ပဠဝ်၊ မာတ် ၂၉
ပ္ဍဲရးတၞၚ်သဳ ပွိုၚ်ဍုၚ်ပဠဝ်၊ လ္တူဂၠံၚ် မအာကွာန်မေန်သဳရိဂှ် ပန်ပသောၚ်ထောံလဝ် က္ဍိုပ်သ္ကိုပ်ပျူသဝ်ထဳ ကွာန်ယှာတ်ပုံ မဒုၚ်သြဇာကံၚ်ဇြဳပၞာန်ဂှ်ရောၚ် ညးဒုၚ်တာလျိုၚ်လလောၚ်ပရိုၚ် တမ်ဒပ် ၁ ခရိုၚ်ဗိက် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမာတ် ၂၇ အခိၚ်နူဂယး ၜိုတ် ၉ နာဍဳဂှ် ဂွံပရိုၚ်တုဲ ပန်ပသောၚ်လဝ် က္ဍိုပ်သ္ကိုပ်ပျူသဝ်ထဳ ဥူတုၚ်ဇြဝ် မကွာ်စဴကၠုၚ်ညးမွဲဓဝ် နူၝောံခန်ဍုၚ်ပဠဝ် လ္ပာ်ကွာန်ယှာတ်ပုမ်ဂှ်ရောၚ် သ္ဂးရ။
ဟိုတ်နူဒးဒုၚ်ပန်လဝ်ကဵုသေနာတ် ကြပ်ပ်ဂှ်တုဲ က္ဍိုပ်သ္ကိုပ်ပျူသဝ်ထဳ ဥူတုၚ်ဇြဝ်အေဝွံ ချိုတ်အာလဝ် နကဵုဝပ် ဂွံလဝ်ဘဲမကမ် ပ္ဍဲက္ဍိုပ်ရ။
ဥူတုၚ်ဇြဝ်အေဝွံ ဒှ်က္ဍိုပ်သ္ကိုပ်ပျူသဝ်ထဳမွဲတၠတုဲ သီုဒှ်ညး ရပ်စလွဟ်လေပ်မွဲတၠတုဲ ရပ်ဒက်သ္ဇိုၚ်ဝန် CDM တံကီု၊ အာတ်လှုဲဘပဠတံကီု ဗက်အာကရောၚ်ပၞာန်ကံၚ်ဇြဳပၞာန်တုဲ စံၚ်သ္ၚိကီု၊ ကလိလောန်ဒၟံၚ် အမှုရာဇဝတ်ပၞာန်တံ သီုစိုတ်သီုစရိုတ်ဂှ်တုဲ ပန်ပသောၚ်ထောံလဝ်ရောၚ် သ္ဂးရ။
တုဲကၠုၚ် ပ္ဍဲဂိတုဖေဖဝ်ဝါရဳ ၂၇ တေံဂှ်လေဝ် သ္ကိုပ်အုပ်ဓုပ်အရာပ် နူကဵုအရာပ်စၟတ် ၃ ဍုၚ်ပဠဝ်ဂှ် ကောန်ကဵုအပါၜါတၠ ဒးဒုၚ်ပန်ဂစိုတ်လဝ် ပ္ဍဲသ္ၚိတုဲ သီုၜါတၠ ချိုတ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Palaw PDF