ကျာ်ထဝ်၊ ဨပရဴ ၁၉
က္ဍိုပ်သ္ကိုပ်ပျူသဝ်ထဳ မပါလုပ် ဂြောဝ်ဂတာညး ဗ္ဒါဲ ၅၀ တၠ နူကဵုပွိုၚ်ဍုၚ်ညံၚ်လေဝ်ပေန် ကၠုၚ်ဝေၚ်ဍာ် ပ္ဍဲဍာ်လဂေါဝ်(ကဒက်ချောၚ်း) ပ္ဍဲဇိုၚ်ဒဵုကျာ်ဣသိယဵု ပွိုၚ်ဍုၚ်ကျာ်ထဝ် တွဵုရးဍုၚ်မန်ဂှ် ရပ်ဒက်လဝ်ရောၚ် ညးတာလျိုၚ် PDF ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဨပရဴ ၁၅ တေံ က္ဍိုပ်သ္ကိုပ်ပျူသဝ်ထဳ ဥူလှိုၚ်မေန်၊ ဒုက္ဍိုပ်သ္ကိုပ်ပျူသဝ်ထဳ ကိုဝ်မေဝ်ကျဳတံမပါလုပ် ကောန်ဇာတ်ဂြောဝ်ဂတာညးတံ ၄၈ တၠ နူကဵုပွိုၚ်ဍုၚ်ညံၚ်လေဝ်ပေန်ဂှ် ဂကောံစဵုဒၞါညးဍုၚ်ကွာန် ပွိုၚ်ဍုၚ်ကျာ်ထဝ် ဂွံပရိုၚ်တုဲ အာစိုပ်ရပ်ဒက်လဝ် ပ္ဍဲကဵုဆေၚ်စသုၚ်မွဲ နွံပ္ဍဲ(ကဒက်ချောၚ်း) ဂှ်ရ။
က္ဍိုပ်သ္ကိုပ်ပျူသဝ်ထဳ ရပ်ဒက်လဝ်ဂှ်ကီု သီုကဵုဂြောဝ်ဂတာညးတံသီုဖအိုတ်ဂှ် စၟဳတ်သၟာန်သၟုက်ဒၟံၚ်တုဲ ခြာဟွံလအ် လလောၚ်ပ္တိတ်ကဵုအာတၚ်နၚ် ဗွဲလစှ်ေတံဏောၚ်ဂှ် ညးဒုၚ်တာလျိုၚ် ဒပ်စဵုဒၞါညးဍုၚ်ကွာန် ခရိုၚ်သဓီု ကိုဝ်အေန်မေန်ထောန် ဟီုရ။
အတိုၚ်လိက်ပရိုၚ်ကံၚ်ဇြဳပၞာန်တြးဝါဒ ထ္မံက်ထ္ၜးလဝ်ဂှ်မ္ဂး ညးဒးဒုၚ်ရပ်လဝ်ဂမၠိုၚ်ဝွံ ဒှ်ညးကၠုၚ်လ္ၚောဝ်ကျာ်ဣသိယဵုတုဲ ပ္ဍဲကဵုဏံ မၞိဟ်တြုံ ၂၃ တၠကဵု မၞိဟ်ဗြဴ ၂၅ တၠ ပါလုပ်ရောၚ် သ္ဂးရ။
ပ္ဍဲကဵုညးဒးဒုၚ်ရပ်ဂမၠိုၚ် ၄၃ တၠဂှ် ပ္ဍဲဂိတုဨပရဴ ၁၆ တေံ နူကဵုကွာန်ဝေန်ကာန် ပွိုၚ်ဍုၚ်ကျာ်ထဝ်ဂှ် ရပ်ကော်ဏာလဝ် လ္ပာ်ပွိုၚ်ဍုၚ်ယှိုဲကျေန် ရးဗဂေါတုဲ မၞိဟ်တြုံမသုန်တၠဂှ်တှ်ေ ပါ်ပ္တိတ်တုဲရပ်ကော်ဏာလဝ်ရောၚ် ထ္မံက်ထ္ၜးလဝ်ရ။
အတိုၚ်ဂလာန်ညးဒေသတံဂှ်မ္ဂး ဍာ်လဂေါဝ်(ကဒက်ချောၚ်း) ဒၞါဲကောန်ဇာန်ဂြောဝ်ဂတာပျူသဝ်ထဳဂမၠိုၚ် ဒးဒုၚ်ရပ်လဝ်ဂှ်ဝွံ ကဵုသၞေဟ်ကွဳစက်တိုန်ဒဵုကျာ်ဣသိယဵု ဒပ်ကံၚ်ဇြဳပၞာန် မကေတ်လဝ်ဂီုကၠီုဂှ်ကဵု ဗ္ဒိုပ်ဗၠာဲသၟိၚ်တိဍာ်ကေန်မန်ချံၚ်တံဂှ်မ္ဂး ခြာဒၟံၚ် ၜိုတ်ဘာ်မိုၚ်ဓဝ်ရ ဟွံပေၚ်ပုဟ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