မတ်မလီု၊ မာတ် ၃၀
ကံၚ်ဇြဳပၞာန် ထ္ၜးကၠုၚ်ဟိုတ်ၜက်ၜေတ်တိတံဂှ်တုဲ သ္ၚိလ္တူဍုၚ်မတ်မလီု ဂၠိုၚ်ကဵုကၠံဂှ် တ္ၚဲဂိတုဨပရဴ ၁၀ စွံလက္ကရဴအိုတ်တုဲ ကဵုရိုဟ်ပလီုလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သ္ၚိကံၚ်ဇြဳပၞာန်တွဵုရး ကဵုပလီုလဝ်ဂှ်ဝွံ ဒှ်သ္ၚိနူအရာပ်လ္တူဍုၚ် အရာပ်လှိုၚ်တုဲ ဟွံဂွံအခေါၚ်မွဲသာ် ၜက်ၜေတ်တုဲ သိုၚ်လဝ်ဏောၚ် နကဵုဟိုတ်သာ်ဏံဂှ် ကဵုသရိုဟ်ပလီုကၠုၚ်ရ။
အတိုၚ်လိက်ကံၚ်ဇြဳပၞာန် ကဵုကၠုၚ်ပရိုၚ်ဂှ်မ္ဂး အပ္ဍဲကဵုတိ သမၠဲဍေံမၞုံ ၁၁ ဒဿမ ၂၃၉ ဨက ဂွံလဝ်အဝဵု လ/န (၃၉) နကဵုယၟုသ္ကိုပ်အုပ်ဓုပ် ဂကောံရေၚ်တၠုၚ်သွက်ဂွံသ္ဇးဇ္ၚး ပွိုၚ်ဍုၚ်မတ်မလီုဂှ် ကဵုလဝ်အခေါၚ်ဟွံမွဲမွဲသာ် စမြိုၚ်သ္ၚိဌာန် လုပ်ၜက်ၜေတ်တုဲသိုၚ်လဝ်တံဂှ် စၟဳတ်ဂွံဆဵုကေတ်တုဲ ကဵုပလီုကၠုၚ်လဝ်ရောၚ် သ္ဂးရ။
ညးဒေသဍုၚ်မတ်မလီုမွဲတၠဂှ်တှ်ေ စမြိုၚ်ကံၚ်ဇြဳပၞာန် ကဵုပလီုလဝ်ဂှ်ဝွံ ၜက်ၜေတ်တုဲသိုၚ်လဝ်ဟွံသေၚ် ခရဝ်နဳတံကဵု ညးအုပ်ဓုပ်ဂမၠိုၚ် ပံၚ်တောဲတုဲ သွံတြးကၠုၚ်လဝ် တိဝါဗ္ၚတံတုဲ ဒှ်ဒၞါဲတိ ညးဍုၚ်ကွာန်တံ ရာန်ကေတ်လဝ်ဂမၠိုၚ်ဏောၚ် ဟီုရ။
“တိၜက်ၜေတ်တံ မုတံဂးတုဲ ဍာံဍာံဂှ် ဟွံသေၚ်ပုဟ်။ ဍာံဍာံဂှ် ဒှ်တိဗ္ၚဏောၚ်။ နူကဵုတၠဍေံတမ်ဝါဒိဂှ်မွဲကဆံၚ် ခရဝ်နဳတံကဵု ညးအုပ်ဓုပ်တံ ပံၚ်တောဲတုဲ လိက် လ/န (၃၉) စှ်ေဂးတုဲ ရပ်ကၠုၚ်လိက်တၞးမွဲတၞး ဍေံတံကူဆာဲတုဲ ဖျေံဒွန်တုဲ သွံစကၠုၚ်လဝ် တိဗ္ၚတံဂှ်ရ။ ညးဍုၚ်ကွာန်တံဂှ်လေဝ် လိက် လ/န (၃၉) စှ်ေယျဂးတုဲ ထ္ၜးတၞးလိက်ဂှ်တုဲ ရာန်ကၠုၚ်အိုတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် စပ်ကဵုပရေၚ်ကဵုသရိုဟ်ပလီုစမြိုၚ် ဗွဲအဓမ္မသာ်ဏံဂှ်တုဲ ၜိုန်ရပ္တိုန်လိက်ဒုန်ဂုန် ဇရေၚ်သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက်ပ္တိုန်လဝ်ဂှ်ကီု ဌာနမဆေၚ်စပ်တံကီုဂှ်ကီုလေဝ် ညးတံ ကဵုအာပသောၚ်ဒၟံၚ် ကုညးမသွံတြးလဝ်တမ်မူလတံသၟးဂှ် ညးဆက်ဟီုရ။
