ကအ်ကြိက်၊ ဨပရဴ ၁၉
တွဵုရးကရေၚ် ဍုၚ်ကအ်ကြိက် သ္ကုတ်သၟဝ်ကျာကဵု မွဲဒမြိပ်ဂၠံၚ်အာယှ ကြုၚ်ဒဵု−ကအ်ကြိက်ဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတး သၟဝ်သ္ကိုပ်သ္က KNLA တံဂှ် ပေါဲဗ္တိုက်ၜါလ္ပာ် ဆက်သ္ကာတ်မြဟ်ဒၟံၚ်ရောၚ် ဂွံတီကေတ် ဇရေၚ်တမ်ရိုဟ်ပရိုၚ်ဒေသတံရ။
ပ္ဍဲကဵုကွာန်ဂမၠိုၚ် နွံမွဲဒမြိပ်ဂၠံၚ်အာယှ ကြုၚ်ဒဵု−ကအ်ကြိက် ဗ္ဒါဲဍုၚ်ကြုၚ်ဒဵုကဵု မွဲဒမြိပ်ဗ္ဒိုပ်ကံၚ်ဇြဳပၞာန် ဗ္ဒိုပ်(ရၚ်ကွဲတောၚ်) နူကွာန်မျပတိုၚ် သ္ကုတ်သၟဝ်ကျာကအ်ကြိက်တံဂှ် စနူတ္ၚဲအတးစှ်ေတေံရ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတး သၟဝ်သ္ကိုပ်သ္က KNLA တံ ဒှ်လဝ်ပေါဲဗ္တိုက်ၜါလ္ပာ် ဗွဲမသ္ကာတ်မြဟ်ရ။
ပေါဲဗ္တိုက် မစကၠုၚ်လဝ် နူဂိတုဨပရဴ ၁၄ တေံ မွဲမဒြိပ်ဂၠံၚ်အာယှ ကြုၚ်ဒဵု−ကအ်ကြိက်ကဵု ပွဳဗွိုၚ်ဗ္ဒိုပ် (ရၚ်ကွဲတောၚ်) သ္ကုတ်သၟဝ်ကျာကအ်ကြိက်ဂှ်ဝွံ စဵုကဵုစိုပ်ကၠုၚ်ဂိတုဨပရဴ ၁၈ ဂှ် ပေါဲဗ္တိုက်ၜါလ္ပာ် ဆက်သ္ကာတ်မြဟ်ဒၟံၚ်ဖိုဟ်တုဲ ဒပ်ကံၚ်ဇြဳပၞာန် ရပ်စပ်ပၞာန်ကျာ၊ လွဟ်ဇၞော်၊ ဒရုၚ်တုဲ စွံပွန်ပ္တဝ်ကၠုၚ်က္ဍိုပ် လ္တူကွာန်ဂမၠိုၚ်တုဲ ဗ္တိုက်ကၠုၚ်လဝ်ရ။
အပ္ဍဲအခိၚ်ကာလအတးဏံ ကွာန်နွံဗ္ဒါဲဍုၚ်ကြုၚ်ဒဵုဂမၠိုၚ် ကေုာံ ကွာန်နွံမွဲဒမြိပ်ဂၠံၚ်အာယှ ကအ်ကြိက်−ကြုၚ်ဒဵု မပ္တံကဵုကွာန် (လေးတိုင်၊ နွားခြံကုန်း၊ ငါးတိုင်၊ အင်းကြီး၊ ကော့ဝါးလယ်၊ အုန်းတပင်၊ ကမ်းနီ၊ သရက်တော၊ ရေပူ) ကေုာံ ကအ်ကြိက်သ္ကုတ်သၟဝ်ကျာ မပ္တံကဵုကွာန် (မြပတိုင်၊ ကော့ကလောင်)၊ ကအ်ကြိက်သ္ကုတ်သၠုၚ်ကျာ မပ္တံကဵုကွာန် (ကျိုက်သလိုက်၊ လန်ဖား၊ သုံးဆယ်သုံးဆူ၊ ဒေါက်ပရံ) တံဂှ် ဒပ်ကံၚ်ဇြဳပၞာန် ထောံမံၚ်မခတိုဟ်ဗ္တိုက်ဒၟံၚ် အရိုဟ်ဒဒှ်တ္ၚဲရ။
