နေဗျဳဒဝ်၊ မာတ် ၂၈
ဒပ်ပၞာန် လေပ်ဟီုကြီုဒၟံၚ် နဒဒှ် Standard Army ဂှ်တှ်ေ ဟိုတ်နူပရေၚ်သီအဝဵုတုဲ ပၞာန်ထ္ပက်ထပိုတ်ရိုဟ်ကၞက်သၞောတ်တၠအဝဵုပၞာန် မမံက်ဂတဝ်ကၠုၚ်တံဂှ် ဒးဒုၚ်ဂါန်ဗ္တိုက်ဒၟံၚ်ကဵု ပၞာန်ကျာ ဂၠိုၚ်နူကဵုပၞာန်တိုက်ဗလးတိဏံရ။
အပ္ဍဲပရေၚ်ပၞာန် ၁၀၂၇ ဂှ် ဒးဆောံလေၚ်လဝ် ဗ္ဒိုပ်ဒပ်ဂၠိုၚ်ကဵုကၠံ ပါလုပ်သီုကဵု ဌာန်ဂအုပ်ပၞာန်ရး ၂ တုဲ ဇြဟတ်ဒပ်လေၚ်ဒိုက်နွံကၠုၚ်လဝ် ဗွဲမဂၠိုၚ်ဂှ်ရ ကံၚ်ဇြဳပၞာန် ကၠောန်ကၠုၚ်လဝ်ပရေၚ်ပြုပြေၚ်ပြံၚ်လှာဲ နကဵုနဲဗျူဟာပၞာန်ရ။
ဣဏံဝွံ ကြဴနူပရေၚ်ပၞာန် ၁၀၂၇ သွက်ကံၚ်ဇြဳပၞာန် မ္ဒးဆောံလေၚ်ဂၠိုၚ်လဝ်ဂှ်တုဲဂှ် ပပ္တံနူသၞာံ ၂၀၂၄ စတေံတုဲ ပြံၚ်လှာဲရပ်စပ်ကၠုၚ် နဲကွတ်ပညာကဆံၚ်သၠုၚ်တံကဵု ပၞာန်ကျာတံ နဒဒှ်တၚ်ဂွံဇြဟတ်ဂှ် ဗွိုၚ်ဒပ်ပၞာန်သ္ပလဝ်ဇြဳဒဳအာမ်တံ သ္ၚဳဂၠိပ်လဝ်ရ။
“ဗွဲကြဴဏံ ဍေံတံ ဒက်ပ္တန်ကၠုၚ်ဒရုၚ် နဒဒှ်ဒပ်မွဲရ။ တုဲတှ်ေ ဗဒှ်ပ္တိုန် တန်ဗ္တောန်ဒရုၚ်တံ တၟာဂလိုၚ်ရ။ တုဲမ္ဂး ဒပ်ဒရုၚ်တံဂှ် တောဲကဵုကရောၚ်ပၞာန်ခလရ မုက်ပၞာန်တေံတုဲ ဗလးဏာရ။ ဗွဲကြဴဏံဂှ် သီုထံၚ်ကၠုၚ်ပရိုၚ်။ တုဲတှ်ေ ဗ္တိုက်ထောံကၠုၚ်မခတိုဟ် နကဵုဒရုၚ် လွာဲဂှ်ရ” သာ်ဝွံ အကြာပ်ဒပ်ဇၞော်ဇြေယျ သ္ပလဝ်ဇြဳဒဳအာမ် နူဒပ်ကျာ ဟီုရ။
ပ္ဍဲကဵုပရေၚ်ပၞာန်ကျာဂှ် ကံၚ်ဇြဳပၞာန် သုၚ်စောဲဒရုၚ်ထံၚ်ပရိုၚ်တံတုဲ နူကဵုပၞာန်ကျာဂှ် ထောံကၠုၚ်မခတိုဟ် လျိုၚ်မၞုံ ၅၀၀ ပံၚ် ပ္ဍဲဒၞါဲဒပ်ပၠန်ဂတးတံချဳဒရာၚ်တံကဵု တိဍာ်ထိၚ်ဒဝ်လဝ်တံဂှ်တုဲ ကၠောန်ကၠုၚ်ဒၟံၚ်ပရေၚ်ဗ္တိုက် နကဵုဒရုၚ်ဒုၚ်ချိုတ်ရ။