လၟိဟ်စမြိုၚ် သိုၚ်လဝ်ဗွဲမဗိုန်ခိုၚ် နူကဵုကံၚ်ဇြဳပၞာန်တံ ကဵုရိုဟ်ပလီု နကဵုဟိုတ်သိုၚ်ဒးပ္ဍဲတိဟွံဂွံအခေါၚ်တံဂှ်ဝွံ ၜိုတ် ၅၀၀ နွံမာန်ဏောၚ် ညးဒေသတံ ဟီုဒၟံၚ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာဟွံမာန်ဏီရ။
နကဵုဟိုတ်သိုၚ်ဒးပ္ဍဲတိ ဟွံဂွံအခေါၚ်တံဂှ်တုဲ သ္ၚိမၞိဟ်ဒၟံၚ်တံဂှ် ကံၚ်ဇြဳပၞာန် ကီုရိုဟ်ပလီုကၠုၚ်ဂှ်ရ နကဵုညးဒေသ ရာန်ဒးဗၠေတ်မှာအာဂမၠိုၚ် ဒးဒှ်ဒဒိုက်တုဲ လ္ၚဵုတံဂှ်တှ်ေ ဒၞါဲသ္ဇက်ဂွံမံၚ်ဟွံမွဲဂှ်ရ ဒးဗ္ဒမံၚ်ဒၟံၚ် ပ္ဍဲဘာလကျာ်၊ ပ္ဍဲဘာကျာ်တံဂှ်ရောၚ် ညးဒေသတံ ဟီုရ။
ဂကောံပရေၚ်သ္အးဇ္ၚးပွိုၚ်ဍုၚ်မတ်မလီု နွံသၟဝ်တဲကံၚ်ဇြဳပၞာန်ဂှ်တှ်ေ ကုညးသိုၚ်ၜက်ၜေတ်ဒး ပ္ဍဲတိဂကောံသ္အးဇ္ၚး (စည်ပင်) တံဂှ် အလန်ပထမ ကဵုကၠုၚ်ပရိုၚ် သ္ဂောံပလီုကီုလေဝ် ဟိုတ်နူရိုဟ်ပလီုကၠုၚ်လဝ်ဟွံမွဲဂှ်ရ မ္ဒးကဵုကၠုၚ်ပရိုၚ် အလန်ဒုတိယသာ်ဏံရောၚ် သ္ဂးရ။
နကဵုညးမံၚ်ဒၟံၚ်ပ္ဍဲတိတံဏံဂမၠိုၚ် ဂိတုဨပရဴ (၁၀) စွံလက္ကရဴအိုတ်တုဲ ယဝ်ဟွံသီပလီုမ္ဂး ရေၚ်တၠုၚ်ကေတ်အာဒုဟ် ဗွဲမဗဗွဲကဵုသၞောဝ်ဂကောံပရေၚ်သ္အးဇ္ၚး တွဵုရးဍုၚ်မန်ဏောၚ်ဂှ်လေဝ် ဂကောံပရေၚ်သ္အးဇ္ၚးပွိုၚ်ဍုၚ်မတ်မလီု ဘပဠကၠုၚ်လဝ်ရ။
မ္ဒးရေၚ်တၠုၚ်ကၠုၚ် သ္ဂောံပလီုကၠေံ သ္ၚိမၞိဟ်ဒၟံၚ်တံဂှ်ဝွံ ဟိုတ်နူသ္ကိုပ်ဗိုလ်ဇၞော် ကျဝ်ဇြဲမျေတ် မဒှ်ဝန်ဇၞော်ကေၚ်ကာပယျဵု ကေုာံ ပရေၚ်ဂီုကၠီု တွဵုရးဍုၚ်မန် ကံၚ်ဇြဳပၞာန် ကဵုကၠုၚ်စၞောန် ပ္ဍဲကောံဓရီု မကၠောန်သ္ပလဝ် ပ္ဍဲရုၚ်အလဵုအသဳတွဵုရး ဍုၚ်မတ်မလီု ပ္ဍဲဂိတုဂျာန္နဝါရဳ ၁၀ ဂှ်ရောၚ် ဂွံတီကေတ်ရ။
အခိၚ်လၟုဟ် ဒၞါဲတိစမြိုၚ် ကဵုရိုဟ်ပလီုကၠုၚ် နကဵုဟိုတ်ၜက်ၜေတ်လုပ်ဂှ် ကံၚ်ဇြဳပၞာန် ဂးကၠုၚ်ကိုန်စဳမာန် (လှိုင်တိုးချဲ့ မြို့သစ်) တုဲ ဗဝ်တိကီု၊ ၜံက်ဂအာၚ်တိတံကီုဂှ် ရေၚ်တၠုၚ်ဒၟံၚ်ရောၚ် ဂွံတီကေတ် အတိုၚ်ဂလာန် ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−NUG