လာယှိုဝ်၊ ဨပရဴ ၁၂
ပရေၚ်ပၞာန် ၁၀၂၇ ဝွံ နကဵုပရေၚ်ထံက်ဂလာန်ညးဍုၚ်ကွာန်ပၠန်ဂတးတံဂှ် ဂါံအာ ဒဵုစိုပ်တိုၚ်ပ္ကဴပၠန်ဂတးဏောၚ် အခိၚ်ဒပ်ကဝ်က MNDAA ကဵု ဒပ်တအာၚ် TNLA ဟီုဒၟံၚ်ဂှ် ညးလ္ၚတ်ပရေၚ်ပၞာန်ဂမၠိုၚ်တံ သ္ၚဳဂၠိပ်ကၠုၚ် နကဵုဂကောံမဟာမိတ်ကောဒေံပိဂကောံ မွဲမွဲအခိၚ် ဒေါအ်ပန်ပှော်တုဲ ကၞာတ်ကၠုၚ်တိဍာ်ဒှ်မာန်ရောၚ်။
ဒဒှ်မထ္မံက်ကၠုၚ်ရုပ်ရဴ ပရေၚ်ပၞာန် ၁၀၂၇ သၟဝ်သ္ကိုပ်သ္ကဂကောံမဟာမိတ်ကောဒေံပိဂကောံ သ္ကုတ်သၟဝ်ကျာတေံ ကရောံဇြဟတ်ပၠန်ဂတးကညၚ်၊ ဒပ်မဟာမိတ်တၞဟ်ဟ်တံဂှ်ဝွံ သွက်ပရေၚ်ဗ္တိုက်သရိုဟ်တၠအဝဵုပၞာန် ပၠန်ဂတးရပ်လွဟ်ပ္ဍဲဍုၚ်ဗၟာဂှ် ဒှ်ကၠုၚ်ပရေၚ်ပြုပြေၚ်ပၞာန် မစကၠုၚ်လဝ် ခိုဟ်အိုတ်မွဲရောၚ် သ္ဂးရ။
သွက်ဂွံထ္မံက်ရုပ်ရဴ လၟေၚ်ကမၠောန်သွပ်လ္ပအ်အာရက္ခ မဒှ်အခေါၚ်စၞောန်ပျးအပိုၚ်ဂကူရခေၚ်တံဂှ် ဒက်ပ္တန်ကၠုၚ်လဝ်ဒပ်ပၞာန်ရခေၚ် AA တုဲ ပ္ဍဲဂိတုဨပရဴ ၁၀ ပ္ဍဲတ္ၚဲကၠောံသၞာံ ပေၚ် ၁၆ သၞာံဂှ် ပလံၚ်ဗစိုပ်လဝ်လိက်သဝဏ်တုဲ ထ္မံက်ထ္ၜးလဝ် ပ္ဍဲလိက်သဝဏ်ဝွံရ။
ဂကောံမဟာမိတ်ကောဒေံပိဂကောံဝွံ တတ်ထ္ပာ်ကၠုၚ်တၚ်အခက်အခုဲ ဒြဟတ်ဓရိုဟ်ဂမၠိုၚ် ဗွဲမညဳသာ နကဵုနဲကဲနာနာသာ်တုဲ ကရောံလပှ်ပရေၚ်ပၞာန် ၁၀၂၇ စဵုကဵုစိုပ်တိုၚ်ပ္ကဴပၠန်ဂတးဂှ် ညဳသာအာညးသ္ကအ်ဏောၚ် MNDAA ကဵု TNLA သ္ဂးရ။
ပ္ဍဲအကာဲအရာဂကောံမဟာမိတ်ကောဒေံပိဂကောံ မဒှ်အကာဲအရာဟွံတုပ်သၟဟ်ညးသ္ကအ်ဂှ် ဟိုတ်နူအလဵုအသဳကြုက် ဓရတ်ကၠုၚ်တုဲ ဒေါအ်ပန်ပှော်ကဵုကံၚ်ဇြဳပၞာန်တုဲ ကၞာတ်ကၠုၚ်တိဍာ် ဒှ်ကၠုၚ်ဟွံမာန်ဂှ် ဟီုပိုတ်တ်ဟွံဂွံရောၚ် ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ် သ္ၚဳဂၠိပ်လဝ်ရ။
