ကြုၚ်ဒဵု၊ ဨပရဴ ၁၈
အခိၚ်လၟုဟ် ပ္ဍဲပွဳဗွိုၚ်ကွာန်ကရပ်ဍုၚ်ကြုၚ်ဒဵုတံဂှ် ကံၚ်ဇြဳပၞာန် ဗ္တိုက်ဒၟံၚ်နကဵုယာန်ကျာသၟးဟွံက ဗ္တိုက်ကၠုၚ်ဒၟံၚ် သီုကဵုလွဟ်ဇၞော် ဟွံပိုတ်သ္ကုတ်ဂှ်ရ နကဵုညးဍုၚ်ကွာန်ဂမၠိုၚ် သွက်ဂွံအာကၠုၚ်မံၚ်စံၚ်တန်တဴ နကဵုသတိပၞာန်နွံနွံဂှ် ဗော်ဍုၚ်မန်တၟိ AD ဖ္တိုက်ဖ္အောဝ်လဝ်ရ။
ပ္ဍဲဂိတုဨပရဴ ၁၅ တေံ ကံၚ်ဇြဳပၞာန် ဗ္တိုက်ထောံဖျေံဗမ် ပ္ဍဲကွာန်ကအ်ဗိုတ် ပွိုၚ်ဍုၚ်ကအ်ကြိက် တွဵုရးကရေၚ် နကဵုပၞာန်ကျာဂှ်တုဲ ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP-AD လလောၚ်ပ္တိတ်လဝ်လစွံစိုတ် ပ္ဍဲဂိတုဨပရဴ ၁၇ တေံရ။
ကံၚ်ဇြဳပၞာန် စွံပွန်ဗ္တိုက်ဒၟံၚ် စမြိုၚ်ဘုတ်ဘာ၊ ဘာဗ္တောန်လိက် ကေုာံ ရုၚ်ဂဥုဲဂမၠိုၚ်တံဂှ်တုဲ နကဵုညးဍုၚ်ကွာန် မၞုံကရပ်ဇိုၚ်ဝုတ်ဒိုဟ်ဍုၚ်ကြုၚ်ဒဵုတအ်ကီု သီုကဵုညးဍုၚ်ကွာန်နူဒေသတၞဟ်ဟ်တံလေဝ် သွက်ဂွံစွံသတိအိုတ်ဂှ် ဖ္တိုက်ဖ္အောဝ်လဝ်ရ။
ပေါဲဗ္တိုက်က္တဵုဒှ်ဟွံမွဲမွဲသာ် ပ္ဍဲဂိတုဨပရဴ ၁၅ ၜိုတ် ၁၂ နာဍဳဂှ် ကံၚ်ဇြဳပၞာန် ထောံလဝ်မခတိုဟ်ဗ္တိုက်လဝ် ဘာလကျာ် ကွာန်ကအ်ဗိုတ်ကဵု သ္ၚိပွဳပွူဗ္ဒါဲဂမၠိုၚ်တုဲ ပ္ဍဲပွဳဗွိုၚ်ကွာန်ကရပ်တံဂှ်လေဝ် ဗ္တိုက်ကၠုၚ်လဝ် အဆက်က်ကီုရ။
ဟိုတ်နူပရေၚ်ဗ္တိုက်ပၞာန်ကျာတုဲ ကောန်ၚာ်မၞုံအဝဲ ပိသၞာံ ၂ တၠကဵု ညးအာယုက်ဇၞော် မပါလုပ်အပံၚ် ညးဍုၚ်ကွာန် တြဴတၠ မ္ဒးအိုတ်အာလမျီုတုဲ ခမဳသၚ် ဟွံအောန်နူဒ္စိတ်ဇကု ကေုာံ ညးဍုၚ်ကွာန်ကောန်အရာပ်တြဴတၠ ဒးအာလဝ်ဝပ်ရ။
သ္အာၚ်နူဂှ်ပၠန် ညးဍုၚ်ကွာန်ကောန်အရာပ်ဂမၠိုၚ် ဗွဲတၟေၚ် ညးအာယုက်ဇၞော်၊ ညးဗြဴ ကေုာံ ကောန်ၚာ်တအ်လေဝ် မ္ဒးပါဲဒဴဒၟံၚ်ဘဲပၞာန်အိုတ်တုဲ သွက်ဂွံရေၚ်တၠုၚ်ကဵု အရီုဗၚ်ပရေၚ်ဗ္စာရဏာမၞိဟ်တံဂှ် ဗော်ဍုၚ်မန်တၟိ AD ဖ္တိုက်ဖ္အောဝ်လဝ် ကုဂကောံဍုၚ်သ္အာၚ်ဂမၠိုၚ်ကဵု ဂကောံမှာဇန်မန်တံရ။
သွက်ညးဒးဘဲပၞာန် ပ္ဍဲကာလပြဟ်ဟ်ဏအ် ဂွံဂွံအရီုဗၚ်ပရေၚ်မၞိဟ်ဂှ် သွာၚ်ကမၠောန်ရီုဗၚ်ပရေၚ်မၞိဟ် နူ NMSP-AD လေဝ် ၜိုတ်သၟဟ်အစောံ ကဵုအာအရီုဗၚ်ဏောၚ်ဂှ် သ္ဂးရ။
လုကဴကံၚ်ဇြဳပၞာန် ကေမ်ၛာပ်လဝ်အဝဵုဏီမ္ဂး နကဵုညးဍုၚ်ကွာန်မှာဇန်တအ်လေဝ် မ္ဒးဆဵုဂဗအာဒၟံၚ် ပရေၚ်ဒဒှ်မတုပ်သၟဟ်ကဵုတ္ၚဲဏံဏီရောၚ်။ သွက်ဘဝညးဍုၚ်ကွာန်တအ် ဂွံဂီုကၠီုသိုက်သၠိၚ်တုဲ သ္ဂောံဒက်ပ္တန်အာ ဗွိုၚ်မၞိဟ်မၞုံကဵုပရေၚ်တုပ်သၟဟ်မာန်ဂှ် ကံၚ်ဇြဳပၞာန် မဒှ်သၞဗွဝ်ဏအ် သ္ဂောံသရိုဟ်စှ်ေအာမာန် စိုပ်ကၠုၚ်အခိၚ်အလုံကောန်ဂကူမန်ပိုယ်သီုဖအိုတ် မ္ဒးပံၚ်တောဲ ကၠောန်အာကမၠောန်မွဲစွံဂွံရရောၚ် သာ်ဝွံ ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
သွက်ဂွံစဵုဒၞါအာ ညးဍုၚ်ကွာန်တအ်မာန်ကီု၊ အခေါၚ်ကံကုသိုလ်မန် ညံၚ်ကောန်ဂကူမန်တအ် ဂွံဖန်ဖက်ကေတ်မာန်ကီုဂှ် သၟတ်မန် ကေုာံ အလုံညးဍုၚ်ကွာန်မန်တအ် ပံၚ်တောဲကု ဗော်ဍုၚ်မန်တၟိ AD တုဲ သ္ဂောံလုပ်အာပေါဲဗ္တိုက်မွဲစွံဂှ် ဂကောံက္ဍိုက်ပ်ပရေၚ်ပၞာန် ပရေၚ်ဍုၚ်ကွာန် ကော်ဘိက်လဝ်ရ။
ပရိုၚ်−သြၚ်လောန်တိုၚ်(မ်)
ဗီု− CJ