အခိၚ်လၟုဟ်ဂှ်လေဝ် ပရေၚ်ပၞာန်ဒရုၚ် ကေုာံ က္ဍိုၚ်ကျာဗဂပ်စုတ်လဝ်စက် ၚုဟ်အိုတ်သက်သာနူက္ၜၚ်ကျာဗ္တိုက်တံဂှ် ရပ်စပ်ကၠုၚ်ဒၟံၚ် စဵုကဵုမုက်ပၞာန်တံဂှ်ရောၚ် ဒပ်ပၠန်ဂတးတံ သ္ဂးရ။
ကိုဝ်အေမေန်ထောန် ညးဒုၚ်တာလျိုၚ် ဒပ်ပၞာန်စဵုဒၞါညးဍုၚ်ကွာန် ခရိုၚ်သဓီု PDF ဂှ်တှ်ေ ဇြဟတ်ပၞာန်ဗလးတိဏံဂှ် ကံၚ်ဇြဳပၞာန် ဟွံရပ်စပ်သုၚ်စောဲဂၠိုၚ်တုဲ ရပ်စပ်စကာကၠုၚ်ဒၟံၚ် ပၞာန်ကျာ မဒှ်အရာညးတံဂွံဇြဟတ်ဂှ်သၟးဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“နကဵုကံၚ်ဇြဳပၞာန် ဗွဲကြဴဏံ ဍေံတံဇြဟတ်ဍိုန်စှ်ေကၠုၚ်။ တုဲတှ်ေ ဍေံတံရပ်စပ်ပၞာန်ကျာတံအဓိကတုဲ ပကၠုၚ်ဒၟံၚ်ပရေၚ်ဗ္တိုက်တံဂှ်ရ။ ဇြဟတ်ပၞာန်ဗလးတိသၟဝ်ဏံဂှ်တှ်ေ ဍေံတံရပ်စပ်ကၠုၚ်ကွေံကွေံဂှ် ဟွံမွဲပုဟ်။ အောန်စှ်ေကၠုၚ်ရ။ ရပ်စပ်ဒၟံၚ်ပၞာန်ကျာသၟး။ နကဵုကောန်ဒပ်ပိုယ်တံ ကိစ္စပၞာန်ကျာတံကီု နဲကဲဂွံစဵုဒၞါတံကီုဂှ် ဒစးဒုၚ်တုဲ ၜံက်ခါဲဒၟံၚ်ကတိုၚ်ပါဲဗုမ်တံဂှ် ဒးကၠောန်ဒၟံၚ်ရ” သာ်ဝွံ သ္ဂးရ။
ညးခါတ်အကာဲပရေၚ်ပၞာန်တံဂှ်တှ်ေ ကောန်ဒပ်ဗလးတိ ကံၚ်ဇြဳပၞာန်တံဝွံ ဟိုတ်နူဇြဟတ်အောန်ဒၟံၚ်တုဲ ကောန်ဒပ်ကော်နၚ်နူကဵုသၞောဝ်ယိုက်ဝန်ပၞာန်တံဂှ်ဝွံ မွဲမွဲတမ်ဒပ်မ္ဂး ၜိုတ်ပိဂအုံၜါဂအုံနွံဂှ်ရ ပ္ဍဲကဵုပေါဲဗ္တိုက်ဆေၚ်မုက်တံဂှ် စကာဒၟံၚ်အဓိကတုဲ ဒးဗ္တိုက်ဒၟံၚ်ပၞာန်ရောၚ် ပါ်ပါဲလဝ်ရ။
အတိုၚ်တၚ်နၚ် အလဵုအသဳညဳသၟဟ်ဂကူ NUG ဂှ်မ္ဂး ကြဴနူပၠောပ်ကၠုၚ်လမျီု ကုသၞောဝ်ယိုက်လျိုၚ်ပၞာန်တုဲဂှ် နူသၞာံ ၂၀၂၄ ဂိတုဨပရဴ စဵုကဵုသၞာံ ၂၀၂၅ ဂိတုဂျာန္နဝါရဳဂှ် သၟတ်ဒးဒုၚ်ရပ်လဝ် ဗွဲအဓမ္မ သွက်ဂွံလုပ်ပၞာန်ဂှ် ဗၞတ် ၂၄၀၀၀ နွံရ။
