မိုဝ်ကုတ်၊ ဨပရဴ ၁၈
ၜိုန်ရက္ဍိုပ်သ္ကိုပ်ပၞာန် ဟီုမံၚ် ပ္တိတ်ဒၟံၚ်ဇြဟတ် ညံၚ်ဂွံဂွံပရေၚ်ၜိုဟ်လလမ် မတန်အာအဓာန်ဇမၠိၚ် မဍာံပြဂှ်ကီုလေဝ် ပ္ဍဲတ္ၚဲသၞာံတၟိမံက်ဂှ် ပေါဲဗ္တိုက်ဟွံဒှ်မွဲသာ် ဒပ်ကံၚ်ဇြဳပၞာန် ထောံဂြာတ်ကၠုၚ်မခတိုဟ် ပ္ဍဲဒေသလ္ၚဵုတံဂှ်တုဲ ပရေၚ်ဇီုကပိုက်ချိုတ်တံ နွံဒၟံၚ်ရောၚ် ဂွံတီကေတ် ဇရေၚ်ညးဒေသတံရ။
ပ္ဍဲဂိတုဨပရဴ ၁၇ အခိၚ်နူဂယး ၜိုတ် ၈ နာဍဳဂှ် ပ္ဍဲတွဵုရးကရေၚ် ပွိုၚ်ဍုၚ်ကအ်ကြိက် ပ္ဍဲကွာန်ဂြိုပ်ကြုက်ဂှ် က္တဵုဒှ်ပေါဲဗ္တိုက်ဟွံမွဲမွဲသာ် ဒပ်ကံၚ်ဇြဳပၞာန် ဟိုတ်နူထောံကၠုၚ်မခတိုဟ်ဗ္တိုက်ကၠုၚ်တုဲ မၞိဟ်တြုံမွဲတၠ ချိုတ်တုဲ ကောန်ၚာ်သၟတ်မွဲတၠ ဇီုကပိုက်ကလိဂွံလဝ်ဝပ်ရ။
လအာတုပ်သာ်ဂှ်ကီု အခိၚ်နူဂယး ၁၀ နာဍဳဂှ်လေဝ် ဒပ်ကံၚ်ဇြဳပၞာန် ကၠုၚ်ထောံလဝ်မခတိုဟ်မွဲမ နကဵုဂျက်ဖိုက်တာ ပ္ဍဲကဵုတိဍာ်ဒပ်တအာၚ် TNLA ထိၚ်ဒက်လဝ် သ္ကုတ်ဗၟံက်ဍုၚ်မိုဝ်ကုတ် ပ္ဍဲကွာန် (ကဆုတ်) ရ။ စပ်ကဵုမခတိုဟ်ဒတုံဗ္တိုဟ်ထ္ကးအာဂှ်တုဲ ကလေၚ်ပ္တိုန်ထ္ၜးအာကဵု အကာဲအရာဒးဇီုကပိုက်တံဏောၚ်ဂှ် TNLA လလောၚ်ပ္တိတ်လဝ်ပရိုၚ်ရ။
ဒပ်ကံၚ်ဇြဳပၞာန်ဝွံ နူဂိတုဨပရဴ ၂ စဵုကဵု ဂိတုဨပရဴ ၂၂ ပွိုၚ် ၂၀ တ္ၚဲဂှ် ဒေါအ်လဝ်ပန်ပှော်ကီုလေဝ် ပ္ဍဲတိဍာ် TNLA ထိၚ်ဒက်လဝ်ဂှ် ဗပေၚ်ဇြဟတ်ပၞာန်၊ ထ္ပက်ပၞာန် ကေုာံ ဒၞါဲပေါဲဗ္တိုက်ဟွံဒှ်တံဂှ်လေဝ် ထောံကၠုၚ်မခတိုဟ် နကဵုပၞာန်ကျာတံရောၚ် TNLA သ္ဂး၇။
က္ဍိုပ်သ္ကိုပ်ပၞာန်ဂှ်တှ်ေ ဂွံပတုဲဒှ်ကၠေံ ပဋိပက္ခက္တဵုဒှ်ဒၟံၚ်လၟုဟ်ဏံ သွက်ဂွံသောၚ်ကလး ပြဒ္ဒညာပရေၚ်ဍုၚ်ကွာန် နကဵုနဲကဲပရေၚ်ဍုၚ်ကွာန်ဂှ် ကော်ဘိက်လဝ်တုဲ ဂကောံကောန်ထံၚ်ပရေၚ်ဍုၚ်ကွာန်တံ သွက်ဂွံပံၚ်တောဲပါလုပ်ကဵုဂှ် ဟီုလဝ် ပ္ဍဲဂလာန်ဆက်မိတ်ကၠောံသၞာံတၟိရ။
ဆ္ဂး နတဲဂှ်တှ်ေ ဒပ်ကံၚ်ဇြဳပၞာန်ဝွံ စွံပွန် ကုဒၞါဲညးဍုၚ်ကွာန်အာကၠုၚ်ဂၠိုၚ်၊ စမြိုၚ်ဂမၠိုၚ်၊ ဘာဗ္တောန်လိက်၊ ရုၚ်ဂဥုဲဗ္ဒမ်ဂဥုဲ၊ ဘာလကျာ်တံဂှ်တုဲ ထောံမခတိုဟ်ဗ္တိုက်ကၠုၚ် နူကဵုပၞာန်ကျာတံဂှ် ကၠောန်ကၠုၚ်ဒၟံၚ်အဆက်က်ရ။
ပရိုၚ်−သြၚ်လောန်တိုၚ်(မ်)
ဗီု−PSLF/TNLA