ် ကၠောန်ဗဒှ်စုတ်အာ သၚ်္ကြာန်တွာ်ဏောၚ်တုဲ ဂွံကၠောန်ဗဒှ်သ္ဘၚ်အတး ဗွဲမအံၚ်ဇၞးမာန်ဂှ်လေဝ် ဒက်ပ္တန်ကဵုလဝ်တာလျိုၚ် နကဵုကမ္မတဳကမၠောန် ၁၅ သာ်ဏောၚ်ဂှ် သ္ဂးရ။
ညးသၟတ်ဒေသမွဲတၠဂှ်တှ်ေ ကံၚ်ဇြဳပၞာန် ၜိုန်ဟီုလဝ် ကၠောန်အာသ္ဘၚ်အတး ညံၚ်ဂွံမိပ်ဏောၚ်ကီုလေဝ် ၜိုတ်လ္တူဍုၚ်မတ်မလီုသၟးရ ကၠောန်မာန်ဏောၚ်တုဲ လ္တူဍုၚ်တၞဟ်ဟ်ဂှ်တှ်ေ ညံၚ်ဂွံစဳဂှ် ကၠောန်ဟွံဂွံပုဟ်ဂှ် ဟီုရ။
“ယဝ်ဍုၚ်ဇၞော် ညံၚ်မတ်မလီုတှ်ေ ဒှ်မာန်ကီုလေဝ် ဍုၚ်ဍောတ်တ်ဗီုပိုယ်တံဂှ်တှ်ေ ဂွံကၠောန်ညံၚ်ဂွံစဳဟီုဂှ် ဒှ်ဟွံမာန်ပုဟ်။ ပ္ဍဲဍုၚ်ပိုယ်တံဂှ်တှ်ေ နူ ၆ နာဍဳဂယး စဵုစိုပ် ၆ နာဍဳသဝ်တ္ၚဲဂှ် ထိၚ်ဒက်လဝ်တုဲ ၜိုတ်ထေက်ကဵုဒှ်ဂှ် ဍေံဟွံဒှ်ပုဟ်။ ၜိုတ်ဓမ္မတာရဏောၚ်ဂှ် ထေၚ်ကေတ်ရ။ ကၠောန်ညံၚ်ဂွံစဳလေဝ် စဳဟွံသေၚ်ပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် အခိၚ်ကာလလၟုဟ်ဝွံ ဒှ်အခိၚ်ကာလ ပရေၚ်ပၞာန်ၜါလ္ပာ်ကြံၚ်မ္ၚိုဟ်ဒၟံၚ်တုဲ အခိၚ်ဒၞါဲဟွံရုဲ ပရေၚ်ဗ္တိုဟ်ထ္ကးတံ က္တဵုဒှ်မာန်ဂှ်ရ အကြာညးသၟတ်တံဂှ် စိုတ်ဂွိၚ်ဂွါဲဒၟံၚ်တံ နွံဒၟံၚ်တုဲ ဗီုကၠာတေံ ဂွံစဳဂှ်လေဝ် ကၠောန်မာန်ဟွံသေၚ်ပုဟ်ဂှ် ညးဆက်ဟီုရ။
သၟတ်ဒေသမွဲတၠပၠန်ဂှ်လေဝ် ကြဴနူသီအဝဵုတုဲ သ္ဘၚ်အတးဂှ် ဗီုကၠာတေံ ဍေံဟွံမိပ်ကီုလေဝ် အကြာအရာပ်တံဂှ်တှ်ေ ဝေၚ်ဒၟံၚ်ဍာ်ညိညနွံတုဲ ရံၚ်ကဵုအကာဲအရာပရေၚ်ဍုၚ်ကွာန်လၟုဟ်တုဲ ဂွံဝေၚ်ဍာ်ဂှ် ဒှ်ဒၟံၚ်ဓဝိၚ်တံ နွံဒၟံၚ်ရောၚ် ဟီုရ။
“ပ္ဍဲဍုၚ်ပိုယ်ဂှ်တှ်ေ ဍေံဟွံမိပ်ဗီုတွဵုကီုလေဝ် အရာပ်ညးကဵုညး ဝေၚ်ဒၟံၚ်ဍာ်တံဂှ် နွံညိညရ။ ဍေံမိပ်ကွေံကွေံဂှ်ဟွံသေၚ်ပုဟ်။ ဂွံဝေၚ်အတးဂှ်တှ်ေ ဒးဂွိၚ်ဒၟံၚ်တံ နွံရ။ ရံၚ်ကဵုခေတ်ကာလမ္ဂးလေဝ် အကာဲအရာပရေၚ်ဍုၚ်ကွာန်ဂှ် ဟွံခိုဟ်ကွေံတုဲ ဒးဂွိၚ်ဒၟံၚ်ညိ” သာ်ဝွံ သ္ဂးရ။
