မတ်မလီု၊ ဨပရဴ ၁၉
လ္ဂောံကဵုမဟာဗျူဟာပရေၚ်ပၞာန်တုဲ သွက်ဂွံဝေၚ်အာပၞာန်ထ္ပက်ဇၞော်မွဲ အလုံဍုၚ်မွဲဂှ် ပလေဝ်ပလေတ်ဒၟံၚ် ကုဂကောပၠန်ဂတးမဟာမိတ်တံဂှ် ဥူယဳမန် ဝန်ဇၞော်ကာစဵုဒၞါ အလဵုအသဳညဳသၟဟ်ဂကူ NUG ကဵုသမ္တီဟီုကၠုၚ်လဝ်ရ။
ညးဟီုကၠုၚ်လဝ် နူကဵုလပှ်ကျာ ပ္ဍဲကဵုအသေအဟာန်စှ်ေတန်ဗ္တောန်ကွတ်ပၞာန်သ္ဇိုၚ် လၟေၚ် (၅) ၊ ဗျူဟာ စၟတ် (၂၉) ၊ ဌာနပၞာန်ရး (ဧရာဝတီ)၊ တိဍာ်ပရေၚ်ပၞာန် စၟတ် (၂) ၊ ဒေသပၞာန်သ္ကုတ်သၠုၚ်ကျာ၊ ဒပ်ပၞာန်စဵုဒၞါညးဍုၚ်ကွာန် မကၠောန်ဗဒှ်လဝ် ပ္ဍဲဂိတုမာတ် ၂၅ တေံရ။
နကဵုဒပ်ပၞာန်စဵုဒၞါညးဍုၚ်ကွာန် NUG ဒးတတ်ထ္ပာ် မဟာဗျူဟာပၞာန် (၃) ကဆံၚ်တုဲ ကဆံၚ်ပထမဂှ်တှ်ေ အလုံဍုၚ်မွဲ ညံၚ်ဂွံချဳဒရာၚ်ပၞာန်ပေၚ်ၚ်မာန်ဂှ် ဒးပ္တိတ်ဇြဟတ်ဏောၚ် ဥူယဳမန် သ္ဂးရ။
အခါလၟုဟ် ဇၟာပ်ဒေသ ပရေၚ်ဒက်ပ္တန်ဒပ် ကေုာံ ပရေၚ်တြးဒပ်ကေတ်ဒၞါဲတံဂှ်ဝွံ တုဲဒှ်အာ ဒဵုဗ္ၜတ်မွဲမွဲယျတုဲ နဒဒှ်ကဆံၚ်ဒုတိယဂှ်တှ်ေ ထ္ပက်မဟာဗျူဟာပၞာန်တုဲ ဒးဝေၚ်ပေါဲဗ္တိုက်သီဍုၚ်သီဗ္ဒိုပ်တံဏောၚ်တုဲ ကောန်သ္ဂံၚ်လၟုဟ်ဂမၠိုၚ် ဒးတတ်ထ္ပာ်ကဆံၚ်ဏံရောၚ် ဟီုရ။
နဒဒှ်ကဆံၚ်တတိယဂှ်တှ်ေ အလုံဍုၚ်မွဲ ဂွံဝေၚ်ပၞာန်ထ္ပက်ဇၞော်မွဲရနွံတုဲ ဒပ်ပၞာန်စဵုဒၞါညးဍုၚ်ကွာန်ကဵု ဂကောံပၠန်ဂတးမဟာမိတ်တံဝွံ ပ္တိတ်ဒၟံၚ်ဇြဟတ် သွက်အရာဏံဂှ် ကဵုလဝ်သမ္တီရ။
သ္အာၚ်နူဂှ်ပၠန် ပ္ဍဲအရာထ္ပက်ပၞာန်ဇၞော်ဂှ် ဒေသတ္ကအ်ဂမၠိုၚ်ဝွံ ပါလုပ်အာ နဒဒှ်မုက်ပၞာန်ပၟိက်ဇၞော်မွဲဏောၚ်ဂှ် ဥူယဳမန် ဟီုလဝ် ပ္ဍဲသ္ဘၚ်စှ်ေတန်ဗ္တောန်ကွတ်ပၞာန်သ္ဇိုၚ်တံဂှ်ရ။