“ဟိုတ်နူကြုက် ကရေပ်ဓရတ်ကၠုၚ်တုဲ ကေတ်ကၠုၚ်တိဍာ်ဗၠးၜးညးသ္ကအ်တုဲ ဒဵုကဵုဒေါအ်ပန်ပှော်ဂှ် ကံၚ်ဇြဳပၞာန် သဳကၠဳအာဂှ်လေဝ် ဒှ်ကၠုၚ်ဟွံမာန်ဂှ် ဟီုဟွံဂွံရ။ ဟိုတ်ဍေံဂှ်တှ်ေ စၟအ်ဒပ်ရပ်လွဟ်(သ္ကုတ်သၟဝ်ကျာ) မဆက်စပ်ဒၟံၚ်ကဵု ဍုၚ်ကြုက်တံဂှ်တှ်ေ ကယျာန်ပါဲကၠေံ လစွံစိုတ်ဍုၚ်ကြုက်ဟွံဂွံပုဟ်။ အတိုၚ်ဟီု ဟွံဒ္ဂေတ်ဗက် ဟွံဂွံပုဟ်။ ဇြဟတ်ဓရိုဟ် မသ္ကာတ်မြဟ်တံ က္တဵုဗဒှ်ကဵုပရေၚ်ဇီုကပိုက်တံ နွံကၠုၚ်မာန်ဏောၚ်ဟီုတှ်ေ ဒေါအ်ပန်ပှော်တုဲ ကၞာတ်ကၠုၚ်တိဍာ်တံဂှ်လေဝ် ဒှ်ကၠုၚ်ဟွံမာန်ဂှ် ဟီုဟွံဂွံပုဟ်။ ဒှ်လေဝ် ဒှ်ကၠုၚ်မာန်ဏောၚ်” သာ်ဝွံ သ္ဂးရ။
ယဝ်ရ ဂကောံမဟာမိတ်ကောဒေံ သီုပိဂကောံ ဒေါအ်ကၠုၚ်ပန်ပှော် ကုကံၚ်ဇြဳပၞာန်မ္ဂး ပၠန်ဂတးထပိုတ်ရိုဟ်ကၞက်သၞောတ်တၠအဝဵုပၞာန်ဝွံ လီုလာ်အာဟွံသေၚ်တုဲ ဟွံသေၚ်သာ်ဂှ်မ္ဂး ညးဗ္တိုက်ညးဂွံ ဒြဟတ်သာ်ဏံ ဒှ်ကၠုၚ်မာန်ဏောၚ် ညးထံက်ထ္ၜးရ။
နကဵုဒပ်ကဝ်က MNDAA မဒှ်ဂကောံမဟာမိတ်ကောဒေံဂှ်တှ်ေ ဟိုတ်နူအလဵုအသဳကြုက် ကရေပ်ဓရတ်ကၠုၚ်တုဲ ကၠာဟွံဂွံစိုပ်ဂိတုဨပရဴ ၂၀ ဏံ ဒးဆုတ်တိတ် နူဍုၚ်လာယှိုဝ်ဏောၚ်တုဲ ဂကောံအုပ်ဓုပ်ဌာနမဆေၚ်စပ် ကံၚ်ဇြဳပၞာန်တံ သ္ဂောံလုပ်စိုပ် နွံဒၟံၚ်ရ။