အကြာပ်ဒပ်ဇၞော်ဇြေယျ သ္ပလဝ်ဇြဳဒဳအာမ် နူကဵုဒပ်ကျာဂှ် ကောန်ဒပ်ကံၚ်ဇြဳပၞာန်တံဝွံ အစောံဇြဟတ်ဗ္တိုက် ပ္ဍဲဗလးတိဏံ ဟွံမွဲတုဲ ပရေၚ်ဇီုကပိုက်ချိုတ်တံဂှ် ဒှ်ဒၟံၚ်ဒဵုအခိၚ်လၟုဟ်တုဲ ဒးကေတ်ဒၟံၚ်ဇြဟတ် နူကဵုပၞာန်ကျာဏောၚ်ဂှ် ဟီုရ။
“ဟိုတ်ဂှ်ရ ပ္ဍဲကဵုဍေံတံ အစောံစရာဲသ္ဂောံဗ္တိုက်ဗလးတိဏံဂှ် ဟွံမွဲပုဟ်။ ဒှ်သာ်ဂှ်ရ ဍေံတံ ဒုၚ်ဂါန်ဗ္တိုက်ဒၟံၚ်ကဵုပၞာန်ကျာ ကေုာံ ဒရုၚ် နူကဵုမှဲအကးတံဂှ်ရ။ မုဒှ်ရောဟီုတှ်ေ ဍေံတံဂွံအခိၚ်အပဵုခ္ဍၚ် ကောန်သ္ဂံၚ်တၟိတၟိဍေံတံဂှ် သာတုဲ Train ကဵုမာန်တုဲ လ္ပာ်စိုတ်ဓာတ်တံဂှ်လေဝ် သာတုဲပ္ကတ်ပ္ကေၚ်ကဵုမာန်ရ။ အခိၚ်လၟုဟ်ဂှ်တှ်ေ ဍေံတံ ကေတ်စေဝ်လ္တူ နူကဵုပၞာန်ကျာ ကေုာံ ဒရုၚ်တံဂှ်တုဲ ဗ္တိုက်ဒၟံၚ်ပၞာန် ဒှ်ဒၟံၚ်ဗီုပြၚ်ဏံ။ ပ္ဍဲဗလးတိဏံဂှ်တှ်ေ အစောံဗ္တိုက်ဂှ် ဟွံမွဲဟဂှ်ရ။ အရိုဟ်ဂဗကဵု ဒပ်ပၠန်ဂတးတံဂှ် လ္ပာ်ဍေံတံသၟးရ ကျဗြံဂၠိုၚ်ဒၟံၚ်တုဲ ဇီုကပိုက်ဂၠိုၚ်ဒၟံၚ်ဟီုဂှ် ဒှ်ဒၟံၚ်ဒဵုအခိၚ်လၟုဟ်ရ” သာ်ဝွံ သ္ဂးရ။
ဒပ်ကံၚ်ဇြဳပၞာန် ဒးပစူအလာံဗု၊ ဒးဖျေံလွဟ် နွံကၠုၚ်ကဵုကၠံ အပ္ဍဲပေါဲဗ္တိုက်တံဂှ်ဝွံ လ္ပာ်စိုတ်ဓာတ် ဇြဟတ်ဍိုန်လျဒၟံၚ်ကီုလေဝ် လ္ပာ်နဲကွတ်ပညာဂှ်တှ်ေ ဟိုတ်နူဍုၚ်ကြုက်၊ ဍုၚ်ရုယှာတံ ထံက်ပၚ်ကဵုတုဲ ဇြဟတ်ခိုဟ်ကၠုၚ်မာန်ဂှ် ညးဆက်ဟီုရ။
အတိုၚ်ဂကောံ Janes Defense သ္ၚဳဂၠိပ်လဝ်ဂှ်မ္ဂး နဲကွတ်ပညာ ရပ်စပ်သၞောတ်လပှ်ဂမ္တဴ FLIR မသုၚ်စောဲပ္ဍဲက္ၜၚ်ကျာသၞေၚ်ဝဲ ဒှ်နဲကွတ်ပညာလျးသာ်ဍာဲ ရံၚ်ဗွဲဂတဂွံဂှ် ကံၚ်ဇြဳပၞာန် ရပ်စပ်ကၠုၚ် ပ္ဍဲဒရုၚ်ပရေၚ်ဗ္တိုက်တံဂှ် ဂွံတီကေတ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ်တှ်ေ စပ်ကဵုတၚ်ဂွံဇြဟတ် လ္ပာ်ကံၚ်ဇြဳပၞာန်တံဂှ်တုဲ ဂကောံပၠန်ဂတးတံ ဂ္စါန်ပလေဝ်ပလေတ်ဒၟံၚ် သ္ဂောံကလေၚ်တဝ်စၞေဟ်စဵုဒၞါအာဂှ် ဟီုရ။
