နေဗျဳဒဝ်၊ ဨပရဴ ၁၃
နကဵုကံၚ်ဇြဳပၞာန်သီအဝဵု အခိၚ်ကာလအတးဏံကဵု အတးလောန်တေံ ညံၚ်ဟွံဂွံထပ်ဒးဗလးကၠေံဍုၚ်တံဂှ် ၜိုတ်ပၞာန်ဒုၚ်သၟးရ ကၠောန်ကၠုၚ်ဗွဲအဓိကမာန်ရောၚ် ညးခါတ်အကာဲပရေၚ်ပၞာန်ဂမၠိုၚ် သ္ၚဳဂၠိပ်လဝ်ရ။
ပ္ဍဲဂိတုမာတ် ၂၈ တေံ ကသဳတိဇြဟတ်မၞုံ ၇ ဒဿမ ၇ ရေတ်တာသကေ သ္ပဗဟဵုကဵုဍုၚ်သက်ကိုၚ်တုဲ မချဳဇတဝ်အာလဝ်ဂှ်ဝွံ ဂအုပ်ရုၚ်ပၞာန် ပ္ဍဲနေဗျဳဒဝ် မပါလုပ် စမြိုၚ် ပ္ဍဲဌာန်ဂအုပ်ပၞာန်ရး ကေုာံ တမ်ဒပ်လ္ၚဵုတံဂှ် သရိုဟ်စှ်ေလီုလာ်အာလဝ်ရ။
ဒှ်သာ်ဂှ်ရ ဌာန်ဂအုပ်ကံၚ်ဇြဳပၞာန် စပ်ကဵုပရေၚ်ပၞာန်ဂမၠိုၚ် မ္ဒးဇီုကပိုက်အာဂှ်တုဲ သွက်ဂွံကလေၚ်ဂေတ်မာန်ဂှ် ကေတ်အခိၚ်တုဲ ဒးပလေဝ်ပလေတ်ဏောၚ်ကီု၊ ရုၚ်စက် ကပစ မကၠောန်ပ္တိတ်ဒၟံၚ်ဗုမ်လ္ၚဵုတံဂှ်လေဝ် ဒးဇီုကပိုက်လဝ် မဒှ်ရောၚ် အကြာပ်ဒပ်ဇၞော် ဇြေယျ သ္ပလဝ်ဇြဳဒဳအာမ် နူကဵုဒပ်ကျာ ဟီုရ။
“ဍေံတံ ရန်တၟံလဝ်အဓိကဂှ်တှ်ေ ကၠာရာသဳဗြဲကျာတၟးဏံဟွံအိုတ် လ္ပာ်လာယှိုဝ်၊ လ္ပာ်ရးသေံသ္ကုတ်သၟဝ်ကျာ၊ လ္ပာ်ကရေၚ်ဍာဲတံဏံဂှ်တှ်ေ ဍေံတံဂွံကလေၚ်ကၠောန်ချိုတ်တ်ပၠိုတ်တ်ဂှ် ရန်တၟံလဝ်နွံ။ ဆ္ဂး အခိၚ်လၟုဟ် အကာဲအရာလၟုဟ်ဂှ်တှ်ေ လ္ပာ်ဍေံတံ ဂွံထ္ပက်ပၞာန်ဂှ် ပ္ဍဲနေဗျဳဒဝ် အခိၚ်ဍေံတံဒှ်ဒၟံၚ်ဒဒိုက်ဂှ် လ္ပာ်ဏံ( ဂကောံပၠန်ဂတးဂမၠိုၚ်) ညံၚ်ဟွံဂွံထ္ပက်ကၠုၚ်ပၞာန်မာန် ညံၚ်ဟွံဂွံထပ်သီဍုၚ်တံမာန်ဂှ် ဒှ်ဒၟံၚ်အကာဲအရာ ပၞာန်ဒုၚ်သၟးရ ဍေံတံကၠောန် အဓိကမာန်ဏောၚ်။ ဂွံကၠောန်ဗီုဏံရမာန်။ နူတမ်တေံ ဍေံတံကၠတ်ချပ်လဝ် ကၠောန်မတေံ မဏံဂှ် နွံ။ အရာတံဏံဂှ် ဒှ်ဒၟံၚ်အကာဲအရာ ဒှ်ဟွံမာန်ရဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် လာၚ်ဇြဟတ်ဓာတ် မဆက်စၠောံလဝ် ကုရုၚ်စက် ကပစလ္ၚဵုတံဂှ်လေဝ် ဒးဒုၚ်ထပိုတ်လဝ်တုဲ ညံၚ်ဂွံကၠောန်ပ္တိတ်မဗုမ် သ္ဂောံရပ်စပ်အာ သွက်ပရေၚ်ဗ္တိုက်ပၞာန်ကျာတံမာန်ဂှ် ဒှ်ကၠုၚ်အခက်အခုဲမာန်ရောၚ် ညးဆက်ဟီုရ။
အခိၚ်လၟုဟ်ဂှ်တှ်ေ ကံၚ်ဇြဳပၞာန်ဝွံ ရန်လဝ် သ္ဂောံကၠောန်အာ ကမၠောန်ကလေၚ်ဖျေံဒၞါဲဝါဲ သွက်တိချဳ နကဵုအသိၚ်အလိုန်မာန်ဂှ်တုဲ နူဂိတုဨပရဴ ၂ စဵုကဵု ၂၂ ဂှ် လလောၚ်တြးလဝ် ကာလဒေါအ်ပန်ပှော် ဗွဲယာယဳရ။
ဆ္ဂး ထောံမံၚ်မခတိုဟ် လ္တူဍုၚ်လ္တူကွာန်ဂမၠိုၚ် နူကဵုပၞာန်ကျာကီု၊ ပန်ပှော်ကဵုလွဟ်ဇၞော်၊ ထ္ပက်ဒၟံၚ်ကရောၚ်ပၞာန်တံဂှ်တုဲ က္တဵုဒှ်ဒၟံၚ်ပေါဲဗ္တိုက်ဆေၚ်မုက် ကုဂကောံပၠန်ဂတးလ္ၚဵုတံလေဝ် နွံဒၟံၚ်ပၠန်ရ။
ဒံက်တာ သဳရိမန်ဆာန် ဥက္ကဌ ကမ္မတဳက္ဍိုက်ပ် ပရေၚ်ဍုၚ်ကွာန်ပရေၚ်ပၞာန် ဒပ်စဵုဒၞါဍုၚ်မန် MSDF ဂှ်လေဝ် ဒပ်တိုက်ကံၚ်ဇြဳပၞာန် ဇြဟတ်မဍိုန်လျဒၟံၚ်ဂှ်ဝွံ ဂွံထ္ပက်ပၞာန်ဗလးတိ ဇရေၚ်ဒေသပၠန်ဂတးတံဂှ် ဒှ်ဟွံမာန်ပုဟ်ဂှ် သ္ၚဳဂၠိပ်လဝ်ရ။
“ ဇြဟတ်ဒပ်တိုက် ကံၚ်ဇြဳပၞာန် မဍိုန်လျကၠုၚ်ဒၟံၚ် ဇၞော်ကဵုဇြဟတ်ဂှ်ကဵု ဟိုတ်နူအစောံဇြဟတ်ဗ္တိုက်ဒပ်တိုက်ဍေံတံဂှ်တုဲ ဂွံထ္ပက်ပၞာန် ဇရေၚ်ဒေသပၠန်ဂတး ပါလုပ်သီုကဵုဂကောံရပ်လွဟ်ကောန်ဍုၚ်အရၚ် မဘပဠဒၟံၚ် ကံၚ်ဇြဳပၞာန်တံဂှ် ကြပ်ကၠောန်ဟွံမာန်ပုဟ်။ အခိၚ်ဗြဲဂှ်လ္ပဟီုဏီ ပ္ဍဲရာသဳဗြဲကျာတၟးရဂှ် ပၞာန်ထ္ပက်ကံၚ်ဇြဳပၞာန်တံ ကၠောန် ဗွဲမစိုပ်တရဴဟွံမာန်ပုဟ်။ ဇြဟတ်ပၞာန်ရီုဗလးတိဂှ်လေဝ် ပလံၚ်လဝ် ဗွဲမစိုပ်တရဴဂှ် ဟွံမာန်ပုဟ်” သာ်ဝွံ သ္ဂးရ။
