ကျာ်ထဝ်၊ မာတ် ၂၈
တွဵုရးဍုၚ်မန် ပ္ဍဲပွိုၚ်ဍုၚ်ကျာ်ထဝ်ဂှ် ဒပ်ကံၚ်ဇြဳပၞာန် ဟိုတ်နူပန်ပှော်ဒၟံၚ်လွဟ်ဇၞော် ကြပ်အရိုဟ်ဒဒှ်တ္ၚဲတုဲ ညးဒေသဂမၠိုၚ် ဟွံဂံၚ်အာကမၠောန်အိုတ်တုဲ ဒှ်ဒၟံၚ်ဒဒိုက်ကဵု ပရေၚ်စသုၚ်မံၚ်စံၚ်တံဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန်ဝွံ ပ္ဍဲဂိတုမာတ် အပ္ဍဲသတ္တာဟလက္ကရဴအိုတ်ဏံဂှ် ပန်ပှော်ကၠုၚ်လွဟ်ဇၞော် ဟွံအောန်နူ ၂၀ မ လ္ပာ်ပွိုၚ်ဍုၚ်ကျာ်ထဝ် အပ္ဍဲကဵုကွာန်(မိုးဘောနတ်စင်၊ မဲရုံးကြီး၊ မဲရုံးလေး၊ ဆောင်နိုင်ကြီး၊ ပျဥ◌်းကတိုးကုန်း၊ ပိန္နဲကုန်း၊ မုက္ခမော၊ သုံးခွ၊ ဝင်းကံ၊ ခရွဲ) တံရ။
အတိုင်ဂလာန် ညးဒေသတံ လဴထ္ၜးဂှ်မ္ဂး ပရေၚ်ပန်ပှော် နူကံၚ်ဇြဳပၞာန်ဂှ်ဝွံ စွံပွန်ကဵုကၠအ်ဂူယာတံကဵု လ္ပာ်ဒဵုဂြိုပ်တံ ဂၠိုၚ်ကၠုၚ်တုဲ ကမၠောန်ဂမၠိုၚ် ဒးဒေါအ်ဇူလဝ်ရောၚ် သ္ဂးရ။
ဟိုတ်နူပရေၚ်ပန်ပှော်လွဟ်ဇၞော် နူဒပ်ကံၚ်ဇြဳပၞာန်ဂှ်တုဲ ဇီုကပိုက်ကၠုၚ်ကဵု ပရေၚ်စသုၚ်မံၚ်စံၚ်ညးဒေသတံ ဂၠိုၚ်တိုန်ကၠုၚ်တုဲ သ္ၚိကၟိန်အိန်ထံၚ်ဗွဲမဂၠိုၚ်ဝွံ ဒးပရအ်စဒၟံၚ် စၞစသုၚ် မပကောံပကေဝ်လဝ်တံဂှ်ရ။
ညးဒေသ ဒးဂဗဒၟံၚ်ကဵုအခက်အခုဲပရေၚ်စသုၚ်မံၚ်စံၚ်တံဂှ် ဗော်သွးကောန်ဂကူကရေၚ် KNU လ္ပာ်ခရိုၚ်သဓီုကီု လ္ပာ်ဒပ်ပၠန်ဂတးတံကီုဂှ် ရီုဗၚ်ထံက်ပၚ်ကဵုလဝ်တံ နွံကီုလေဝ် ဟွံရုမ်ဂပ်ပုဟ်ဂှ် သ္ဂးအိုတ်ရ။
ကွာန်ဒပ်ကံၚ်ဇြဳပၞာန် ပန်ပှော်ဒၟံၚ်လၟုဟ်ဂှ်ဝွံ ဒှ်ကွာန်နူကဵုတိဍာ်ခရိုၚ်သဓီု ဗော်သွးကောန်ဂကူကရေၚ် KNU ရ။
တုဲကၠုၚ် ပ္ဍဲဂိတုမာတ် ၂၁ တေံဂှ်လေဝ် ဟိုတ်နူဒပ်ကံၚ်ဇြဳပၞာန် ပန်ပှော်နၚ်လွဟ်ဇၞော် ပ္ဍဲကွာန်ခယဲသၟဝ်ကျာ ပွိုၚ်ဍုၚ်ကျာ်ထဝ်ဂှ်တုဲ သၚ်မွဲဇကု ဒးပဝ်အာတုဲ ၜါဇကု ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−KHRG