ဘာအၚ်၊ ဨပရဴ ၁၃
တွဵုရးကရေၚ် လ္တူဍုၚ်ဘာအၚ်ဂှ် ၜိုန်ကံၚ်ဇြဳပၞာန်တွဵုရး ဟွံဒှ်ကၠောန် အတးသၚ်္ကြာန်သြၚ်ဗတဳကီုလေဝ် ပ္ဍဲကဵုဒၞါဲဂၠံၚ် (ချစ်သူလမ်းကြား) ဂှ်တှ်ေ ဆက်ကၠောန်ဗဒှ်အာ အတးသကြာန်ကွာန်ဂၠံၚ်ဏောၚ်ဂှ် ညးဒေသဘာအၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညံင်သ္ဘၚ်အတးသၚ်ကြာန်သၞာံဏံဂွံမိပ် ဂကောံကံၚ်ဇြဳပၞာန်တွဵုရးကရေၚ် စဳဇန်လဝ် သ္ဂောံကၠောန်အာ သ္ဘၚ်အတးသၚ်္ကြာန်သြၚ်ဗတဳ မၞုံယၟု (နန်းဖော့အွာ) လ္တူသြၚ်ဗတဳ ဗ္ဒါဲဖျာဗ္တံ ဂၠံၚ်ဇိုၚ်ၜဳ ဍုၚ်ဘာအၚ် ပွိုၚ်မွဲဂိတုကီုလေဝ် ဟိုတ်နူဘဲဒဏ်တိချဳ မက္တဵုဒှ်အာလဝ်ဂှ်တုဲ ဒးရုပ်သီလဝ်ရ။
အခိၚ်ဒးဒၟံၚ်ဘဲဒဏ်တိချဳသာ်ဏံဂှ် ပရေၚ်ဟီုဂးပါ်ပါဲ စပ်ကဵုကိစ္စမကၠောန်အာအတး ပ္ဍဲသြၚ်ဗ္တဳတံ ဂၠိုၚ်ကၠုၚ်တုဲဂှ် ဂကောံကံၚ်ဇြဳပၞာန်တွဵုရးဝွံ ကလေင်ပလီုထောံလဝ် အတးသၚ်္ကြာန်သြၚ်ဗ္တဳ (နန်းဖော့အွာ) ကီု သီုကဵုကၞာထးဗဟဵု မသိုၚ်လဝ် ပ္ဍဲ(သီရိကွင်း) ကဵု ကၞာထးဌာနမဆေၚ်စပ် အဃောမသိုၚ်ဒၟံၚ် ပ္ဍဲဂၠံၚ်ဇိုၚ်ၜဳတံဂှ်ရောၚ် တမ်ရိုဟ်ပရိုၚ်နူဘာအၚ်ဂမၠိုၚ် ဟီုရ။
သ္ဘၚ်အတးသၚ်္ကြာန်ကွာ်ဂၠံၚ်ဂှ် ဂကောံကံၚ်ဇြဳပၞာန်တွဵုရး ကၠောန်ဗဒှ်အာ ပ္ဍဲဂၠံၚ် (ချစ်သူလမ်းကြား) ဗ္ဒါဲကာန်တာယာ အရာပ်စၟတ် ၄ ဍုၚ်ဘာအၚ်ဏောၚ်တုဲ သွက်ဂွံကၠောန်ဗဒှ်သ္ဘၚ်အတးဂှ် အခိၚ်လၟုဟ် ဂကောံကံၚ််ဇြဳပၞာန်တွဵုရး ကၟာတ်လဝ်ဂၠံၚ်ဂှ်တုဲ ပလေဝ်ပလေတ်ဒၟံၚ်ရောၚ် ဂွံတီကေတ် ဇရေၚ်ညးဒေသတံရ။
ပ္ဍဲသ္ဘၚ်အတးသၚ်္ကြာန်ဂှ် ပရေၚ်ဗ္စဖျုၚ်ကၟုဲတံလေဝ် ပါလုပ်ရောၚ် ဒဒှ်ရဂွံမိၚ်ကေတ်ဂှ် ညးဒေသတံ ဟီုရ။
ဂွံကၠောန်ဗဒှ်အာ သ္ဘၚ်အတးသၚ်္ကြာန် မိပ်ပ်ဂှ် ဂကောံကံၚ်ဇြဳပၞာန်ဝွံ ပ္ဍဲဂိတုမာတ်တုဲကၠုၚ်တေံ မွဲမွဲသ္ၚိမ္ဂး ဗက်ကံက်ဒၟံၚ် အကြာအရာပ် ၅၀၀၀ ဒ္ကေဝ်ယျဂှ်လေဝ် ဂွံတီကေတ်ရ။
သ္ဘၚ်အတးသၚ်္ကြာန် သၞာံတုဲကၠုၚ်တေံဂှ် ဂကောံကံၚ်ဇြဳပၞာန်တွဵုရး ကၠောန်ကၠုၚ်လဝ် အတးသၚ်္ကြာန်ကွာ်ဂၠံၚ် ပ္ဍဲကဵုဂၠံၚ်ဇိုၚ်ၜဳ ဍုၚ်ဘာအၚ်ကီု သီုကဵုကၞာထးနူဌာနမဆေၚ်စပ်ဂမၠိုၚ် ပါလုပ်သီုကဵုကၞာထးဝေၚ်ဍာ်၊ ကၞာထးဗ္စဖျုၚ်ကၟုဲတံဂှ်တုဲ မၞိဟ်ကၠုၚ်စိုပ်ဂေတ်ဝေၚ်တံ နွံကၠုၚ်လဝ်ၜိုတ်ဒးရးရ။
ပ္ဍဲတွဵုရးကရေၚ် လ္တူဍုၚ်ဘာအၚ်ဂှ် ၜိုန်ကၠောန်ဒၟံၚ်သ္ဘၚ်အတးသၚ်္ကြာန်ကွာ်ဂၠံၚ်ကီုလေဝ် ပါဲနူကဵုဘဲဒဏ်တိချဳဂှ် ပရေၚ်ကြံၚ်မ္ၚိုဟ်ပရေၚ်ပၞာန် မက္တဵုဒှ်ဒၟံၚ်ကြပ်အလုံတွဵုရးမွဲ၊ စွံပွန်လ္တူညးသၟတ်တံတုဲ ရပ်ဒက်ကော်ကၠုၚ်ဒၟံၚ် သ္ဂောံကဵုလုပ်ပၞာန်တံဂှ်လေဝ် နွံဒၟံၚ်တုဲ ညးဒေသဗွဲမဂၠိုၚ်ဝွံ အတးသၞာံဏံဂှ် ဟွံအာစိုပ်ဂေတ်ဝေၚ်မွဲသာ် ကၠောန်သ္ပအာ ၜိုတ်အခိုက်အလေံရဏောၚ်ဂှ် ဟီုဒၟံၚ်ညးသ္ကအ် နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−MOI