ဟိုတ်ဂှ်ရ ဒပ်ကဝ်ကတံ ဆက်ကေတ်အာဒၞါဲ မ္ၚးဍုၚ်လာယှိုဝ်ကဵု ပ္ဍဲကဵုကွာန်ရးတံဂှ်ဏောၚ်ကီုလေဝ် မွဲလ္ပာ်ဂှ်ပၠန် ပ္ဍဲဂိတုဂျာန္နဝါရဳ ၁၈ ဂှ် ထ္ပက်လဝ်စၟတ်တဲ လိက်ကသုက်ဒေါအ်ပန်ပှော်ၜါလ္ပာ် ကုကံၚ်ဇြဳပၞာန်ရ။
ဒပ်တအာၚ် TNLA လေဝ် ညံၚ်ပြဒ္ဒညာပရေၚ်ပၞာန်လၟုဟ် ဂွံပြေပြံၚ်ဂှ် ဍုၚ်ကြုက် လုပ်စိုပ်ပ္ညဳပ္ညပ်ကဵုအကြာတုဲ ပ္ဍဲဂိတုဖေဖဝ်ဝါရဳ ၁၆ တေံ ဆဵုဂဗသဳကၠဳလဝ် ကုကံၚ်ဇြဳပၞာန် ပ္ဍဲဍုၚ်ကူမေန်ကီုလေဝ် ဟွံဂွံလဝ်တၚ်တုပ်စိုတ်ဒေါအ်ပန်ပှော်ရ။
အခိၚ်လၟုဟ်ဂှ်လေဝ် ပ္ဍဲရးသေံသ္ကုတ်သၟဝ်ကျာ ပွိုၚ်ဍုၚ်နံၚ်ချဵု ပ္ဍဲကဵုကွာန်ဒံၚ်ခါန်ဂှ် အကြာဒပ်ကံၚ်ဇြဳပၞာန်ကဵု ဒပ်တအာၚ် TNLA တံ ပေါဲဗ္တိုက်ၜါလ္ပာ် က္တဵုဒှ်ဒၟံၚ်ရ။
ဒပ်ပၞာန်ရခေၚ် AA ဂှ်တှ်ေ ညံၚ်အလုံဍုၚ်ရခေၚ်မွဲ ဂွံဗၠးၜးဂှ် ပ္ဍဲကဵုပွိုၚ်ဍုၚ်သှ်ေဒၟံၚ်လ္ၚဵုတံဂှ်တှ်ေ ဆက်လုပ်ဒၟံၚ်ပေါဲဗ္တိုက်တုဲ ဂွံသောၚ်ကလးအာ နကဵုနဲကဲပရေၚ်ဍုၚ်ကွာန်ဂှ် ဒှ်ဒၟံၚ်ဒတုဲလၟိုန်ရောၚ် သၞာံတုဲကၠုၚ် ပ္ဍဲဂိတုဒဳဇြေမ်ဗာတေံ ကဵုသမ္တီလလောၚ်တြးလဝ်ရ။
ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ်ဂှ်တှ်ေ ဇြဟတ်ဓရိုဟ်နူကြုက်ကဵု အကာဲအရာ MNDAA ဂှ်ဝွံ အာဒှ်ဒၟံၚ်ပွပလာပ်ပထုဲ လ္တူ TNLA နကဵုပရေၚ်ပၞာန်ဂှ်ရ အလုံဍုၚ်မွဲ ဂွံဗၠးၜးဂှ် ဒးရံၚ်အာသွဟ် ဂကောံကောဒေံပိဂကောံ ပါလုပ်နွံ၊ ဟွံမွဲဂှ်ဏောၚ်ဂှ် သ္ၚဳဂၠိပ်လဝ်ရ။
