နေဗျဳဒဝ်၊ ဨပရဴ ၂၂
သွက်ဂွံကလေၚ်ဖျေံဒၞါဲဝါဲ ဟိုတ်နူဘဲတိချဳဂှ်တုဲ ဂွံဂွံအရီုဗၚ် နူဍုၚ်သ္အာၚ်ကဵု ဍုၚ်အပ္ဍဲဒေသတံဂှ် ကံၚ်ဇြဳပၞာန် လလောၚ်တြးကၠုၚ် ပပဵုပ္တိုန်အာယုက်ပရေၚ်ဒေါအ်ပန်ပှော်မာန်ကီုလေဝ် ပ္ဍဲဗလးတိဏံ ဒှ်ဒၟံၚ်အကာဲအရာ ဆက်ဗ္တိုက်အာဏောၚ်ဂှ် ညးခါတ်အကာဲပရေၚ်ပၞာန်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူကသဳတိ မချဳအာလဝ် ပ္ဍဲဍုၚ်ဗၟာသ္ကုတ်လဒေါဝ် ပ္ဍဲဂိတုမာတ် ၂၈ တေံဂှ်တုဲ ဂွံကဵုအရီုဗၚ်ပရေၚ်မၞိဟ်မာန်ဂှ် ပ္ဍဲတ္ၚဲအကြာဏံ သ္ကိုပ်ဝန်ဇၞော်မလေဝ်ယှာ ဥက္ကဌအာဇြဳယာန် ဆဵုဂဗလဝ်ကဵု ကံၚ်ဇြဳပၞာန် ကေုာံ အလဵုအသဳညဳသၟဟ်ဂကူ NUG ဗွဲတၞဟ်ခြာရ။
အပ္ဍဲပရေၚ်ဆဵုဂဗဂှ် သွက်ဂွံထံက်ပၚ်ကဵုအရီုဗၚ် ပရေၚ်ဗ္စာရဏာမၞိဟ် ကုဒေသဒးဘဲတိချဳတံဂှ် အကြာကံၚ်ဇြဳပၞာန်ကဵု NUG တုပ်လဝ်စိုတ် သွက်ဂွံပပဵုပ္တိုန်အာယုက် ပရေၚ်ဒေါအ်ပန်ပှော်ဂှ်ရောၚ် ဥက္ကဌအာဇြဳယာန် ဟီုပ္တိတ်လဝ်ရ။
ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ်ဂှ်တှ်ေ နကဵုကံၚ်ဇြဳပၞာန် ဂွံဂွံအထံက်အပၚ် နူဍုၚ်သ္အာၚ်တံဂှ် လလောၚ်တြးကၠုၚ် ဒေါအ်ပန်ပှော်မာန်ကီုလေဝ် နတဲဏံ ကေတ်အခေါၚ်ခိုဟ်တုဲ ဗ္တိုက်ဒၟံၚ်ဏီဏောၚ်ဂှ် သ္ၚဳဂၠိပ်လဝ်ရ။
“လၟုဟ်ဂှ် ပါၚ်ဂှ်တှ်ေ ဟီုမံၚ်ဒေါအ်ပန်ပှော်ဏောၚ်။ ဆ္ဂး ဟီုကၠုၚ်ဒေါအ်ပန်ပှော်မှလေဝ် အထံက်အပၚ်ဍေံတံမိက်ဂွံဂွံ နူဍုၚ်သ္အာၚ်တံကဵု ဍုၚ်အပ္ဍဲဒေသတံဂှ် ကလိဂွံမာန်ဏောၚ်။ အထံက်အပၚ်မိက်ဂွံဂွံဟီုဂှ် လ္တူနူဂွံရီုဗၚ်ညးဍုၚ်ကွာန်တံဂှ် ဂွံကလေၚ်ပလေဝ်ပလေတ် ဒပ်ပၞာန်ဍေံတံ ဂွံကလေၚ်ပလေဝ် ဂွံဖျေံဒၞါဲဝါဲ ကုဌာနဝန်ဇၞော် မဒှ်လေံထံက်ဍေံတံဂှ် ကဵုအာက္ဍိုပ်ဏောၚ်။ ဒေါအ်ပန်ပှော်ဂှ်တှ်ေ ထပ်တုဲလလောၚ်တြးကၠုၚ်မာန်ကီုလေဝ် နတဲဏံဂှ် ဗ္တိုက်ဒၟံၚ်ဏီဏောၚ်။ ဍေံတံ ကေတ်အခေါၚ်ခိုဟ်ကဵု အကာဲအရာဏံတုဲ ဗ္တိုက်ဂၠိုၚ်ကၠုၚ်ဏောၚ်” သာ်ဝွံ သ္ဂးရ။
ဟိုတ်နူကသဳတိတုဲ စက်ယန်ပရေၚ်အုပ်ဓုပ်ဗွဲမဂၠိုၚ် မပ္တံကဵုဂအုပ်ရုၚ်ပၞာန်၊ ကၠတ်ထဝ် ကေုာံ စမြိုၚ်ဌာနဝန်ဇၞော် သ္ၚိသ္ဇိုၚ်ဝန် မၞုံအပ္ဍဲတိဍာ်ကံၚ်ဇြဳနေဗျဳဒဝ် ဒၞါဲအဝဵုအာဏာစက်ဗဟဵုမတဴဂှ် ဇီုကပိုက်လီုလာ်အာလဝ်ရ။
အတိုၚ်တၚ်လလောၚ်တြး ကုလသမဂ္ဂဂှ်မ္ဂး အခိၚ်ဒးစွံအာရီု လ္တူပရေၚ်အရီုဗၚ်ပရေၚ်မၞိဟ်ဂမၠိုၚ် ဂွံစိုပ်ဇရေၚ်ဒၞါဲညးမဒးဘဲအန္တရာယ်တံ မွဲဓဝ်ဂှ် ဒပ်ပၞာန် ကၠောန်ဒၟံၚ်ပရေၚ်ဗ္တိုက်တံရောၚ် သ္ဂးရ။
နူစတိချဳတုဲဂှ် ကောန်ဒပ်ကံၚ်ဇြဳပၞာန်ဂမၠိုၚ်ဝွံ ဗ္တိုက်ကၠုၚ်လဝ် ၁၂၀ ဝါပြၚ်တုဲ ပ္ဍဲကဵုဏံ ကဝက်ပြၚ်ဝွံ ကြဴနူလလောၚ်တြး ဒေါအ်ပန်ပှော် ပ္ဍဲဂိတုဨပရဴ ၂ တုဲဂှ် က္တဵုဒှ်လဝ်ရောၚ် ထ္မံက်ထ္ၜးလဝ်ရ။
ပရေၚ်ဗ္တိုက်တံဏံဗွဲမဂၠိုၚ်ဝွံ ဒၞါဲတိချဳအာလဝ်ဂှ် မပါလုပ် ပ္ဍဲဒေသဒၞါဲသတီုလၟိဟ်မၞိဟ်ဂၠိုၚ်တံဂှ် စကာပၞာန်ကျာ ကေုာံ အမၠံက်တံတုဲ ဗ္တိုက်လဝ်ရောၚ် ရုၚ်အခေါၚ်အရာမၞိဟ် ကုလသမဂ္ဂ လလောၚ်ပ္တိတ်လဝ် ပ္ဍဲဂိတုဨပရဴ ၁၁ တေံရ။
