နေဗျဳဒဝ်၊ မာတ် ၃၀
ဟိုတ်နူဘဲဒဏ်တိချဳ မၞုံကဵုဇြဟတ်သ္ကာတ် မက္တဵုဒှ်အာလဝ် ပ္ဍဲဍုၚ်ဗၟာ သ္ကုတ်လဒေါဝ်တေံဂှ်တုဲ ညးဍုၚ်ကွာန် ဇီုကပိုက်ဒးဂိအာတံဂှ် ဂကောံဝ ကေုာံ ဂကောံမာၚ်ဠာတံ ရီုဗၚ်ကဵုအာ သွက်ဂွံရီုဗၚ်ဟံၚ်ပြာ် ကေုာံ သွက်ပရေၚ်ကလေၚ်ဖျေံဒၞါဲဝါဲတံဂှ်ဏောၚ်ဂှ် ပ္ဍဲဂိတုမာတ် ၂၉ တေံ လလောၚ်ပ္တိတ်လဝ်ရ။
နကဵုဂကောံ”ဝ” UWSA ကဵုအာဒါန် သွက်ဒေသဒးဘဲတိချဳတံ ၂၀၀၀ ပြကောဋိကိုဋ်ဒ္ကေဝ်ဏောၚ်တုဲ သွက်ဂွံဟံၚ်ပြာ်ဂှ်လေဝ် ယဝ်ဌာနမဆေၚ်စပ်တံ အာတ်မိက်ကၠုၚ်မ္ဂး သွက်ဂွံဗလးဏာ ဂကောံရီုဗၚ်ဟံၚ်ပြာ်ကာတၟေၚ်တံဂှ် ပလေဝ်ပလေတ်ဒက်ပ္တန်လဝ်ရောၚ် သ္ဂးရ။
အခိၚ်အခါကာလ ဒးဂဗဒၟံၚ်ကဵုဘဲအန္တရာယ်သ္ကာတ်မြဟ်သာ်ဏံဂှ် နကဵုဂကောံဗော်သွးလညာတ်ထ္ကးပြးဒၟံၚ်ဂမၠိုၚ် ပြဒ္ဒညာပရေၚ်ဍုၚ်ကွာန် ကေုာံ ပရေၚ်ပၞာန်တံဂှ် စွံကၠာတုဲ သွက်ဂွံပါလုပ်ရေၚ်တၠုၚ်ကဵု ပ္ဍဲကမၠောန်ရီုဗၚ်ဟံၚ်ပြာ် နကဵုစိုတ်ဗ္စာရဏာတံဂှ် ဖ္တိုက်ဖ္အောဝ်လဝ်ရ။
သ္အာၚ်နူဂှ်ပၠန် သွက်ဂွံဟံၚ်ပြာ် ညးဍုၚ်ကွာန်ဒးမံၚ်ဘဲဒဏ်ပၞာန် သီုဘဲဒဏ်အန္တရာယ်သဘာဝတံ ဗွဲမဂတာပ်အခိၚ်မာန်ဂှ် ဟွံမွဲကဵုပရေၚ်တာဒၞါတံမွဲသာ် သွက်ဂွံထံက်ပၚ်ရီုဗၚ်ကဵုမာန်၊ သွက်ဂွံရေၚ်တၠုၚ်အာ ကမၠောန်ပရေၚ်ကလေၚ်ဖျေံဒၞါဲဝါဲတံမာန်ဂှ် နကဵု “ဝ” စၟဳစလဝ်ရောၚ် သ္ဂးရ။
ဂကောံမာၚ်ဠာဂှ်လေဝ် အလဵုအသဳ ကေုာံ ညးဍုၚ်ကွာန်ကောန်ဂကူ မၞုံအပ္ဍဲဒေသတၟေၚ် (၄) ရးသေံသ္ကုတ်ဗၟံက်တံလေဝ် ဒဒှ်ရအောန်စိုပ် ဗွဲမတုပ်သၟဟ်ကဵု ညးဍုၚ်ကွာန်ကောန်ဍုၚ်အရၚ် မ္ဒးဂိဇီုကပိုက်အာ ဟိုတ်နူဘဲဒဏ်သဘာဝတံဂှ်ရောၚ် ဟီုလဝ်ရ။
ပ္ဍဲအရာတတ်ထ္ပာ်အခက်အခုဲဂမၠိုၚ် ၜိုတ်ဇကုသၟဟ်အစောံ သွက်ဂွံပါလုပ်ရီုဗၚ်အာဂှ်တုဲ ညံၚ်ဂွံပလံၚ်ဗစိုပ်ကဵု မဒါန်သြန် ကေုာံ ကပေါတ်ထံက်ပၚ် သွက်ပရေၚ်ဟံၚ်ပြာ် ကေုာံ သွက်ပရေၚ်ကလေၚ်ဖျေံဒၞါဲဝါဲတံမာန်ဂှ် ရေၚ်တၠုၚ်ဒၟံၚ်ရောၚ် သ္ဂးရ။
ကဵုအရီုဗၚ်ပရေၚ်ဗ္စာရဏာမၞိဟ် စပ်ကဵုဘဲအန္တရာယ်တိချဳဂှ်တုဲ ၜိုတ်အစောံဇြဟတ်နွံ ယိုက်ဂၠေၚ်ရေၚ်တၠုၚ်အာ သွက်ဒတုဲဖဵုညးဍုၚ်ကွာန်တံဏောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ဂကောံမာၚ်ဠာဂှ်ရ။
ညးဍုၚ်ကွာန်ရေၚ်သ္ကအ် ယဝ်ဘိုၚ်ထ္ၜဘိုက်ရီုဗၚ်အာ ညဳညဳသာသာ နကဵုမေတ္တာမ္ဂး တတ်ထ္ပာ်ဒဒိုက်နာနာမာန်တုဲ ကလေၚ်ဒက်ပ္တန်ဥဂျာန်ဂြောဝ်ဂတာတံမာန်ဏောၚ်ဂှ် လလောၚ်ပ္တိတ်လဝ်ရ။
အတိုၚ်စရၚ် ကံၚ်ဇြဳပၞာန် ကံက်ကပှ်ဂွံလဝ် ပ္ဍဲဂိတုမာတ် ၂၉ စဵုကဵုလဒေါဝ်တ္ၚဲဂှ်မ္ဂး ဟိုတ်နူတိချဳတုဲ ဗၞတ်အလုံဍုၚ်မွဲ မၞိဟ် ၁၀၀၀ ပြၚ် ချိုတ်တုဲ ၂၃၇၀ ပြၚ်ဝွံ ဇီုကပိုက်ကလိဂွံလဝ်ဝပ်တုဲ မၞိဟ်ကၠေံအာ နွံကဵုစှော်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