ဝါယှေန်တာန်၊ ဨပရဴ ၁၃
ကြုက် ကလေၚ်ပလန်တဲတုဲ ကံက်ဂလိုၚ်ပ္တိုန်အာ အကံက်အခေါန် လ္တူကပေါတ်ဗၞိက်အမေရိကာန် ၁၂၅ တၟံကၠံဏောၚ် လလောၚ်တြးလဝ်တုဲဂှ် အခိၚ်ပေါဲပၞာန်ဗၞိက် သာသ္ကာတ်မြဟ်ကၠုၚ်ဂှ် သမ္မတဒဝ်နေဝ်ထြာမ်ဂှ်တှ်ေ မူဝါဒအခေါန်ဖလှာညး အကာဲအရာခိုဟ်တုဲ ဍေံတံဖိုဟ် သွက်အမေရိကာန် ကေုာံ သွက်ဂၠးတိဏောၚ်ဂှ် ပ္ဍဲဂိတုဨပရဴ ၁၁ တေံ ဟီုလဝ်ရ။
ဟိုတ်နူပရေၚ်ဒှ်ဓဝိၚ်ဂမၠိုၚ်တုဲ ပ္ဍဲဗွဝ်ဖျာသထံက်ယှေဝ်ယျာဂှ် ၚုဟ်နှေန် ကေုာံ ၚုဟ်ဒဝ်ဠာတံ စှ်ေဒၟံၚ်တုဲ အကြာကၟိန်ဍုၚ် ဇၞော်အိုတ်ပ္ဍဲပရေၚ်ပိုန်ဒြပ် လ္တူဂၠးတိဏံ ၜါဍုၚ် ပရေၚ်ဒိဓဗတ်ဆေၚ်မုက်တံ သာသ္ကာတ်မြဟ်ကၠုၚ်ဂှ် ဗေကျေန် ကလေၚ်ပလန်တဲတုဲ သၠုၚ်ပ္တိုန်လဝ်အသိၚ်တုဲ လိက်ကသုက် တိုက်သြန်အလဵုအသဳအမေရိကာန်လေဝ် ဒးဆေၚ်ဒၟံၚ်မုက်ကဵု ဇြဟတ်ဓရိုဟ်ရ။
ပ္ဍဲကဵုအရေဝ်ပရိုၚ် မထ္မံက်ထ္ၜးလဝ် ပ္ဍဲမဳဒဳယျာပရေၚ်မၞိဟ် ပ္ဍဲဂိတုဨပရဴ ၁၁ ဂှ် ထြာမ်ဂှ်တှ်ေ စပ်ကဵုမူဝါဒအခေါန်ဖလှာညးတံတုဲ ဒဒှ်ရညးတံ အကာဲအရာခိုဟ်ကၠုၚ်ဍာံဍာံဂှ် ဟီုလဝ်ရ။
ပ္ဍဲသတ္တာဟတုဲကၠုၚ်တေံ ထြာမ် ဟီုကၠုၚ်လဝ် ဒဒှ်ရကံက်ဂလိုၚ်ပ္တိုန်အာ အခေါန်ဖလှာ လ္တူဗၞိက်ပၠောပ် နူကဵုကၟိန်ဍုၚ်အလုံဂၠးမွဲဂှ်တုဲ လၟုဟ် ကလေၚ်ဆုတ်အာကီုလေဝ် ကံက်ဂလိုၚ်ပ္တိုန်အာအခေါန်ဖလှာ လ္တူကြုက်ဏောၚ်ဂှ် ထပ်သ္ပဒတန်လဝ်ရ။
ဆ္ဂး အကြာဝါယှေန်တာန်ကဵု ဗေကျေန် ပေါဲပၞာန်ဗၞိက်ဏံ အသိၚ်သၠုၚ်တိုန်ကၠုၚ်မာန်ရောၚ် ဟိုတ်နူပရေၚ်ဒှ်ဓဝိၚ်ဂမၠိုၚ်တုဲ ဗွဝ်ဖျာအလုံဂၠးမွဲ ဟွံတန်ကြန်ဒှ်အာရ။
စပ်ကဵုပရေၚ်ကြံၚ်မ္ၚိုဟ်ၜါဍုၚ် သၠုၚ်တိုန်ကၠုၚ်ဂှ်တုဲ ပ္ဍဲဂိတုဨပရဴ ၁၁ တေံ သမ္မတယှဳကျေန်ဖျေန် ဟီုကၠုၚ်လဝ် အလန်ကိုပ်ကၠာအိုတ်တုဲ နကဵုဍုၚ်ညးတံ ဒဒှ်ရဖေက်ဒၟံၚ်ဟွံသေၚ်ပုဟ်ဂှ် ဟီုလဝ်ဂှ် ဌာန်ပရိုၚ်ကၟိန်ဍုၚ်ပိုၚ်ဂမၠိုၚ် ထ္မံက်ထ္ၜးလဝ်ရ။
အပ္ဍဲကဵုပရေၚ်ဆဵုဂဗ ကုသ္ကိုပ်ဝန်ဇၞော်သပုၚ် ပက်ဒရိုဝ် သာန်ချက်ဂှ် နကဵုကြုက် ကေုာံ သမဂ္ဂယူရောပ်တံ ပံၚ်တောဲတုဲ ထေက်ကဵုဒးပလန်တဲ ကုအခိုက်အလေံ မလေပ်သ္ပမာန် ညးမွဲလ္ပာ်တံရောၚ်ဂှ် သမ္မတယှဳကျေန်ဖျေန် ဟီုရ။
ပရေၚ်ကြံၚ်မ္ၚိုဟ်ဂမၠိုၚ် သၠုၚ်တိုန်ဒၟံၚ်ကီုလေဝ် ဒးကေတ်တၚ်တုပ်စိုတ် စပ်ကဵုပရေၚ်သွံရာန်ဗၞိက် ကုယှဳကျေန်ဖျေန်ဂှ်ဏောၚ်ဂှ် ထြာမ် ဟီုလဝ်ရ။
အခေါန်ဖလှာ မစၞောန်ပျးလဝ် လ္တူဍုၚ်သ္အာၚ်တံဂှ် ထြာမ် ဒေါအ်ဇူလဝ် ပွိုၚ် ၉၀ တ္ၚဲတုဲ ယဝ်ရဟွံကေတ်တၚ်တုပ်စိုတ်ပရေၚ်သွံရာန်ဗၞိက်ဂှ်ပုဟ်မ္ဂး ကြဴနူတ္ၚဲစၟတ်လဝ်ဂှ်ပေၚ်မ္ဂး ကလေၚ်စၞောန်ပျးအာဏောၚ်ဂှ် ဘပဠလဝ်ရ။
Ref: AFP