ကအ်ကြိက်၊ ဨပရဴ ၂၂
ဒပ်ပံၚ်ကောံပၠန်ဂတးတံ ဟိုတ်နူဗိုၚ်လဝ် ပွဳဗွိုၚ်ကရပ်ဍုၚ်ကြုၚ်ဒဵုကဵု ဍုၚ်ကအ်ကြိက် တွဵုရးကရေၚ် ပေါဲဗ္တိုက်ၜါလ္ပာ် မသ္ကာတ်မြဟ်ဒၟံၚ်ဂှ်တုဲ နူဍုၚ်မတ်မလီု၊ ဘာအၚ်ဂှ်မွဲကဆံၚ် ဒပ်ကံၚ်ဇြဳပၞာန် ထပ်ပလံၚ်ဗစိုပ်ဒၟံၚ် ဇြဟတ်ဒပ်ဂမၠိုၚ်ရောၚ် တမ်ရိုဟ်ပရိုၚ်အပ္ဍဲဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပပ္တံနူဂိတုဨပရဴ ၁၄ တုဲ မွဲဒမြိပ်ဂၠံၚ်ကွဳစက် ကြုၚ်ဒဵု−ကအ်ကြိက် ဗ္ဒါဲဍုၚ်ကြုၚ်ဒဵုဂှ်ကဵု ဍုၚ်ကအ်ကြိက်ဂေတ်ကၠောံဂှ် အကြာဒပ်ပံၚ်ကောံပၠန်ဂတး သၟဝ်သ္ကိုပ်သ္က KNLA ကဵု ဒပ်ကံၚ်ဇြဳပၞာန်တံဂှ် ပေါဲဗ္တိုက်ၜါလ္ပာ် က္တဵုဒှ်လဝ် ဗွဲမသ္ကာတ်မြဟ်တုဲ စဵုကဵုဂိတုဨပရဴ ၂၁ လအ်ကၠုၚ်ပွိုၚ်မွဲသတ္တာဟဂှ် ပေါဲဗ္တိုက်ၜါလ္ပာ် ဆက်သ္ကာတ်မြဟ်ဒၟံၚ်ရ။
ဒပ်ပံၚ်ကောံပၠန်ဂတး KNLA ဗ္တိုက်သီဂွံလဝ် ဗ္ဒိုပ်ဒပ်ကံၚ်ဇြဳပၞာန် နွံဒၟံၚ်ပ္ဍဲဂၠံၚ်တိတ်ဍုၚ်ကအ်ကြိက် နူဂၠံၚ် ၉ တိုၚ် စဵုကဵုကရပ်ဍုၚ်ကြုၚ်ဒဵု ၄ တိုၚ် ပါလုပ်သီုကဵုဗ္ဒိုပ်( ရၚ်ကွဲတောၚ်) ဗ္ဒါဲကွာန်မျပတိုၚ် ဍုၚ်ကအ်ကြိက် သ္ကုတ်သၟဝ်ကျာဂှ်တုဲ အုပ်ဓလီုကေတ်လဝ်ဒၞါဲ မွဲဒမြိပ်ဂၠံၚ်ဏံမာန်ယျဂှ် တမ်ရိုဟ်ပရိုၚ်အပ္ဍဲဒေသတံ သ္ဂးရ။
အခိၚ်ပေါဲဗ္တိုက်ၜါလ္ပာ် ဆက်သ္ကာတ်မြဟ်ဒၟံၚ်သာ်ဏံဂှ် ပ္ဍဲဂိတုဨပရဴ ၁၉ တေံ ဒပ်ကံၚ်ဇြဳပၞာန် ကၟာတ်ထောံလဝ် သၞေဟ်ကၚ်စၟဳတ် ဍုၚ်ကအ်ကြိက် သ္ကုတ်သၟဝ်ကျာဂှ်ကဵု သၞေဟ်ကၚ်စၟဳတ် (တံတားကျိုး၊ လှိုၚ်ဝ) နွံပ္ဍဲသ္ကုတ်ဂၠံၚ်ကအ်ကြိက်−ကြုၚ်ဒဵု ပလိုတ်ဍုၚ်ဂှ် ညးဒေသကအ်ကြိက်မွဲတၠ သ္ဂးရ။
