မတ်မလီု၊ ဨပရဴ ၁၂
ပ္ဍဲတွဵုရးဍုၚ်မန် အခိၚ်သြောံကညၚ်တိတ်ဏံ ၚုဟ်သြောံ အောန်စှ်ေကၠုၚ်တုဲ ဟွံဂွံၚုဟ်ခိုဟ်ဟ် ဗီုကၠာတေံဂှ်ရ နကဵုသၟာဗ္ၚဂမၠိုၚ် ဒှ်ဒၟံၚ်ဒဒိုက်ဂှ် ဂွံတီကေတ်ရ။
သၞာံတုဲကၠုၚ်တေံ သြောံ ၁၀၀ နဂှ် ဂွံကၠုၚ်လဝ်ၚုဟ် ပွဳပွူ ၂၂ ကိုဋ်ဒ္ကေဝ်ကီုလေဝ် အခိၚ်သြောံကညၚ်တိတ်လၟုဟ်ဏံ ဂွံဒၟံၚ် ၁၃ ကိုဋ်ဓဝ်တုဲ ၚုဟ်စှ်ေကၠုၚ် ကဝက်ပြၚ်ရ။
ၚုဟ်သြောံကညၚ်စှ်ေဒၟံၚ်သာ်ဏံတုဲ ဟွံဂွံၚုဟ်ခိုဟ်ဟ်ဂှ်ရ ယဝ်ဒးတၟော်ကဵု ခရိတ်အိုတ်နာနာ ပါလုပ်သီုကဵု ခရိတ်တဵုလွဳ ကေုာံ ခရိတ်ၚုဟ်ကပေါတ်တမ်တံဂှ်မ္ဂး မ္ၚးနူဟွံဂွံပရဲဂှ် ဒှ်ဒၟံၚ်အကာဲအရာ ဒးဂဗဒၟံၚ်ကဵု ပွကျဗြံတံရောၚ် ဂွံတီကေတ်ရ။
သၟာဗ္ၚကၠောန်သြောံမွဲတၠဂှ်တှ်ေ ၚုဟ်သြောံလၟုဟ် စှ်ေကၠုၚ်ၜိုတ်ကဝက်ပြၚ် နူကဵုသၞာံတုဲတေံဂှ်ဝွံ ဟိုတ်ဒၟါနူကံၚ်ဇြဳပၞာန် ထိၚ်ထောံ ၚုဟ်သြောံ မဒှ်တုဲ ၚုဟ်ကပေါတ်တမ်တၞဟ်ဟ်တံ သၠုၚ်တိုန်တုဲ ၚုဟ်သြောံ စှ်ေဒၟံၚ်သာ်ဏံဂှ်ရ သၟာဗ္ၚဂမၠိုၚ် ဒးဒှ်ဒၟံၚ်ဒဒိုက်ရောၚ် ဟီုလဝ်ရ။
“ကဵုၚုဟ်သြောံ သၞာံတုဲတေံရမ္ဂး စှ်ေအာၜိုတ်ကဝက်ပြၚ်။ မူဟိုတ်ဂွံယအ်စှ်ေအာဟီုတှ်ေ ကံၚ်ဇြဳပၞာန် ထိၚ်ထောံသြောံ မပ္တံကဵု သွံဂၠိုၚ်နူကဵုၚုဟ်လဵုဟွံဂွံ၊ ရဲသြောံနွံ ၅၀၀၀ တံ ဒးပ္တိုန်စရၚ်တံ၊ နူစထိၚ်ဒက်လဝ်ဏံ စဵုကဵုလၟုဟ် သၟာဗၞိက်တံဂှ်လေဝ် ဟွံဂံၚ်ရာန်ဂၠိုၚ်ၚ် မွဲတဲဓဝ်ရပုဟ်။ ၚုဟ်သြောံလၟုဟ်တံဂှ်တှ်ေ စှ်ေအာကွေံကွေံ။ ၚုဟ်ဝါဲဓာတ်တံဂှ်လေဝ် မွဲသၞာံတုဲမွဲသၞာံ သၠုၚ်တိုန်ကၠုၚ်ဒၟံၚ်။ သၞာံဏံ သၠုၚ်နူသၞာံတုဲတေံ။ ၚုဟ်သြောံဂှ်တှ်ေ သၞာံဏံ အောန်နူသၞာံတုဲတေံ။ သၞာံတုဲတေံ အခိၚ်ဏံ ၚုဟ်သြောံဂှ် ၜိုတ် ၂၀ ကိုဋ်၊ ၂၂ ကိုဋ်နွံဏောၚ်။ လၟုဟ်ဂှ် ၁၃ ကိုဋ်ဟီုတှ်ေ ရဲကၠောန်ဗ္ၚဂမၠိုၚ် ဒှ်ဒဒိုက်ကွေံကွေံ” သာ်ဝွံ သ္ဂးရ။
