မတ်မလီု၊ ဨပရဴ ၁၃
ပ္ဍဲတွဵုရးဍုၚ်မန် အတးလောန်မ္ဂး ဂကောံသၟဝ်တဲကံၚ်ဇြဳပၞာန်တံ ကော်အာညးဗြဴဂမၠိုၚ် လုပ်ပၞာန်ဏောၚ် ဟိုတ်နူပရိုၚ်ဏံတုဲ ပရေၚ်ဒှ်ဓဝိၚ်တံ သၠုၚ်တိုန်ဒၟံၚ်ရောၚ် သၟတ်ဗြဴဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲဒေသလၟုဟ်ဂှ်တှ်ေ ဂကောံသၟဝ်တဲကံၚ်ဇြဳပၞာန်ဂမၠိုၚ် ပလေဝ်ပလေတ်ဒၟံၚ် အတးလောန်ဏံ သ္ဂောံစကော်အာညးဗြဴဂမၠိုၚ် လုပ်ပၞာန်ရောၚ် ပရိုၚ်သ္ပဒတန်ဟွံဂွံတံ မံက်တိတ်ဒၟံၚ်ရ။
ဟိုတ်နူပရိုၚ် ကော်အာညးဗြဴဂမၠိုၚ် သ္ဂောံလုပ်ပၞာန် သာ်ဏံဂှ်တုဲ အကြာသၟတ်ဗြဴ မတၞီလုပ်ပ္ဍဲအာယုက်လုပ်ပၞာန်ဂွံတံ ဒှ်ဒၟံၚ်ဓဝိၚ်ညးသ္ကအ် ဂၠိုၚ်ကၠုၚ်တုဲ ပလေဝ်ပလေတ်ဒၟံၚ် ဂွံအာစိုပ်ဍုၚ်သ္အာၚ်တံ နွံကၠုၚ်ရောၚ် ဂွံတီကေတ်ရ။
ညးဗြဴမွဲတၠဂှ်တှ်ေ ကံၚ်ဇြဳပၞာန် ဟိုတ်နူကော်ကၠုၚ်လဝ်မၞိဟ်တြုံဂမၠိုၚ် ဂွံလုပ်ပၞာန် အလန်ပထမကၠာအိုတ်ဂှ်တုဲ ဒးဒှ်လဝ်ဓဝိၚ်တုဲ အခါလၟုဟ် ကော်အာညးဗြဴဂမၠိုၚ် လုပ်ပၞာန်ဏောၚ် ဟိုတ်နူပရိုၚ်ဏံတုဲလေဝ် ဒးဂွိၚ်ဒၟံၚ်တုဲ ညးဗြဴဂမၠိုၚ်ဝွံ ကၠောန်ကမၠောန်ဍုန်ပုၚ်သွရလေပ်တုဲ ဒးတိုန်တန်ဗ္တောန်ကွတ်ပၞာန်ဏောၚ်ဟီုတှ်ေ ဍေံဟွံဒးဒၟံၚ်ပုဟ်ဂှ် ပါ်ပါဲလဝ်ရ။
“နူစကော်အာသီုညးဗြဴပိုယ်တံ လုပ်ပၞာန်ဏောၚ်ဟီုဂှ် အလန်ကၠာတေံ ကော်လဝ်မၞိဟ်တြုံ ဂွံလုပ်ပၞာန်။ အခိၚ်တေံလေဝ် ဒးဂွိၚ်ဒၟံၚ်။ လၟုဟ်ကော်ဒၟံၚ်ညးဗြဴတံဂှ်တှ်ေ ပိုယ်တံညးဗြဴတၠသ္ၚိတံတှ်ေ ဒးလုပ်ပါၚ်ဖဴသၟးရဏောၚ်၊ ဍုန်ပုၚ်ဍုန်သွ မုကၠောန်ကၠောန်ရ။ တုဲတှ်ေ ဒးတိုန်တန်ဗ္တောန်ကွတ်ပၞာန်ဏောၚ်။ တုဲတှ်ေ ဒးတိတ်မုက်ပၞာန်ဏောၚ်။ ဒးတိတ်ဗ္တိုက်ပၞာန်ဏောၚ်ဟီုတှ်ေ ဍေံဟွံဒးပုဟ်လေဝ်” သာ်ဝွံ သ္ဂးရ။
သ္အာၚ်နူဂှ်ပၠန် ကံၚ်ဇြဳပၞာန် ကျဒၟံၚ်ပၞာန် ပ္ဍဲကဵုပေါဲဗ္တိုက်အလုံဍုၚ်မွဲဂှ် ညံၚ်အဝဵုဍေံတံဂွံတန်ကြန်ဂှ် ဂြဲစုတ်ညးဗြဴတံ အပ္ဍဲပၞာန်ဂှ်ဝွံ ဒှ်ဟွံထေက်တုဲ သီုကဵုဝးပ္ကဝ်ဒၟံၚ် အခေါၚ်အရာညးဗြဴတံရောၚ် ညးဆက်ဟီုရ။
