မာန္တလေဝ်၊ မာတ် ၃၀
နကဵုဒပ်စဵုဒၞါညးဍုၚ်ကွာန် PDF ဂမၠိုၚ် ပံၚ်တောဲကဵုဒပ်ပၠန်ဂတးအပ္ဍဲတိဍာ်ဇကုတံဂှ်တုဲ သွက်ဂွံဘိုၚ်ရီုဗၚ်ကဵု ညးဍုၚ်ကွာန်ဒးဂဗလဝ်ဘဲတိချဳတံဂှ် NGU စၞောန်ပ္ညုၚ်ကၠုၚ်လဝ်ရ။
ပ္ဍဲအရာရီုဗၚ်ဘဲတိချဳတံဂှ် တၚ်နွံပၟိက် ကေုာံ အကာဲအရာရေၚ်တၠုၚ်လဝ်ဂမၠိုၚ်ဂှ်လေဝ် သွက်ဂွံပ္တိုန်ထ္ၜး ဇရေၚ်ညးမဆေၚ်စပ်အဆံၚ်ၚ်တံဂှ် ဝန်ဇၞော်ကာစဵုဒၞါ အလဵုအသဳညဳသၟဟ်ဂကူ NUG ဥူယဳမန် စၞောန်ပ္ညုၚ်ကၠုၚ်လဝ် နကဵုစၟတ်တ္ၚဲ ဂိတုမာတ် ၂၈ တေံရ။
မာန်ဝေန်ခိုၚ်တာန် သ္ကိုပ်ဝန်ဇၞော်ကၟိန်ဍုၚ် NUG ဂှ်လေဝ် သွက်ညးဍုၚ်ကွာန်ဒးလဝ်ဘဲတိချဳတံဂှ် နကဵု NUG ကၠောန်သ္ပဒၟံၚ် ပရေၚ်ရီုဗၚ်ဟံၚ်ပြာ်ကာတၟေၚ်ယျဂှ် ကဵုလဝ်သမ္တီရ။
အတိုၚ်တၚ်နၚ် ကံၚ်ဇြဳပၞာန်ဂှ်မ္ဂး စဵုကဵုဂိတုမာတ် ၂၉ အခိၚ်လဒေါဝ်တ္ၚဲ ၜိုတ် ၁၂ နာဍဳဂှ် ပ္ဍဲဍုၚ်ဗၟာ ဟိုတ်နူဘဲတိချဳတုဲ ညးဍုၚ်ကွာန်ကောန်အရာပ် ၁၀၀၀ ပြၚ် ချိုတ်အာတုဲ ဟွံအောန်နူ ၂၄၀၀ ဇီုကပိုက်ကလိဂွံလဝ်ဝပ်ရ။
တုဲကၠုၚ် ပ္ဍဲဂိတုမာတ် ၂၈ အခိၚ်လဒေါဝ်တ္ၚဲ ၜိုတ် မွဲနာဍဳဂှ် ပ္ဍဲနေဗျဳဒဝ်၊ ရးသက်ကိုၚ်၊ ရးမာန္တလေဝ်၊ ရးမဂွဵု၊ ရးသေံ ဒေသသ္ကုတ်ဨသာန်၊ ရးဗဂေါတံဂှ် တိချဳအာလဝ် နကဵုဇြဟတ် ၇ ဒဿမ ၇ ရေတ်တာသကေရ။
ဟိုတ်နူတိချဳ ဇၞော်ကဵုဇြဟတ်ဂှ်တုဲ ပ္ဍဲဒေသအလဵုအသဳညဳသၟဟ်ဂကူ NUG ထိၚ်ဒက်လဝ်ဂှ်လေဝ် မၞိဟ်ကဵုစှော် ချိုတ်အာလဝ် နွံဒၟံၚ်တုဲ ကၠောန်သ္ပဒၟံၚ် ပရေၚ်ရီုဗၚ်ဟံၚ်ပြာ်တံရ။
ဒေသဒးလဝ်ဘဲတိချဳတံဂှ် ကံၚ်ဇြဳပၞာန် လလောၚ်တြးလဝ် အကာဲအရာကာတၟေၚ်တုဲ အာတ်လဝ်သီုအရီုဗၚ် နူဍုၚ်သ္အာၚ်တံရ။
ပရိုၚ်−သြၚ်လောန်တိုၚ်(မ်)
ဗီု− NUG