သ္အာၚ်နူဂှ်ပၠန် အတိုၚ်ၚုဟ်သြောံကညၚ်လၟုဟ်ဂှ်မ္ဂး သၟာဗ္ၚဂမၠိုၚ်ဝွံ သာ်လဵုမှ ဂွံအာပရဲဟွံသေၚ်ရတုဲ နကဵုရဲညးသြောံတိတ်ဂၠိုၚ်တအ် ဂွံအာသြန်လုပ်ဗီုကၠာတေံ မာန်ကီုလေဝ် သွက်ညးသြောံတိတ်အောန်တအ်ဂှ်တှ်ေ ကျအောန်ကဵုဂၠိုၚ်ရ နွံဂှ် ညးဆက်ဟီုရ။
သၟာဗ္ၚမွဲတၠပၠန်ဂှ်တှ်ေ အတိုၚ်ၚုဟ်သြောံကညၚ်လၟုဟ်မ္ဂး အပ္ဍဲဒေသဂှ် ပရေၚ်သွံရာန်ရဂှ် ဟွံမွဲဒှ်ဒၟံၚ်တုဲ ပရေၚ်တဵုလွဳသြောံကညၚ်ပၠန်ဂှ်လေဝ် ဟွံဂွံဍာ်တုဲ သြောံလီုဂၠိုၚ်ဂှ်ရ အတိုၚ်ၚုဟ်ဏံရမ္ဂး အာလ္ပာ်ကျရနွံဂှ် ဟီုရ။
“ၚုဟ်သြောံဂှ် လၟုဟ်ဂွံမိၚ်မံၚ်ဂှ်တှ်ေ ပရေၚ်သွံရာန်ရဂှ် ဟွံမွဲပုဟ်။ သၞာံဏံ ဟိုတ်နူဒှ်တၚ်အခက်အခုဲကဵုဍာ်တုဲ ပရေၚ်ကျဗြံဂှ် နွံဂၠိုၚ်ဒၟံၚ်ဏောၚ်။ လ္ပာ်ပိုယ်ဏံ နူစဂြာတ် နူတဵုလွဳတေံဂှ်ရ ပွိုၚ်မွဲဂိတုတေၚ်ၚ် ဍာ်မွဲထၞဟ်ဟွံဂွံတုဲ တိကရောန်တုဲ ကှ်အာဟဂှ်ရ။ အဏံလေဝ် တၞံသြောံ ချိုတ် ဒးလေၚ်ဂှ်နွံ။ သြောံဂှ် ဒှ်အာသာ်လဵုရောဟီုတှ်ေ ဗီုထေၚ်လဝ်ဂှ် ဟွံဒှ်ကၠုၚ်ပုဟ်။ သြောံဂှ်လေဝ် သၞာံဏံ လီုဂၠိုၚ်တုဲ သၟာဗ္ၚတံဂှ်တှ်ေ ကျဒၟံၚ်သၟးရ” သာ်ဝွံ သ္ဂးရ။
သြောံကညၚ်လၟုဟ်ဏံဂှ်လေဝ် ၚုဟ်မပလုမ်ကီု ခရိတ်အိုတ်ကပေါတ်တမ်ကီု က္ဍၚ်ဒၟံၚ်တုဲ၊ ဂွံပၠောပ်ဍာ် ခရိတ်ကၠေၚ်စက် အိုတ်ဂၠိုၚ်သၟးဟွံက ဟိုတ်နူခရိတ်ဗၞိက် အိုတ်ဂၠိုၚ်တုဲလေဝ် ၚုဟ်ကၠောန်သွံကညၚ်ဂှ် သာတုဲအိုတ်ဂၠိုၚ်ဒၟံၚ်ရ။