ဟိုတ်နူဒပ်ကံၚ်ဇြဳပၞာန် ဗ္တိုက်ထောံဂြာတ်မခတိုဟ်နကဵုက္ၜၚ်ကျာ၊ ပန်ကဵုလွဟ်ဇၞော်၊ ပန်ဖျေံကဵုဒရုၚ်တံဂှ်တုဲ အပ္ဍဲအခိၚ်ကာလအတးဏံ နူကဵုကွာန် နွံကရပ်ဍုၚ်ကြုၚ်ဒဵုတံဂှ် ညးဍုၚ်ကွာန်ဒေသ ဗ္ဒါဲ ၂၀ တၠ ပါလုပ်သီုကဵုညးမၞုံကဵုဂဝ်ဂၞဴ၊ ကောန်ၚာ်သၟတ် ကေုာံ ညးအာယုက်ဇၞော်ဇၞော်တံဂှ် လမျီုဒးအိုတ်အာတုဲ ဟွံအောန်နူ ၂၂ တၠ ဇီုကပိုက်ကလိဂွံလဝ်ဝပ်ရောၚ် ဒပ်ပံၚ်ကောံပၠန်ဂတးတံကဵု တမ်ရိုဟ်ပရိုၚ်ဒေသတံ သ္ဂးလဝ်ရ။
သီုကဵုပေါဲဗ္တိုက်ၜါလ္ပာ်ဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ထောံကၠုၚ်မခတိုဟ်နကဵုပၞာန်ကျာတံဂှ်တုဲ ညးဍုၚ်ကွာန်ကောန်အရာပ်ဒေသ ဗွဲမဂၠိုၚ်ဂၠေၚ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံတုဲ ပ္ဍဲကဵုကွာန်လ္ၚဵုတံဂှ်လေဝ် ကောန်အရာပ်ဂမၠိုၚ် ဟွံဂွံအခေါၚ်တိတ်တုဲ အာကၠုၚ်ဟွံဂွံ ကၟာတ်ဒးဒၟံၚ်အပ္ဍဲကွာန်တံ နွံဒၟံၚ်ရောၚ် ဂွံတီကေတ်ရ။
သွက်ညးဍုၚ်ကွာန်ဒးဘဲပၞာန် မ္ဒးထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ဂမၠိုၚ်ဂှ် နွံပၟိက်ဒၟံၚ်ကဵု အရီုဗၚ်ပရေၚ်မၞိဟ်ဂမၠိုၚ်တုဲ သွက်ဂွံရီုဗၚ်ဟံၚ်ပြာ်ပ္တိတ် ကုညးဍုၚ်ကွာန် နွံဒၟံၚ်အပ္ဍဲကွာန် နူကဵုတိဍာ်ဒှ်ဒၟံၚ်ပေါဲဗ္တိုက်တံဂှ်လေဝ် နွံပၟိက်ဒၟံၚ်ဂှ် ညးဒေသတံ သ္ဂးရ။
ပ္ဍဲကဵုကွာန် ပွဳဗွိုၚ်ကရပ်ဍုၚ်ကြုၚ်ဒဵု ပေါဲဗ္တိုက်ဒှ်ဒၟံၚ်လၟုဟ်တံဂှ် စနူဂိတုဨပရဴ ၁၈ အခိၚ်နူဂယးဂှ်တုဲ လာၚ်ဖုၚ်ပိုတ် က္တဵုဒှ်အာလဝ်တုဲ ၜိုတ်လ္တူဍုၚ်ကြုၚ်ဒဵုသၟးရ ဂွံဒၟံၚ်လာၚ်ဂှ်လေဝ် ညးဒေသတံ ကဵုလဝ်သမ္တီရ။
အပ္ဍဲပေါဲဗ္တိုက်ကြုၚ်ဒဵု ကအ်ကြိက် လအ်ကၠုၚ်ပွိုၚ်မွဲသတ္တာဟဂှ် ဒပ်ကံၚ်ဇြဳပၞာန် ထောံဒၟံၚ်မခတိုဟ်ဗ္တိုက်ဒၟံၚ် နကဵုက္ၜၚ်ကျာ လၟေၚ်ဒဒှ်တ္ၚဲတုဲ နူကဵုဗလးတိဂှ်လေဝ် ထပ်ဗပေၚ်ဇြဟတ် ကၠောန်ဒၟံၚ်ဂှ် ဂွံတီကေတ် ဇရေၚ်တမ်ရိုဟ်ပရိုၚ်ဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