ကျာ်ထဝ်၊ ဨပရဴ ၂၂
အပ္ဍဲပေါဲဗ္တိုက် က္တဵုဒှ်လဝ် ပ္ဍဲပွိုၚ်ဍုၚ်ကျာ်ထဝ်ကဵု ပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ် ၜါလ္ပာ် ဇီုကပိုက်ချိုတ်တံ နွံလဝ်ရောၚ် ဒပ်ပၠန်ဂတး ဖျေံသ္ဇိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ်ပ္ဍဲဂိတုဨပရဴ ၂၀ အခိၚ်နူဂယး ၜိုတ် ၁၁ နာဍဳဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံ ဒှ်လဝ်ပေါဲဗ္တိုက်ၜါလ္ပာ် ဗ္ဒါဲဂၠံၚ်ကွဳစက်လ္ဂုၚ်−မတ်မလီု ကွာန်အၚ်္ဂဗိုဝ် ပွိုၚ်ဍုၚ်ကျာ်ထဝ်ရ။
အပ္ဍဲပေါဲဗ္တိုက်ဏံဂှ် လ္ပာ်ဒပ်ပံၚ်ကောံ ဂကောံဇြဟတ်ပၠန်ဂတးတံ ကောန်သ္ဂံၚ်မွဲတၠ ပြဟ်လလုဲအာလဝ်တုဲ မွဲတၠ ကလိဂွံလဝ်ဝပ်တုဲ လ္ပာ်ကံၚ်ဇြဳပၞာန်ဂှ်လေဝ် ဟွံအောန်နူပိတၠ ဇီုကပိုက်ကလိဂွံလဝ်ဝပ်ရ။
သ္အာၚ်နူဂှ်ပၠန် ပ္ဍဲဂိတုဨပရဴ ၂၁ အခိၚ်နူဂယးဂှ်လေဝ် အကြာဒပ်ကံၚ်ဇြဳပၞာန် မမၚ်တောပ်ဗ္တိုက်ဒၟံၚ် အကြာကွာန်အလူလေဝ်ကဵု ကွာန်တပျေနဳ ပွိုၚ်ဍုၚ်ၜဳကလေၚ်ဂှ်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံဂှ် ဒှ်လဝ်ပေါဲဗ္တိုက်ၜါလ္ပာ်ရ။
အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် လလအ်ပွိုၚ်ဘာ်နာဍဳဂှ် လ္ပာ်ကံၚ်ဇြဳပၞာန် တြဴတၠ ချိုတ်တုဲ မၞိဟ်ဇီုကပိုက်ကလိဂွံလဝ်ဝပ်တံလေဝ် နွံဂှ် ကောန်သ္ဂံၚ်ပါလုပ် ပ္ဍဲပေါဲဗ္တိုက်ဗလးတိဂမၠိုၚ် ဟီုရ။
ဟိုတ်နူပေါဲဗ္တိုက်ၜဳကလေၚ်တုဲ ဂၠံၚ်ကွဳစက်လ္ဂုၚ်−မတ်မလီု အာကၠုၚ်ဟွံဂွံဒှ်အာလဝ် ပွိုၚ်မွဲနာဍဳပြၚ်တုဲ အခိၚ်လဒေါဝ်တ္ၚဲဂှ် ကလေၚ်အာကၠုၚ်ဒၟံၚ် အတိုၚ်တြေံယျဂှ် ဂွံတီကေတ် ဇရေၚ်ညးဒေသတံရ။
ပ္ဍဲပွိုၚ်ဍုၚ်ကျာ်ထဝ်ကဵု ပွိုၚ်ဍုၚ်ၜဳကလေၚ် ပရေၚ်ပၞာန်ၜါလ္ပာ် မကလေၚ်ကြံၚ်မ္ၚိုဟ်ဒၟံၚ်ဂှ် ဒပ်ကံၚ်ဇြဳပၞာန် ထံၚ်ကၠုၚ်ဒၟံၚ်ပရိုၚ် နကဵုက္ၜၚ်ကျာ ကြပ်အရိုဟ်ဒဒှ်တ္ၚဲတုဲ ဆက်ပန်ပှော်ဒၟံၚ်ကဵုလွဟ်ဇၞော်ရ။
ပရိုၚ်−သြၚ်လောန်တိုၚ်(မ်)
ဗီု−CJ