မွဲလ္ပာ်ဂှ်ပၠန် နကဵုကံၚ်ဇြဳပၞာန် ပတှ်ေကေတ်လွဟ်ဒရုၚ်ဂတာပ်ခေတ် နဲပညာဒရုၚ် မဂွံနၚ် နူကဵုကြုက်၊ ရုယှာတံဂှ်တုဲ သာတုဲထောံမခတိုဟ်ဗ္တိုက်ကၠုၚ် နူကဵုမှဲအကးတံမာန်ရောၚ် ညးဆက်ဟီုရ။
ပရေၚ်ပၞာန်တရဴကျာ ဒပ်ကံၚ်ဇြဳပၞာန်ဂှ်လေဝ် စိုပ်ကာလဗြဲမ္ဂး သုၚ်စောဲဒရုၚ် ကေုာံ က္ဍိုၚ်ကျာစုတ်လဝ်စက်တံ ဂွံဟွံသေၚ်တုဲ ပရေၚ်ထောံမခတိုဟ် နူကဵုက္ၜၚ်ကျာဂှ်လေဝ် ဒှ်ကၠုၚ်ကဵုသၞောတ်ဗ္ၜတ်ဏောၚ်ဂှ် ညးခါတ်အကာဲပရေၚ်ပၞာန်ဂမၠိုၚ် ထံက်ထ္ၜးလဝ်ရ။
ခြာဟွံလအ်ဏံ စိုပ်ကၠုၚ်ဗြဲမုဟ်သုန်ဏောၚ်ဂှ်ရ လ္ပာ်ဂကောံပၠန်ဂတးတံ အုပ်ဓလီုဂွံတိဍာ် နွံမာန်တုဲ စိုပ်ရာသဳဗြဲကျာတၟးမှဟေၚ် လ္ပာ်ကံၚ်ဇြဳပၞာန် ကလေၚ်ထ္ပက်ကၠုၚ်ပၞာန်မာန်ဏောၚ်ဂှ် အကြာပ်ဒပ်ဇြေယျ သ္ပလဝ်ဇြဳဒဳအာမ်ဂှ် ဟီုရ။
ကံၚ်ဇြဳပၞာန်ဂှ်တှ်ေ ရန်လဝ် သွက်ဂွံကၠောန်ဗဒှ်အာပေါဲရုဲမာဲ နဒဒှ်ပၞောန်တိတ်ပရေၚ်ဍုၚ်ကွာန် ပ္ဍဲဂိတုဒဳဇြေမ်ဗာ သၞာံဏံတုဲ ညံၚ်တိဍာ်အုပ်ဓလီုဂွံလဝ်တံ ထပ်ဟွံဒးဆောံလေၚ် ကေုာံ သွက်ပရေၚ်ညိၚ်ဝတ်တံဂှ် ပလေဝ်ကၠုၚ် လ္ပာ်ပရေၚ်ပၞာန်တံမာန်ရောၚ် ညးခါတ်အကာဲပရေၚ်ပၞာန်တံ သ္ၚဳဂၠိပ်လဝ်ရ။
တုဲကၠုၚ်တ္ၚဲအကြာတံဏံဂှ်လေဝ် ဒပ်ပံၚ်ကောံ ဒပ်ပၞာန်စဵုဒၞါညးဍုၚ်ကွာန် PDF တံ သီဂွံလဝ် ဍုၚ်အေန်ဒဝ် ရးသက်ကိုၚ်ဂှ်တုဲ နကဵုကံၚ်ဇြဳပၞာန် ဒးဆောံလေၚ်လဝ်ဍုၚ် ဒၞါဲဌာန်ဂအုပ်မုက်ပၞာန် ၝောံဒပ် ၇၇ ရ။
ပရိုၚ်−သြၚ်လောန်တိုၚ်(မ်)
ဗီု−CJ