“ကံၚ်ဇြဳပၞာန် ဂွံကၠုၚ်စေဝ်လ္တူသာ်ဏံ ဂွံကၠုၚ်ဇြဟတ် စပ်ကဵုကပေါတ်လွဟ်ပၞာန်တံဂှ်တုဲ ပိုယ်တံ ဂွံကလေၚ်ခၠေဝ်တဝ်စၞေဟ်တုဲ ဂွံလုပ်အာပေါဲဗ္တိုက်ဂှ် ဂကောံပၠန်ဂတးနာနာတံ ဂ္စါန်ပလေဝ်ပလေတ်ဒၟံၚ်အိုတ်ရ။ ဥပမာ ဂွံစဵုဒၞါနူဘဲဒရုၚ်ဂှ် ရာန်စုတ်ကၠုၚ် Jumper တံ နွံရ။ တုဲပၠန် ဂွံပန်ဖျေံက္ၜၚ်ကျာတံမာန်ဂှ် ပိုယ်တံ ပကောံကၠုၚ်လွဟ် ပန်ဇမ္ၚောဲတံဂွံဂှ် နွံရ” သာ်ဝွံ သ္ဂးရ။
သ္အာၚ်နူဂှ်ပၠန် ကုဒရုၚ်ဗ္တိုက် ကေုာံ ဒရုၚ်ထံၚ်ပရိုၚ်တံဂှ်တှ်ေ ရပ်စပ် Shooting Jumper တုဲ စၞးဒးပန်ဖျေံဂှ် ရပ်စပ် Jumper ပလီုကၠေံဇာဇၞိက်တံဂွံတုဲ မသုၚ်စောဲချာန်နေဝ် တၟာဂလိုၚ်ဂွံဂှ်တုဲ ဖအောန်ဖျေံကၠုၚ် ပရေၚ်ဗ္တိုက်တံဏံမာန်ဂှ် ညးဆက်ဟီုရ။
ဆ္ဂး ဒပ်ကံၚ်ဇြဳပၞာန်ဝွံ ဗ္တိုက်ဒၟံၚ် ဂကောံပၠန်ဂတးတံမွဲဓဝ်ဟွံသေၚ် ပ္တဝ်ကၠုၚ်မံၚ်က္ဍိုပ် သီုကဵုသ္ၚိညးဍုၚ်ကွာန်တံ၊ ဘာဗ္တောန်လိက်၊ ရုၚ်ဂဥုဲ၊ ဗ္ဒမ်ဂဥုဲ ကေုာံ စမြိုၚ်ပရေၚ်ဘာသာတံဂှ်ကီုရ။
အတိုၚ်လိက်ဒုၚ်စဳရေၚ် ဂကောံသုတေသနညာန်လေန်တေတ်ဂှ်မ္ဂး နူသၞာံ ၂၀၂၁ ဂိတုဖေဖဝ်ဝါရဳ စဵုကဵုသၞာံ ၂၀၂၄ ဂိတုဒဳဇြေမ်ဗာဂှ် အလုံဍုၚ်မွဲ လၟေၚ်ဒဒှ်ပရေၚ်ဗ္တိုက် နူကဵုကံၚ်ဇြဳပၞာန်တံ ကလိလောန်လဝ် နကဵုပၞာန်ကျာဂှ် ၄၁၅၇ ဝါနွံလဝ်တုဲ ကောန်အရာပ် ၂၂၀၀ ပြၚ် ဒးချိုတ်အာလဝ်ရ။
သ္အာၚ်နူဂှ်ပၠန် ညးဇီုကပိုက်ကလိဂွံဝပ် ၃၄၀၀ ပြၚ် နွံလဝ်တုဲ ဟိုတ်နူပရေၚ်ဗ္တိုက်ပၞာန်ကျာတုဲ စမြိုၚ်ပရေၚ်ဘာသာ ၃၀၂ မ၊ ဘာဗ္တောန်လိက် ၁၇၄ မ ကေုာံ ရုၚ်ဂဥုဲ ၆၂ မလေဝ် ဒးလီုလာ်အာလဝ်ရောၚ် လလောၚ်ပ္တိတ်လဝ် ပ္ဍဲဂိတုဖေဖဝ်ဝါရဳတုဲကၠုၚ်တေံရ။
ပရိုၚ်−သြၚ်လောန်တိုၚ်(မ်)
ဗီု−Social Media