“ညံၚ်ပရေၚ်ဂကူဗၠးၜး ကၞောတ်တဲ ဒဵုကဵုသၞောတ်တၠအဝဵုပၞာန် ဂွံသရိုဟ်စှ်ေအာဂှ် ဗ္တိုက်အာဏောၚ် သာ်ဏံလေဝ် ဟီုလဝ်နွံ။ ဆ္ဂး ပြဟ်ဟ်ဏံ နကဵု MNDAA ဒးကလေၚ်ကဵုလဝ်ကံၚ်ဇြဳပၞာန် လာယှိုဝ်ဂှ်တုဲ အခိၚ်လၟုဟ်ဂှ်လေဝ် ဒေါအ်လဝ်ပန်ပှော်ရ။ ဟိုတ်ဂှ်ရ အာဒှ်ဒၟံၚ်ပွပလာပ်ပထုဲ လ္ပာ် TNLA။ မုဒှ်ရောဟီုတှ်ေ ကံၚ်ဇြဳပၞာန် ရပ်စပ်ဇြဟတ်ပၞာန် လၟိဟ်မဂၠိုၚ်ဂၠေၚ်တုဲ ညံၚ်ဂွံဖံက်တိတ် လ္ပာ်(မိုးကုတ်)ကဵု နံၚ်ချဵု နူကဵု(တောၚ်ခမ်း)ဂှ် ကၠောန်ကၠုၚ်ဒဵုကဵုကဆံၚ်ဏံမာန်ဏောၚ် ဂွံဆဵုကေတ်ရ။ ဟိုတ်ဂှ်ရ တၚ်လလောၚ်တြးဂှ် ပ္တိတ်ဂှ်ပ္တိတ်လဝ်ရ။ သၞောတ်တၠအဝဵုပၞာန်အလုံဍုၚ်မွဲ သရိုဟ်စှ်ေတုဲ ပါလုပ်၊ ဟွံပါလုပ် သွက်ပရေၚ်ဗၠးၜးဟီုဂှ် ရံၚ်ကေတ် Statement သၟးဟွံဂွံ ဒးရံၚ်သီု Result ဍေံဏောၚ်။ အဓိကဂှ်တှ်ေ Results ဍေံရဏောၚ်” သာ်ဝွံ သ္ဂးရ။
ပ္ဍဲလိက်သဝဏ်ဂှ်တှ်ေ ကုညးမပ္တိတ်ကၠုၚ်ဇြဟတ် ဟွံဒေါအ်ဟွံဇူ သွက်သွပ်လ္ပအ် သွက်ဂကူရခေၚ်သီုဖအိုတ် ပ္ဍဲတရဴပၠန်ဂတးဇမၠိၚ်ဂှ် ဒဒှ်ရကေတ်တဴဂုန်စရာဲဗွဲတၟေၚ်ဂှ်ကီု အခိၚ်ခြာဟွံလအ် စိုပ်ကၠုၚ်ဗွဲစၟတ်ရဏောၚ်ဂှ် ထ္မံက်ထ္ၜးလဝ်ရ။
သ္အာၚ်နူဂှ်ပၠန် ပၠန်ဂတးဗ္တိုက် ကုတၠအဝဵုပၞာန်ဗၟာတုဲ ဂွံဒက်ပ္တန် သၞောတ်ပရေၚ်ဍုၚ်ကွာန် မကိတ်ညဳကဵုညးဍုၚ်ကွာန်တံမာန်ဂှ် ပ္ဍဲတိဍာ်ပၠန်ဂတး နွံအလုံဍုၚ်မွဲဂှ် ကောန်ဒပ် AA တံ နွံဒၟံၚ်ရောၚ် သ္ဂးရ။
ဟိုတ်ဂှ်ရ သၠုၚ်ပ္တိုန်အသိၚ် ထ္မံက်ဒၟံၚ်ရုပ်ရဴ ကမၠောန်ပၠန်ဂတး ဗွဲမစှ်ေကဵုနတဲဂှ်ဝွံ သွက်ညးဍုၚ်ကွာန်အလုံဍုၚ်ဗၟာဂှ် ဒှ်သ္ဇက်ဒးကေတ်ဂုန်စရာဲရောၚ် ထ္မံက်ထ္ၜးလဝ် ပ္ဍဲလိက်သဝဏ် မပလံၚ်ဗစိုပ်လဝ် ဇရေၚ် AA ရ။
ပရိုၚ်−သြၚ်လောန်တိုၚ်(မ်)
ဗီု−3 Alliance