ဒပ်ကံၚ်ဇြဳပၞာန် ကၟာတ်ထောံလဝ် သၞေဟ်ကၚ်စၟဳတ်လုပ်တိတ်ဍုၚ်သီုဖအိုတ်တုဲ ဟွံကဵုညးဒေသလ္တူဍုၚ်ကအ်ကြိက်တံ တိတ်မ္ၚးတုဲ ညးလ္တူဍုၚ်ဗွဲမဂၠိုၚ် အာကၠုၚ်ဟွံဂွံဒှ်ဒၟံၚ်တုဲ ဂွံဂွံအခေါၚ်တိတ်ဂှ် ခမဳသၚ် မတန်တဴလ္တူဍုၚ်ဂမၠိုၚ် ပ္ညဳပ္ညပ်သဳကၠဳဒၟံၚ် ကုကံၚ်ဇြဳပၞာန် နွံဒၟံၚ်ကီုလေဝ် ဟွံပြေပြံၚ် ဒဒှ်ရဂွံမိၚ်ကေတ်ဂှ် ညးဒေသကအ်ကြိက်မွဲတၠ ဟီုရ။
ဟိုတ်နူဒပ်ကံၚ်ဇြဳပၞာန်ကဵု ဒပ်ပံၚ်ကောံပၠန်ဂတးတံ ကၟာတ်ထောံလဝ် ဒၞါဲဂၠံၚ်လုပ်တိတ်တံသီုဖအိုတ်ဂှ်တုဲ နူသၞေဟ်ကၚ်စၟဳတ် (တံတားကျိုး) ဗ္ဒါဲဍုၚ်ကအ်ကြိက် စဵုကဵုဂၠံၚ် ၉ တိုၚ်ဂှ် ယာန်ဖ္ဍိုက်ဗၞိက်ဂမၠိုၚ် အာကၠုၚ်ဟွံဂွံဒှ်ဒၟံၚ်တုဲ ဂွံဂွံအခေါၚ်တိတ်ဂှ် ဟီုဂးပ္ညဳပ္ညပ်ဒၟံၚ်ရောၚ် ဂွံမိၚ်ကေတ်ဂှ် ညးဒေသဂှ် သ္ဂးရ။
ဗ္ဒိုပ် နွံမွဲဒမြိပ်ဂၠံၚ် ကအ်ကြိက်−ကြုၚ်ဒဵု ဗ္ဒါဲဍုၚ်ကြုၚ်ဒဵုကဵု ဗ္ဒိုပ် မၞုံကရပ်ဍုၚ်ကအ်ကြိက်၊ ဗွဲဒိုဟ်သၟဝ်ကျာကအ်ကြိက်တံ အခိၚ်ဒးဒုၚ်ဗိုၚ်ဗ္တိုက်သီဒၟံၚ်ဂှ် ဒပ်ကံၚ်ဇြဳပၞာန် ပလံၚ်ဗစိုပ်လဝ် ဇြဟတ်ဒပ် နူကဵုတမ်ဒပ် ဖျေံသ္ဇိုၚ်ဘာအၚ် မတ်မလီုတံ ဗွဲမဂၠိုၚ်ဂၠေၚ်ရောၚ် ညးဒေသကြုၚ်ဒဵုဂမၠိုၚ် ဟီုရ။
ဒပ်ကံၚ်ဇြဳပၞာန် ထပ်ဗပေၚ်ကၠုၚ်ဒၟံၚ်ဇြဟတ်ဒပ်ဂှ်ဝွံ ဖျေံလဝ်ဒပ် မွဲဒမြိပ်ဂၠံၚ် (ကျားကလေး) ၊ ကွာန်ဂြာၚ် ပ္ဍဲပွိုၚ်ဍုၚ်ဘာအၚ် ဗ္ဒါဲဒဒန်ဂှ်ကဵု သၞေဟ်ကၚ်စၟဳတ်ဒဒန်ဂြာၚ် (ကအ်ကြိက်) သီုၜါလ္ပာ် ဗ္ဒါဲဍုၚ်ကြုၚ်ဒဵုဂှ် ဂွံဆဵုကေတ်ဒၟံၚ်ရောၚ် တမ်ရိုဟ်ပရိုၚ်ဒေသကြုၚ်ဒဵုဂမၠိုၚ် သ္ဂးရ။