သ္အာၚ်နူဂှ်ပၠန် ဟိုတ်နူသၞောတ်ယိုက်လျိုၚ်ပၞာန် ကံၚ်ဇြဳပၞာန်တုဲ ကောန်ကလောန်စိုန်သကီုဂမၠိုၚ် အောန်စှ်ေကၠုၚ်တုဲ တဵုလွဳဗွဲမစှ်ေကဵုသၞောတ် ဗီုကၠာတေံ ဟွံမာန်တုဲ သြောံတိတ်အောန်စှ်ေသၟးဟွံက ဟိုတ်နူစၟပလီုသြောံတုဲလေဝ် အခိၚ်ဍေံတိတ်အောန်ဒၟံၚ်ဂှ် ၚုဟ်သြောံဂှ်လေဝ် ဟွံဂွံခိုဟ်ဟ်တုဲ သၟာဗ္ၚဂမၠိုၚ် ထပ်တုဲဒှ်ဒၟံၚ်ဒဒိုက်ရ။
မွဲလ္ပာ်ဂှ်ပၠန် သ္ကိုပ်ဝန်ဇၞော်တွဵုရးဍုၚ်မန်ဂှ်တှ်ေ ညံၚ်ကဏ္ဍဝါဗ္ၚ အပ္ဍဲတွဵုရး ဂွံဖောအ်ဗြေဝ်တောတက်ဂှ် ဒမြိပ်သတ်ဍေံ ဂွံတိတ်ဂၠိုၚ်သၟးဟွံက ဗၞိက်ပ္တိတ်မၞုံကဵုဍာ်ဒကေဝ်ခိုဟ်တံဂှ် ကၠောန်ပ္တိတ်မာန်တုဲ ညံၚ်သၟာဗ္ၚဂမၠိုၚ် သြန်လုပ်ဂွံဂၠိုၚ်တိုန်ဂှ် ရေၚ်တၠုၚ်ဒၟံၚ်ဖိုဟ်ရောၚ် ဟီုကၠုၚ်လဝ် ပ္ဍဲသ္ဘၚ်ပအပ်သြန်ထံက်ပၚ် ကုခံက်ဝါကၠောန်သြောံကသီု မဒးလီုလာ်အာလဝ်ဂမၠိုၚ် မကၠောန်ဗဒှ်လဝ် ပ္ဍဲၝောံခန်တွဵုရး ပ္ဍဲဂိတုဨပရဴ ၈ တေံရ။
ဟိုတ်ဂှ်ရ နကဵုသၟာဗ္ၚဂမၠိုၚ် ဂ္စါန်ရေၚ်တၠုၚ်အာမ္ဂး ဍေံဒှ်ဖိုဟ် သွက်ဍုၚ်ကွာန်ဏောၚ်တုဲ ဘဝပရေၚ်မၞိဟ်ပရေၚ်ပိုန်ဒြပ်သၟာဗ္ၚတံလေဝ် သၠုၚ်တိုန်ကၠုၚ်ဏောၚ်ဂှ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန် မခါန်ကၞက်ပ္တိုန်လဝ်ဂှ် ဟီုလဝ်ကီုလေဝ် သောၚ်ကလးကဵု ဒဒိုက်သၟာဗ္ၚတံ နတဲစှ်ေစှ်ေ ဂှ် ဟွံမွဲရ။
ပ္ဍဲတွဵုရးဍုၚ်မန်ဂှ်တှ်ေ လၟေၚ်သၞာံ တဵုလွဳဒၟံၚ်သြောံကညၚ် ပွဳပွူ ၂ ဠက်ဨကတုဲ နကဵုဒေသဂှ်တှ်ေ ပ္ဍဲပွိုၚ်ဍုၚ်ၜဳကလေၚ်၊ ပွိုၚ်ဍုၚ်ပံၚ် ကေုာံ ပွိုၚ်ဍုၚ်သဓီုတံဂှ် တဵုလွဳဂၠိုၚ်အိုတ်တုဲ ပ္ဍဲပွိုၚ်ဍုၚ်သှ်ေတံဂှ်လေဝ် တဵုလွဳဒၟံၚ်ညိည နွံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