ကံၚ်ဇြဳပၞာန်ဂှ်တှ်ေ ကၠောန်အာညံၚ်ကာလအတးဏံ ဂွံမိပ်ဏောၚ် ဟီုဒၟံၚ်ကီုလေဝ် သၟတ်အပ္ဍဲဒေသ ဗွဲမဂၠိုၚ်ဝွံ ဟိုတ်နူသၞောဝ်ယိုက်လျိုၚ်ပၞာန်ကံၚ်ဇြဳပၞာန်တုဲ တိတ်အာဍုၚ်သ္အာၚ်ဂၠိုၚ်ကၠုၚ်တုဲ ဂွံစဳဂွံမိပ်ကၠုၚ်ဗီုကၠာတေံ ဒှ်ဟွံမာန်ပုဟ်ဂှ် ညးဆက်ဟီုရ။
ဆ္ဂး သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက်ပ္တိုန်လဝ်ဂှ်တှ်ေ သ္ဘၚ်အတးသၚ်္ကြာန်ဂှ်ဝွံ ဟိုတ်နူလုပ်စိုပ်လဝ်စရၚ်အာဲကၟာဲယေန်သၞာၚ် သ္ပစၞးဂကူမၞိဟ်တံဂှ်တုဲ ညးဍုၚ်ကွာန်ဂမၠိုၚ် ဂွံဝေၚ်ဍာ် ဗွဲမမိပ်မြဟ်မာန်ဂှ် ကၠောန်ဗဒှ်အာ အပ္ဍဲတွဵုရးဍုၚ်မန် မိပ်ပ်ဏောၚ်ဂှ် ဟီုကြီုလဝ်ရ။
ဂကောံပၠန်ဂတးတံဂှ်တှ်ေ ပ္ဍဲကဵုကၞာထးကံၚ်ဇြဳပၞာန်တံ မကၠောန်ဗဒှ်အာဂှ် အခိၚ်ညးဍုၚ်ကွာန်တံဝေၚ်ဍာ် ကံၚ်ဇြဳပၞာန် ကၠောန်ကၠုၚ်ပရေၚ်ဖံက်ထ္ကးတံတုဲ ပ္တိုန်ကၠုၚ်ဒုဟ် လ္တူဂကောံပၠန်ဂတးတံမာန်တုဲ အခိၚ်ကာလသီအဝဵုဏံ ဗီုပြၚ်ညးဍုၚ်ကွာန်တံမိပ်မြဟ်ဒၟံၚ်ဂှ် တြးကၠုၚ်ဝါဒ ကုဍုၚ်သ္အာၚ်မာန်တုဲ နကဵုညးဍုၚ်ကွာန်ဂမၠိုၚ် သွက်ဂွံစွံသတိအိုတ်ဂှ် ဖ္တိုက်ဖ္အောဝ်လဝ်ရ။
ပ္ဍဲတွဵုရးဍုၚ်မန်ဂှ်တှ်ေ သ္ဘၚ်အတးသၚ်္ကြာန်ဂှ် ဟိုတ်နူအကာဲအရာယဲကပ်ကိုဝ်ဝေဒ် သၞာံ ၂၀၂၀ ဂှ်တုဲ ဟွံဂွံကၠောန်လဝ်ကီုလေဝ် ကြဴနူဒပ်ပၞာန်သီအဝဵုတုဲဂှ် ကလေၚ်ကၠောန်ဗဒှ်လဝ်လၟေၚ်သၞာံကီုလေဝ် ညးဍုၚ်ကွာန်တံဂှ်တှ်ေ ဟိုတ်နူအကာဲအရာပရေၚ်ဍုၚ်ကွာန်တံတုဲ စိုတ်လုပ်စအောန်ကၠုၚ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