ဂျဳနဳဗာ၊ ဨပရဴ ၁၈
ဟိုတ်နူကသဳတိ ဇြဟတ်မၞုံ ၇ ဒဿမ ၇ ရေတ်တာသကေ မချဳဇတဝ်အာလဝ် ပ္ဍဲဂိတုမာတ် ၂၈ တေံဂှ်တုဲ ပ္ဍဲဍုၚ်ဗၟာ ဒၞါဲဒေသဇီုကပိုက်ဂိအိုတ်တအ်ဂှ် ပရေၚ်လီုလာ် မတုပ်သၟဟ်ကဵု လျိုၚ်တာန် ၂ ဒဿမ ၅ ပြကောဋိကိုဋ် သွက်လၟိဟ်ယာန်ဖ္ဍိုက်ဗၞိက် ၁၂၅၀၀၀ မ ဒဒှ်ရက္တဵုဒှ်အာလဝ်ဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ကုလသမဂ္ဂ ဂိတုဨပရဴ ၁၄ တေံရ။
ညးဒေသ နူကဵုဒၞါဲပၞိဟ်တိချဳ ရးသက်ကိုၚ်၊ ရးမာန္တလေဝ်၊ နေဗျဳဒဝ်၊ မဂွဵု ကေုာံ တွဵုရးသေံတအ်ဂှ်ဝွံ ဒးမံၚ်ဒၟံၚ် အကြာစမြိုၚ် မလီုလာ်သရိုဟ်စှ်ေအာလဝ် လောန်ကၠုၚ် ၂၀ တ္ၚဲတေံဖိုဟ် မဒှ်ရ။
ညးစၞးစပ်ကဵုဍုၚ်ဗၟာ ကိုန်စဳမာန်ပရေၚ်ဖောအ်ဗြေဝ် ကုလသမဂ္ဂ UNDP တဳတောန် မေတ်ထရာဂှ် ဟီုကၠုၚ်လဝ် အပ္ဍဲလၟေၚ်တရဴ ညးမအာစိုပ်လဝ်ဍုၚ်သက်ကိုၚ်ဂှ် ဒဒှ်ရ ညးဂွံညာတ်ကေတ်လဝ် လၟိဟ်မၞိဟ် ဗၞတ် ၆၀၀၀၀ ဒးမံၚ်ဒၟံၚ် သၟဝ်ဒၞါဲမံၚ်ယာယဳတအ်ဖိုအ် မဒှ်ရ။
သ္ၚိမၞိဟ်ဒၟံၚ်ကေုာံ စမြိုၚ်အလဵုအသဳ ၁၀၀၀၀ ပြၚ် ဒးဇီုကပိုက်လီုလာ်အာလဝ် ပရေံပရေံတုဲ စမြိုၚ်ပရေၚ်ထတ်ယုက် ဟွံအောန်နူ ၁၂၈ မ ဒးလီုအာလဝ်ရောၚ် တဳတောန် ညးစၞးကုလဂှ် ဟီုရ။
သွက်ဂွံရီုဗၚ်ကဵု ညးဍုၚ်ကွာန်ဍုၚ်ဗၟာ မ္ဒးဘဲကသဳတိ လၟိဟ် ၁ ဒဿမ ၁ ပြကောဋိကိုဋ်ဂှ် ကုလသမဂ္ဂ အာတ်မိက်လဝ် အရီုဗၚ်နူဍုၚ်သ္အာၚ် ၂၇၅ ပြကောဋိကိုဋ် ဒဝ်ဠာအမေရိကာန်ရ။
ဟိုတ်နူဘဲကသဳတိတုဲ သ္ၚိမၞိဟ်ဒၟံၚ် ၄၈၈၃၄ မ၊ ဘာလကျာ် ကေုာံ ဘာသဳလ ၃၀၉၄ မ၊ ဘာဗ္တောန်လိက် ၂၀၄၅ မ၊ ရုၚ် ကေုာံ စမြိုၚ် ၂၁၇၁ မ၊ ဒဒန် ၁၄၈ တၞုၚ်၊ ကျာ်စေတဳ ၅၂၇၅ လီုအာလဝ်ရောၚ် ကံၚ်ဇြဳပၞာန် ဟီုလဝ်ရ။
ၚုဟ်လိၚ်စက်တုက်တိ သွက်ဂွံၚးတးပသောၚ် စမြိုၚ်မလီုအာ ဟိုတ်နူတိချဳတံဂှ်လေဝ် သၠုၚ်တိုန်ဒၟံၚ် ကဵုဆရောၚ် ဂွံတီကေတ်ရ။
Ref: DVB