နေဗျဳဒဝ်၊ မာတ် ၃၀
အတိုၚ်တၚ်နၚ် ကံၚ်ဇြဳပၞာန် ကံက်ကပှ်ဂွံလဝ်မ္ဂး ပ္ဍဲဍုၚ်ဗၟာ စဵုကဵုဂိတုမာတ် ၂၉ အခိၚ်လဒေါဝ်တ္ၚဲ ၁၂ နာဍဳဂှ် ဟိုတ်နူကသဳတိ ဇြဟတ်ဇၞော်မွဲ ချဳအာလဝ်တုဲ မၞိဟ်ဒးချိုတ်အာ နွံကၠုၚ် စဵုကဵု ၁၀၀၀ ပြၚ်ရ။
ဟိုတ်နူတိချဳတုဲ မၞိဟ်ကလိဂွံဝပ် နွံဗ္ဒါဲ ၂၄၀၀ တုဲ ညးမကၠေံဒၟံၚ် နွံ ၃၀ တုဲ စရၚ်သောဲသောဲဗြောဲဗြောဲတံဂှ်တှ်ေ ဆက်ကံက်ဒၟံၚ်ဖိုဟ်ရောၚ် ကံၚ်ဇြဳပၞာန် သ္ဂးရ။
ပ္ဍဲရးမာန္တလေဝ်မွဲဓဝ်ဂှ် မၞိဟ်ဒးချိုတ်အာ ဒၟါနူဘဲတိချဳဂှ် ၈၃၈ တၠ နွံတုဲ မၞိဟ်ကလိဂွံဝပ် ၁၆၇၀ တၠ နွံရောၚ် ဂွံတီကေတ် အတိုၚ်တၚ်လလောၚ်တြး ကံၚ်ဇြဳပၞာန်ရ။
တုဲကၠုၚ် ဂိတုမာတ် ၂၈ အခိၚ်လဒေါဝ်တ္ၚဲ ၜိုတ် ၁ နာဍဳ ပ္ဍဲကဵုနေဗျဳဒဝ်၊ ရးသက်ကိုၚ်၊ ရးမာန္တလေဝ်၊ ရးမဂွဵု၊ တွဵုရးသေံ ဒေသဗွဲဒိုဟ်ဨသာန်၊ ရးဗဂေါတံဂှ် ကသဳတိ ဇြဟတ်မၞုံ ၇ ဒဿမ ၇ ရေတ်တာသကေမွဲ ချဳဇတဝ်အာလဝ်ရ။
ဒေသတိချဳအာလဝ် ဇၞော်ကဵုဇြဟတ်တံဏံဂှ် ကံၚ်ဇြဳပၞာန် လလောၚ်တြးလဝ် နဒဒှ်အကာဲအရာကာတၟေၚ်တုဲ သၠုၚ်ပ္တိုန်အာ ခရိတ်အရပ်စပ်ကာစဵုဒၞါတံမာန်ကီုလေဝ် ဘဲတိချဳဂှ်တှ်ေ သွက်ဂွံဂွံအရီုဗၚ်မ္ၚးတံဂှ် ကော်ဘိက်လဝ်ညးဂမၠိုၚ် သွက်ဂွံကၠုၚ်စိုပ်ကဵုအရီုဗၚ်ရ။
နကဵုညးဍုၚ်ကွာန်ဂမၠိုၚ် ၜိုတ်သၟဟ်အစောံ သွက်ဂွံဘိုၚ်ရီုဗၚ်ကဵု ကမၠောန်ဟံၚ်ပြာ်ဘဲတိချဳ ဒှ်ကၠုၚ်ဟိုတ်နူဘဲသဘာဝတံဂှ် က္ဍိုပ်သ္ကိုပ်ပၞာန် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