ပ္ဍဲဂိတုမာတ် ၈ တေံဂှ်လေဝ် ပ္ဍဲကဵုလိက်သဝဏ် မပလံၚ်ဗစိုပ်လဝ် ဇရေၚ်သ္ဘၚ်စှ်ေတန်ဗ္တောန်သ္ကိုပ်ဒပ် မသ္ဂောံကောပ်ကာဲအာက္ဍိုပ် ကုဒပ်ပၞာန်စဵုဒၞါညးဍုၚ်ကွာန် လၟေၚ် (၁/၂၀၂၄) ဂှ်လေဝ် ညးဟီုလဝ် လအာတုပ်သာ်ဂှ်ကီုရ။
PDF ၊ ပကဖ ကေုာံ ဂကောံပၠန်ဂတးမဟာမိတ်သီုဖအိုတ် ပံၚ်တောဲပါလုပ်တုဲ မုက်ပၞာန်ညးကဵုညး နကဵုဇြဟတ်ဂၠိုၚ်ကဵုလ္ၚီဠက် သွက်ဂွံဝေၚ်ပၞာန်ထ္ပက်ဇၞော်မွဲ နဗ္ၜတ်အလုံဍုၚ်မွဲ မဒှ်ရ။
ညးခါတ်အကာဲပရေၚ်ပၞာန်တံဂှ်တှ်ေ အိုဿီုကဵုဂကောံဇြဟတ်ပၠန်ဂတးဂမၠိုၚ် ဂွံထပိုတ်ရိုဟ်ကၞက် သၞောတ်တၠအဝဵုပၞာန် ဗွဲမညဳသာမာန်ဂှ် မွဲဂကောံကုမွဲဂကောံ နကဵုပရေၚ်ဆက်စၠောံနွံနွံ သွက်ဂွံဗ္တိုက်အာ မွဲအခိၚ်ဓဝ်ဂှ် နွံပၟိက်မံၚ်ယျရောၚ် ထံက်ထ္ၜးလဝ်ရ။
ပ္ဍဲကဵုဂကောံပၠန်ဂတးမဟာမိတ် NUG တံဂှ် ဗော်သွးကောန်ဂကူကရေၚ် KNU ၊ ဒပ်ပၠတရဴကောန်ဂကူချေၚ် CNF ကေုာံ ဗော်တောတက်ကောန်ဂကူကရေၚ်ဍာဲ KNPP တံ ပါလုပ်အဓိကတုဲ ကဵုဂကောံရပ်လွဟ်ကောန်ဍုၚ်အရၚ်တၞဟ်သ္အာၚ်တံဂှ်လေဝ် ပံၚ်တောဲဒၟံၚ်လ္ပာ်ပရေၚ်ပၞာန်တံ နွံဒၟံၚ်ရ။
ပ္ဍဲကာလပၠန်ဂတးဂှ် နကဵုအလဵုအသဳညဳသၟဟ်ဂကူ NUG နွံပၟိက်သ္ဂောံဂွံတၚ်တုပ်စိုတ် ကုကောန်ဍုၚ်အရၚ်သီုဖအိုတ်မွဲတုဲ ဂွံဒက်ပ္တန်ဓဝ်ပတှ်ဂှ်ေလေဝ် နွံပၟိက်ဂှ် ထံက်ထ္ၜးဒၟံၚ်တံ နွံဒၟံၚ်ပၠန်ရ။
အခိၚ်လၟုဟ် ကောန်ဂကောံဒပ်စဵုဒၞါညးဍုၚ်ကွာန် PDF တံဝွံ ပ္ဍဲဒေသကောန်ဍုၚ်အရၚ်တံ မပါလုပ် ပ္ဍဲကဵုရးဒေသဇၞော် ဒၞါဲချဳဒရာၚ်သၞောတ်တၠအဝဵုပၞာန်ခိုဟ်တံဂှ် ပံၚ်တောဲလုပ်မံၚ်ပေါဲဗ္တိုက် ကုဂကောံရပ်လွဟ်ကောန်ဍုၚ်အရၚ် မဆက်စပ်ဒၟံၚ်တံရ။
ပရိုၚ်−သြၚ်လောန်တိုၚ်(မ်)
ဗီု−NUG/PDF