ဒပ်ကံၚ်ဇြဳပၞာန်ဝွံ လ္တူဒဵု ကွာန်ဂြာၚ် ဒၞါဲပယျဵုပွိုၚ်ဍုၚ်ဘာအၚ်ကဵု ပွိုၚ်ဍုၚ်ကအ်ကြိက်ဂှ်ကီု၊ လ္တူဒဒန်တၟိ ဒဒန်ဂြာၚ်(ကအ်ကြိက်)တြေံဂှ် ပလေဝ်ဒၟံၚ်ပၞာန်ဒုၚ်တုဲ ဂကောံဒပ်ကံၚ်ဇြဳပၞာန်တံ မၚ်တောပ်ဗ္တိုက်ကေတ်လဝ်ဒၞါဲ မွဲဒမြိပ်ဂၠံၚ် ဂြာၚ်−ဟပၠၚ်ကဵု ဂြာၚ်−သာမည ပွိုၚ်ဍုၚ်ဘာအၚ်ဂှ် ဂွံတီကေတ် အတိုၚ်ဂလာန်ညးဒေသတံရ။
ဟိုတ်နူပေါဲဗ္တိုက်ကအ်ကြိက် ကြုၚ်ဒဵုတုဲ ညးဍုၚ်ကွာန်ဒေသ နူကဵုကွာန်ဗွဲမဂၠိုၚ်ဂၠေၚ်ဝွံ ဒးဂြိပ်ဒဴပါဲဒလေတ်ဒၟံၚ် အလုံကွာန်မွဲတုဲ ဒပ်ကံၚ်ဇြဳပၞာန် ဆက်ပန်ပှော်ကဵုဒၟံၚ်လွဟ်ဇၞော် ကေုာံ ကဵုပၞာန်ကျာ အလုံဒေသကြုၚ်ဒဵု ကအ်ကြိက်မွဲဂှ်တုဲ ညးဍုၚ်ကွာန်ဒေသ ဇီုကပိုက်ချိုတ် ကလိဂွံဝပ်တံဂှ်လေဝ် လၟိဟ်ဍေံ သၠုၚ်တိုန်ကၠုၚ်ရ။
ဟိုတ်နူပေါဲဗ္တိုက်တုဲ လၟိဟ်ညးဍုၚ်ကွာန်ပါဲဒဴဘဲပၞာန် ဒးဂြိပ်ဒဴပါဲဒလေတ်ဒၟံၚ် နူကဵုကွာန် အပ္ဍဲပွိုၚ်ဍုၚ်ကြုၚ်ဒဵုတံဂှ်ဝွံ နွံကၠုၚ် စဵုကဵု ၁ ကိုဋ်ယျဂှ် ချိၚ်ကေတ်လဝ်ရ။
ညးဍုၚ်ကွာန်ပါဲဘဲပၞာန်တံဏံဂမၠိုၚ်ဝွံ အခိၚ်လၟုဟ် နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ် မပ္တံကဵုဇွောံမစၞစ ဂဥုဲဇဗတံဂှ် ဂွံတီကေတ် အတိုၚ်ဂလာန် ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ပါဲဒဴဘဲပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု− CJ