နေဗျဳဒဝ်၊ မာတ် ၂၉
ပ္ဍဲကဵုရးဒေသကေုာံတွဵုရးတြဴ ပါလုပ်သီုကဵုနေဗျဳဒဝ်ဂှ် ဟိုတ်ဒၟါနူကသဳတိ ဇြဟတ်မၞုံ ၇ ဒဿမ ၇ ရေတ်တာသကေ ချဳဇတဝ်အာလဝ်တုဲ ကံၚ်ဇြဳပၞာန် လလောၚ်တြးလဝ် အကာဲအရာကာတၟေၚ်ရ။
တ္ၚဲဏံ ပ္ဍဲဂိတုမာတ် ၂၈ အခိၚ်လဒေါဝ်တ္ၚဲ ၜိုတ်မွဲနာဍဳ ပ္ဍဲကဵုနေဗျဳဒဝ်၊ ရးသက်ကိုၚ်၊ ရးမန္တလေဝ်၊ ရးမဂွဵု၊ တွဵုရးသေံ ဗွဲဒိုဟ်ဨသာန်၊ ရးဗဂေါတံဂှ် တိချဳအာလဝ်ရ။
ဟိုတ်နူကသဳတိ မဇၞော်ကဵုဇြဟတ်ဂှ်တုဲ ပွမဂၠိုက်ဂၠါဲစၟဳတ် ပရေၚ်လီုလာ်ဆောံလေၚ်တံကီု၊ လၟေၚ်ကမၠောန်ရီုဗၚ်ဟံၚ်ပြာ်ဘဲအန္တရာယ်တံကီုဂှ် ပံၚ်တောဲရေၚ်တၠုၚ်အာကဵု သၟိၚ်တၠအဝဵု ဒေသမဆေၚ်စပ်တံဏောၚ် ကံၚ်ဇြဳပၞာန် ဟီုရ။
ဟိုတ်ဒၟါနူတိချဳအာလဝ်ဏံတုဲ စမြိုၚ်ဘာသာ၊ သ္ၚိမၞိဟ်ဒၟံၚ်၊ စမြိုၚ်ဟိုဝ်တေဝ်၊ ဖျာတံမပါလုပ် သီုကဵုဒဒန်ဂၠံၚ် ဗွဲမဂၠိုၚ်ဂၠေၚ် ဇီုကပိုက်လီုလာ်အာလဝ်တံ နွံဒၟံၚ်တုဲ အသိၚ်မၞိဟ်ချိုတ်ဂှ်လေဝ် ဂၠိုၚ်တိုန်ဒၟံၚ်ရ။
အတိုၚ်တၠပညာ ဌာနစမ်ၜတ်အကာဲအရာဗြဲကျာတံ ချိၚ်ခယျလဝ်ဂှ်မ္ဂး ကြဴနူတိချဳတုဲ အပ္ဍဲပွိုၚ် ၆ နာဍဳ တိထပ်ချဳမာန်ဂှ်ရ ညးဍုၚ်ကွာန်တံ သွက်ဂွံမံၚ်စံၚ် ဒၞါဲဗၠးဘဲတံအိုတ်ဂှ် ကဵုလဝ်သတိရ။
ပရိုၚ်−သြၚ်လောန်တိုၚ်(မ်)
ဗီု−CJ