လာန်ဒါန်၊ ဨပရဴ ၁၂
အခိၚ်ဗျိတိၚ်ကဵုဂျာမနဳ ဒစးဒုၚ်ပလေဝ်ပလေတ်ဒၟံၚ် သွက်ဂွံဒုၚ်တဲကၠောန်အာ ကောံဓရီုမွဲ ကၟိန်ဍုၚ် ၅၀ ဍုၚ် မပါလုပ် ပ္ဍဲဍုၚ်ဗရာတ်သေဲဂှ် ထပ်ကဵုအာ အရီုဗၚ်ပရေၚ်ပၞာန် သွက်ယူကရုၚ် ၄၅၀ ပြကောဋိကိုဋ် သတာလေန်ပံၚ်ဏောၚ် အလဵုအသဳလာန်ဒါန် လလောၚ်တြးလဝ်ရ။
ကဵုဇြဟတ်ဂရိုဟ် လ္တူသမ္မတရုယှာ ဗလာဒဳမာပူတေန်တုဲ ညံၚ်ဂွံဖအိုတ်ကၠေံ ပရေၚ်သၠိုၚ်လုပ်ၜက်ၜေတ် ယူကရုၚ်ဂှ် ဒဒှ်ရသၞာဲဒဴကာစဵုဒၞါဂမၠိုၚ် ကောံကလောံအာညးသ္ကအ်ဏောၚ်ဂှ် ဝန်ဇၞော်ကာစဵုဒၞါဗျိတိၚ် ဂျောန်ဟဳလေ ဟီုရ။
ဆက်ဗပေၚ်အာဇြဟတ် ပရေၚ်စဵုဒၞါယူကရုၚ်တုဲ သွက်ဂွံတာဒၞါ ပရေၚ်ရုယှာ မဂၠါဲသၞဗ္တိုက်ဒၟံၚ်ဂှ် ပိုယ်တံ သၠုၚ်ပ္တိုန်အသိၚ် ဒးရေၚ်တၠုၚ်အာဏောၚ်ဂှ် ဝန်ဇၞော် ဟဳလေ ဟီုဗပေၚ်လဝ်ရ။
ပ္ဍဲအရီုဗၚ်ပရေၚ်ပၞာန် နူဗျိတိၚ် မပအပ်ကဵုအာတံဂှ် ပွမကလေၚ်ပလေဝ် ဒရုၚ်၊ မာၚ်ပလီုကွဳစက်ခြပ်ပသဲ ကေုာံ ကွဳစက်ပၞာန်တံ ပါလုပ်ဂှ် ဂွံတီကေတ်ရ။
ဗျိတိၚ် ပအပ်ကဵုအာ ၃၅၀ ပြကောဋိကိုဋ် သတာလေန်ပံၚ်ဏောၚ်တုဲ သြန်ဗွဝ်တၞဟ်ဟ်တံဂှ်တှ်ေ ဍုၚ်နဝ်ဝေ ပအပ်ကဵုအာ နူကဵုသြန်ဗွဝ်ဍုၚ်သ္အာၚ် သၟဝ်သ္ကိုပ်သ္ကဗျိတိၚ်မွဲကဆံၚ်ဏောၚ် မဒှ်ရ။
ပ္ဍဲအစဳဇန်ဏံဂှ် သွက်ဂွံကလေၚ်ပလေဝ် ကေုာံ သွက်ဂွံထိၚ်ဒဝ် ကွဳစက်ပၞာန် နူကဵုဗျိတိၚ် မပလံၚ်ဗစိုပ်လဝ် ပ္ဍဲယူကရုၚ်ဂှ် သြန်သတာလေန်ပံၚ် ၁၆၀ ပြကောဋိကိုဋ်ပါလုပ်ဏောၚ် မဒှ်ရ။
ပ္ဍဲကဵုအရီုဗၚ်ပရေၚ်ပၞာန် ပရေၚ်ဗ္တိုက်ကြပ်ပ်ဂှ် သြန်ဗွဝ် သွက်သၞောတ်ရေဒါ၊ သွက်မာၚ်ပလီုကွဳစက်ခြပ်ပသဲ ကေုာံ သွက်ဒရုၚ် လၟိဟ်ဂၠိုၚ်ကဵုလ္ၚီမလေဝ် ပါလုပ်တုဲ ဒဒှ်ရၚုဟ်မးမၞုံ ၂၅၀ ပြကောဋိကိုဋ် သတာလေန်ပံၚ်ဂှ် အလဵုအသဳဗျိတိၚ် ဟီုရ။
နူကဵုဂကောံညးတံ မပ္တိတ်ကၠုၚ်ဇြဟတ်ဂှ်တှ်ေ ညံၚ်ယူကရုၚ် ဂွံဒှ်ဒၟံၚ်အကာဲအရာခိုဟ်အိုတ် ဒဒှ်ရပၟိက်ဇၞော်ဂှ် ဝန်ဇၞော်ကာစဵုဒၞါဗျိတိၚ် ဟီုရ။
သၞာံ ၂၀၂၅ ဝွံ သွက်ယူကရုၚ်ဂှ် ဒှ်သၞာံပၟိက်ဇၞော်မွဲဂှ်လေဝ် ဝန်ဇၞော် ဟဳလေ ဟီုရ။
ကြဴနူဗျိတိၚ် ထံက်ပၚ်ကဵုလဝ် အရီုဗၚ်ပရေၚ်ပၞာန် သွက်ယူကရုၚ် တၟာဂလိုၚ်တုဲဂှ် အရီုဗၚ်ပရေၚ်ပၞာန်သာ်ဏံ ထပ်မံက်တိတ်ကၠုၚ်ပၠန်ရ။
ဂိတုတုဲကၠုၚ်တေံ က္ဍိုပ်သ္ကိုပ်ယူရောပ်ဂမၠိုၚ် ကၠောန်ဗဒှ်လဝ်ကောံဓရီု ပ္ဍဲလာန်ဒါန်တုဲဂှ် သ္ကိုပ်ဝန်ဇၞော်ဗျိတိၚ် ကဳယာ သတာမာ လလောၚ်တြးကၠုၚ် တၚ်တုပ်စိုတ်ကမ်လှောဝ်မွဲ ကုယူကရုၚ် ၚုဟ်မးမၞုံ ၁ ဒဿမ ၆ ဗဳလျာန် သတာလေန်ပံၚ်ရ။
စပ်ကဵုပရေၚ်ဂီုကၠီုယူရောပ်တုဲ ကြဴနူအမေရိကာန် ဆုတ်ကလေၚ်အာတုဲဂှ် ဗျိတိၚ်သ္ကိုပ်သ္ကတုဲ ပ္တိတ်ဒၟံၚ်ဇြဟတ် သ္ဂောံရီုဗၚ် ယူကရုၚ်ရ။
Ref: BBC