မတ်မလီု၊ ဨပရဴ ၂၂
ကရောံရာသဳဥတုဖံက်ပလန်ဒၟံၚ်ဂှ် ပ္ဍဲတွဵုရးဍုၚ်မန် ဟိုတ်နူဗြဲဂူကၠုၚ်ဒၟံၚ် မွဲဏှမွဲဏှတုဲ ကမၠောန်ၜဵုစဲတ္ၚဲဗွဲမဂၠိုၚ် ကၠာရာသဳၜဵု ဟွံဂွံအိုတ်ဏီဏံ ဒးဒေါအ်ဇူလဝ်ကမၠောန်ဂှ် ညးမကၠောန်ၜဵုဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲဒေသဂှ် စနူဂိတုဨပရဴ သတ္တာဟဒုတိယတုဲ လၟေၚ်ဒဒှ်တ္ၚဲ ဟိုတ်နူဗြဲဂူဒၟံၚ်တုဲ ခံက်ၜဵုဂမၠိုၚ် လီုအာကီု၊ ဟိုတ်နူအကာဲအရာ ကလေၚ်စဲၜဵု ဟွံဂွံတံဂှ်တုဲ ကမၠောန်ၜဵုဗွဲမဂၠိုၚ် ဒးဒေါအ်ဇူလဝ်ရ။
ညးမကၠောန်ၜဵုမွဲတၠဂှ်တှ်ေ ဟိုတ်နူဗြဲဂူဒၟံၚ်တုဲ ဂွံဂွံၜဵု ဒှ်ဟွံမာန်ဂှ်ကီု၊ ခံက်ၜဵု မလီုအာတံဂှ် ဒးကလေၚ်ကၠောန်နူတမ်စိုပ်ကၞောတ် ဟိုတ်နူအကာဲအရာတံဏံ ဒှ်အာလဝ်တုဲ သၞာံဏံ ဒးသီလဝ်ပြဟ်ဟ်ရောၚ် ဟီုရ။
“ကၠာတေံ မေ ၁၅/၁၆ ယဝ်ရရာသဳဥတုဟွံဖံက်ပလန်တှ်ေ ၜိုတ်ဂိတုမေအိုတ်တှ်ေ သီခံက်အိုတ်ရဏောၚ်။ သၞာံဏံဂှ် ဒးသီပြဟ်ဟ်။ တုဲပၠန် ဗြဲဆက်ဒၟံၚ်တုဲ ခံက်ဂှ် ဒးကၠောန်နူတမ်စိုပ်ကၞောတ်ပလန် ဒှ်အာအကာဲအရာဏံယျ။ ဗွဲမဂၠိုၚ်ဂှ် သီထောံအိုတ်ယျ” သာ်ဝွံ သ္ဂးရ။
သ္အာၚ်နူဂှ်ပၠန် ဟိုတ်နူရာသဳဥတုဖံက်ပလန်တုဲ ကၠာရာသဳဟွံဂွံအိုတ် ဒးသီလဝ် ကမၠောန်ၜဵုတံဂှ်ရ နကဵုညးကၠောန်ၜဵုဂမၠိုၚ် ဒးဂိဒၟံၚ်တံ နွံတုဲ အသိၚ်ၜဵုတိတ်လေဝ် စှ်ေအာတီတီဂှ် ညးဆက်ဟီုရ။
ၜဵုအပ္ဍဲဒေသဝွံ နူဂိတုဒဳဇြေမ်ဗာ ၜိုတ်သတ္တာဟတတိယဂှ် စတိတ်ဒၟံၚ်ယျတုဲ အခိၚ်စတိတ်တေံ ၜဵုစဲတ္ၚဲမွဲပသာ ၚုဟ်မးမၞုံ ၜိုတ် ၁၅၀ ဒ္ကေဝ်တုဲ လၟုဟ် ၜဵုတိတ်အောန်ဒၟံၚ်တုဲ ၚုဟ်ဍေံသၠုၚ်တိုန်ကၠုၚ် စဵုကဵု ၃၀၀ ဒ္ကေဝ်ရောၚ် ညးမကၠောန်ၜဵုဂမၠိုၚ် ဟီုအိုတ်ရ။
ၜဵုဒမျိုၚ်စဲတ္ၚဲ တိတ်ကၠုၚ်ဒၟံၚ် အပ္ဍဲဒေသဂှ်တှ်ေ ညးမကၠောန်ကမၠောန်တမ္ၚာဂမၠိုၚ်၊ ညးမကၠောန်ပ္တိတ် ၜဵု(ဆားချော) တံသၟးဟွံက ညးမကၠောန်ဒၟံၚ်ကမၠောန် မဆက်စပ်ကဵုၜဵုတံ ရာန်ရပ်စပ်ဒၟံၚ်ဂၠိုၚ်ဂှ် ဂွံတီကေတ်ရ။
ပ္ဍဲတွဵုရးဍုၚ်မန်ဂှ်တှ်ေ ကၠောန်ဒၟံၚ်ကမၠောန်ၜဵုစဲတ္ၚဲ ပ္ဍဲကဵုပွိုၚ်ဍုၚ်ပံၚ်၊ ဇြပ်ဗု ကေုာံ ပွိုၚ်ဍုၚ်ရေဝ်တံ အဓိကတုဲ လၟေၚ်သၞာံ လျိုၚ်တာန်ၜဵု တိတ်ဒၟံၚ် ၄၀၀၀၀ ပြၚ်တုဲ ၜဵုတိတ်ကၠုၚ်တံဂှ်တှ်ေ မ္ၚးနူအပ္ဍဲဒေသဂှ် လ္ဂုၚ်၊ မာန္တလေဝ် မပါလုပ် ရးဒေသဇၞော် ကေုာံ တွဵုရးလ္ၚဵုတံဂှ်လေဝ် ပလံၚ်ပ္တိုန်သွံတြးဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