ညးဗြဴမွဲတၠပၠန်ဂှ်လေဝ် ကံၚ်ဇြဳပၞာန် ကော်အာညးဗြဴဂမၠိုၚ် သ္ဂောံလုပ်ပၞာန် ဟိုတ်နူပရိုၚ်ဏံတုဲ အပ္ဍဲဒေသ ဒးဒှ်ဒၟံၚ်ပလာပ်ပထုဲတုဲ ရဲဍုၚ်သ္အာၚ်တံ ၜက်ၜေတ်ကၠုၚ်ဟွံသေၚ်မွဲသာ် ဟိုတ်နူဒးစဵုဒၞါ သွက်မၞိဟ်မွဲဂကောံဓဝ်ရဂှ်ရ လုပ်ဟွံမာန်ပုဟ်ဂှ် ဟီုရ။
“သွက်ဂွံလုပ်ပၞာန်ဂှ် ဗက်ကော်ဒၟံၚ်မၞိဟ်တြုံ။ ဗက်ကော်ဒၟံၚ်မၞိဟ်ဗြဴဟီုတှ်ေ ပ္ဍဲဒေသပိုယ်တံဏံဂှ်လေဝ် ဒှ်ဒဒိုက်ကွေံကွေံဏောၚ်။ ဒှ်အခက်အခုဲကွေံကွေံဏောၚ်။ ပိုယ်တံဂှ် ဒးစဵုဒၞါဍုၚ်ကွာန်ဟွံသေၚ်ပုဟ်။ ဒးစဵုဒၞါ ဂကောံဍေံတံဏောၚ်။ ပိုယ်တံ ဒးစဵုဒၞါဍုၚ်ကွာန်ဏောၚ်ဟီုတှ်ေ ယဝ်ရဍုၚ်ညးမွဲသ္အာၚ် ကၠုၚ်ၜက်ၜေတ်ဏောၚ်ဟီုတှ်ေ ပိုယ်တံဒးသၠာဲကဵုလမျီုပိုယ်တံဟီုတှ်ေ ဒးစဵုဒၞါရဏောၚ်လေဝ်။ လၟုဟ်ဂှ် သွက်ဂွံစဵုဒၞါ ဂကောံဍေံတံမွဲဂကောံဓဝ်ဂှ် ပိုယ်တံ လုပ်ဟွံမာန်ပုဟ်လေဝ်” သာ်ဝွံ ဟီုရ။
ကံၚ်ဇြဳပၞာန် စကော်အာညးဗြဴဂမၠိုၚ်လုပ်ပၞာန်ဏောၚ် ဟိုတ်နူပရိုၚ်သ္ပဒတန်ဟွံဂွံဏံဂှ်တုဲ ညးဗြဴဂမၠိုၚ်ဝွံ အာကၠုၚ်ကွာ်ဂၠံၚ်ရဂှ် ဂီုကၠီုဟွံမွဲရတုဲ အခိၚ်ဟွံရုဲ ဒးဒုၚ်ပကောံကၠုၚ်သွက်ဂွံလုပ်ပၞာန်မာန်ဒၟံၚ်ရောၚ် ဒှ်ကၠုၚ်အကာဲအရာဏံဂှ် ညးဗြဴဂမၠိုၚ် ဟီုရ။
မွဲလ္ပာ်ဂှ်ပၠန် အတိုၚ်သၞောဝ်ယိုက်လျိုၚ်ပၞာန် ကံၚ်ဇြဳပၞာန် မကလေၚ်ပၠောပ်လဝ်လမျီုဂှ်မ္ဂး ညးဗြဴ နူအာယုက် ၁၈ စဵုကဵု ၂၇ ဂမၠိုၚ်ဝွံ ဒးယိုက်လျိုၚ်ပၞာန် အောန်အိုတ် နူ ၂ သၞာံ စဵုကဵု ၅ သၞာံဏောၚ် မဒှ်ရ။
သ္အာၚ်နူဂှ်ပၠန် ယဝ်ဒှ်အ္စာဂဥုဲ၊ အေန်ဂျေန်နဳယာ၊ ညးလေပ်ကွတ်စက်ကွတ်တဲ၊ ကေုာံ ယဝ်ဒှ်ညးဗြဴလေပ်လဝ်ကွတ်ပညာ ကေုာံ ကွတ်ဂယိုၚ်လမျီုမွဲမွဲမ္ဂး ယဝ်ဒှ်အာယုက် အကြာ ၁၈ ကဵု ၃၅ သၞာံမ္ဂး ဒးလုပ်ပၞာန်ဏောၚ်ဂှ် သ္ဂးရ။
ပ္ဍဲတွဵုရးဍုၚ်မန်ဂှ်တှ်ေ ကံၚ်ဇြဳပၞာန် ကြဴနူပၠောပ်ကၠုၚ်လမျီု သၞောဝ်ယိုက်လျိုၚ်ပၞာန်တုဲဂှ် လၟေၚ်ဂိတု ကဵုဒၟံၚ်တန်ဗ္တောန်ကွတ်ပၞာန်တုဲ စဵုကဵုဂိတုမာတ်တုဲကၠုၚ်တေံ ကဵုလဝ်တန်ဗ္တောန်ကွတ်ပၞာန် စဵုကဵုလၟေၚ် ၁၁ တုဲ ပ္ဍဲကဵုဏံ ညးဗြဴဂမၠိုၚ် ပါလုပ်လဝ် ဟွံမွဲဏီပုဟ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−MOI