မတ်မလီု၊ ဨပရဴ ၁၃
ပ္ဍဲတွဵုရးကရေၚ် ပွိုၚ်ဍုၚ်ဘာပန် ဍုၚ်ကမမံၚ် ပ္ဍဲဇိုၚ်ၜဳသၚ်လောန်ဂှ် သၟတ်ဗြဴ ၃ တၠ ဒးမာၚ်ကလိဂွံလဝ်ဝပ်ရောၚ် ကောန်ဂကောံရီုဗၚ်ပရေၚ်မၞိဟ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဨပရဴ ၁၀ အခိၚ်ဇိုၚ်သဝ်တ္ၚဲ ၜိုတ် ၅ နာဍဳဂှ် မဇြေန်မျာတ်နဝ် အာယုက် ၁၂ သၞာံ ဒၟံၚ်အရာပ် စၟတ် ၃၊ (မကြယ်စင်လင်းသန့်) အာယုက် ၁၇ သၞာံ၊ (မစင်သီတာသိမ့်) အာယုက်၁၂ သၞာံတံ ညးပိတၠဝွံ အခိၚ်အာစိုပ်ၜိၚ်ဍာ် ပ္ဍဲဇိုၚ်ၜဳသၚ်လောန် နွံဗ္ဒါဲအရာပ်ဂှ် လိုန်ဒးလဝ်မာၚ်ရောၚ် သ္ဂးရ။
ဒၞါဲမာၚ်ဗ္တိုဟ်ထ္ကးဂှ် ဒှ်ဒၞါဲမၞိဟ်အာကၠုၚ်ဂၠိုၚ်မွဲတုဲ ဒဒှ်ရမဇြေန်မျာတ်နဝ် လိုန်ဒးလဝ်မာၚ်ဂှ်ကီု၊ သၟတ်ဗြဴပါဗက်အာကရောံညးတေံၜါတၠဂှ်လေဝ် ဒးအာမာၚ်ကီုတုဲ မဇြေန်မျာတ်နဝ် မလိုန်ဒးမာၚ်ဂှ် ဒဒှ်ရကလိဂွံဝပ်ဂၠိုၚ်ဂှ် ကောန်ဂကောံရီုဗၚ်ပရေၚ်မၞိဟ်ဒေသမွဲတၠ ဟီုရ။
လိုန်ဒးမာၚ်တုဲ သၟတ်ဗြဴ ၃ တၠဝွံ သီုဇိုၚ်သီုတဲ ဒးအာလဝ်မာၚ် ကလိဂွံဝပ်တုဲ သၟတ်ဗြဴလိုန်ဒးမာၚ်ဂှ်ဝွံ ဒှ်ဒၟံၚ်အကာဲအရာ ဒးကုတ်ဇိုၚ်ဏောၚ်တုဲ ဒးပလံၚ်ပ္တိုန်လဝ် ရုၚ်ဂဥုဲညးဍုၚ်ကွာန်ပွိုၚ်ဍုၚ်ဘာအၚ်တုဲ ဒးလွဳလွတ်ဒၟံၚ်ရ။
ဗ္ဒါဲဍုၚ်ဘာပန်ဂှ် လ္ပာ်ကံၚ်ဇြဳပၞာန်ကီု လ္ပာ်ဒပ်ပံၚ်ကောံ KNLA ကီု ချဳဒရာၚ်ဒၟံၚ်ပရေၚ်ပၞာန် နွံတုဲ ဂကောံလ္ပာ်လဵု ပါံလဝ်မာၚ်ဂှ်ရောဟီုဂှ် ဟွံဂွံတီကေတ်ဏီပုဟ် သ္ဂးရ။
ဟိုတ်နူကောန်ၚာ်သၟတ်ဂမၠိုၚ် ဒးအာလဝ်မာၚ် ပ္ဍဲဒၞါဲမၞိဟ်အာကၠုၚ်ဂၠိုၚ်ဂှ်တုဲ ညးဒေသဂမၠိုၚ် ဂွံအာကၠုၚ် ပွဳပွူဗ္ဒါဲဍုၚ်ရဂှ် ဖေက်ဂၟံက်ဒၟံၚ်အိုတ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