ဍာ်ဗု၊ မာတ် ၂၈
ရးတၞၚ်သဳ ပ္ဍဲပွိုၚ်ဍုၚ်ဍာ်ဗု ဗ္ဒါအပိုၚ်အခြာဒေသပရေၚ်ပိုန်ဒြပ်တၟေၚ်−ထဝါဲဂှ် ဟိုတ်နူပေါဲဗ္တိုက်ဒှ်ဒၟံၚ် အကြာဒပ်ကံၚ်ဇြဳပၞာန်ကဵု ဒပ်ပၠန်ဂတးတံဂှ်တုဲ ညးဒေသဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် ဇရေၚ်တမ်ရိုဟ်ပရိုၚ်ဗလးတိတံရ။
အကြာဒပ်ပံၚ်ကောံ ဂကောံဇြဟတ်ပၠန်ဂတးတံကဵု ဒပ်ကံၚ်ဇြဳပၞာန် ဇြဟတ် ၁၀၀ ပြၚ် ထ္ပက်ကရောၚ်ပၞာန်လုပ်စိုပ်ကၠုၚ် လ္ပာ်သၞေဟ်ဍာ်ဒမျိုဟ်ထဝါဲဂှ် စနူဂိတုမာတ် ၂၄ တေံတုဲ ပေါဲဗ္တိုက်ၜါလ္ပာ် က္တဵုဒှ်ဒၟံၚ်ရ။
ဟိုတ်နူပေါဲဗ္တိုက်ၜါလ္ပာ်တုဲ ညးဒေသ ၃၀၀၀ ပြၚ် နူကဵုကွာန် ၁၀ ကွာန် ပါလုပ်သီုကဵု ကွာန် (လဲရှောင်၊ ထိန်ကြီး၊ ပရဒပ်၊ ခမောင်းချောင်း၊ ဧကနိ) တံဝွံ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
အပ္ဍဲပေါဲဗ္တိုက်ၜါလ္ပာ်ဂှ် လ္ပာ်ကံၚ်ဇြဳပၞာန် ဟွံအောန်နူမသုန်တၠ ဇီုကပိုက်ချိုတ်အာလဝ် နွံတုဲ လ္ပာ်ဒပ်ပံၚ်ကောံစဵုဒၞါညးဍုၚ်ကွာန်တံဂှ် သ္ဂံၚ် PDF ပန်တၠ ဇီုကပိုက်ကလိဂွံလဝ်ဝပ်ရောၚ် ကောန်ဒပ်စဵုဒၞါဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် ထ္ပက်ကရောၚ်ပၞာန်လုပ်စိုပ်ကၠုၚ်ဂှ်ဝွံ စနူဂိတုမာတ် စၟတ်တ္ၚဲ ၁၃ ဂှ်တုဲ ဒှ်ဂကောံဒပ်ကံၚ်ဇြဳပၞာန် မထ္ပက်ကရောၚ်ပၞာန်လုပ်စိုပ်ကၠုၚ် အပ္ဍဲကွာန် မၞုံလ္ပာ်ဒေသနဗုလာ နကဵုဇြဟတ် ၂၀၀ ပြၚ်ဂှ် သ္ဂးရ။
ကြဴနူဍုၚ်ရုယှာ ဂွံတၚ်တုပ်စိုတ် သွက်ဂွံဓလိုက်တမ်ရိုဟ် ပ္ဍဲအပိုၚ်အခြာဒေသပရေၚ်ပိုန်ဒြပ်ထဝါဲတုဲဂှ် စနူဂိတုမာတ် ၁၃ တုဲ ဒပ်ကံၚ်ဇြဳပၞာန် ဆက်ဗပေၚ်ဒၟံၚ်ဇြဟတ် ပ္ဍဲအပိုၚ်အခြာဒေသပရေၚ်ပိုန်ဒြပ်ထဝါဲဂှ်ရ။
အတိုၚ်လိက်ဒုၚ်စဳရေၚ် ဂကောံသုတေသန အပ္ဍဲဒေသ FE5 Thanintharyi ဂှ်မ္ဂး အပ္ဍဲဂိတုဖေဖဝ်ဝါရဳတုဲကၠုၚ်တေံ ပ္ဍဲရးတၞၚ်သဳဂှ် ဟိုတ်နူပေါဲဗ္တိုက်အကြာကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ်ကီု၊ သီုကဵုပရေၚ်ဗ္တိုက်ပၞာန်ကျာတံဂှ်တုဲ ညးဒးထောံလသာဌာန်ဒၟံၚ် ဒးဂြိပ်ဒဴဒၟံၚ်တံ နွံကၠုၚ် စဵုကဵု ၆၈၄၀၀ ပြၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