အခိၚ်လၟုဟ်ဂှ်လေဝ် ကံၚ်ဇြဳပၞာန်ဝွံ စဵုကဵုဂိတုဨပရဴ ၂၂ ဂှ် ဒေါအ်လဝ်ပန်ပှော်ကီုလေဝ် စွံပွန်ကဵုဍုၚ်ကွာန် မ္ဒးလဝ်ဘဲတိချဳတံ ကုကောန်အရာပ် နူအပ္ဍဲဒေသတိဍာ် မဒးဗလးလဝ်တဲတံဂှ်တုဲ ထောံမခတိုဟ်ဗ္တိုက်ဒၟံၚ် နူကဵုပၞာန်ကျာရ။
အကြာပ်ဒပ်ဇၞော်ဇြေယျ သ္ပလဝ်ဇြဳဒဳအာမ်ဂှ်လေဝ် နကဵုဗီုပြၚ်ကဵုဇြဟတ်ဓရိုဟ် ကုဂကောံပၠန်ဂတးတံဂှ် ဗ္တိုက်ကၠုၚ် လ္တူကောန်အရာပ်တံ ဗွဲမသ္ကာတ်မြဟ်တုဲ ပရေၚ်ဒေါအ်ပန်ပှော်ဂှ်ဝွံ နွံဆၜိုတ်လ္တူတၞးလိက်ရဂှ် ဟီုရ။
“ဗ္တိုက်ကၠုၚ်လ္တူကောန်အရာပ်တံ ဗွဲမသ္ကာတ်မြဟ်တုဲ ဗီုပြၚ်ဓရတ်ကၠုၚ်လ္ပာ်ဏံ ( ဂကောံဇြဟတ်ပၠန်ဂတး) တံဂှ် ဂွံဆဵုကေတ်ရ။ အေ ဂှ်တှ်ေ ၜိုတ်ပ္ဍဲလိက်ရ ညံၚ်ဂွံကလၚ်ခိုဟ် ထ္ပက်(ဒေါအ်ပန်ပှော်)တှ်ေ ထ္ပက်မာန်ရ။ ဆ္ဂး ပရေၚ်ဒေါအ်ပန်ပှော်ဍာံဍာံဂှ်တှ်ေ နွံကၠုၚ်ဟွံသေၚ်ပုဟ်။ ဒဵုကဵုအခိၚ်လၟုဟ် ဒၞါဲလ္ၚဵုတံဂှ်တှ်ေ သွက်ဂွံဝေၚ်ပၞာန်ဂှ် ဍေံတံစဳဇန်ဒၟံၚ်ဂှ်လေဝ် ဂွံတီကေတ်ရ” သာ်ဝွံ သ္ဂးရ။
အလဵုအသဳညဳသၟဟ်ဂကူ NUG ဂှ်တှ်ေ ပရေၚ်ဒေါအ်ပန်ပှော်ဂှ်ဝွံ ဒှ်ကိစ္စကၠောန်ကေတ်မွဲလ္ပာ်ဓဝ် ဂွံဟွံသေၚ်ဂှ်တုဲ ဂွံကဵုက္ဍိုပ်စဵုဒၞါ ညးဍုၚ်ကွာန်တံမာန်ဂှ် ပၟိက်ဇၞော်ဂှ်ရ တန်တဴကဵုအကာဲအရာတုဲ ရေၚ်တၠုၚ်အာဏောၚ်ဂှ် ဟီုလဝ်ရ။
ပ္ဍဲကဵုဒေသဒးဘဲတိချဳတံကဵု ဒေသမဆက်စပ်ဂမၠိုၚ် မပပဵုပ္တိုန်လဝ်အာယုက်ဒေါအ်ပန်ပှော်လၟုဟ်ဂှ် NUG ဒေါအ်လဝ်ပၞာန်ထ္ပက်ဂှ်ဝွံ ပ္ဍဲဂိတုဨပရဴ ၂၀ တေံ တုဲဒှ်အာယျ။ ဆ္ဂး ပြဟ်ဟ်ဏံ စဵုကဵုဂိတုဨပရဴ ၂၁ ဂွံဆက်ပပဵုပ္တိုန်အာယုက် သွက်ဂွံဒေါအ်ပန်ပှော်ဂှ် ဟွံဂွံလလောၚ်တြးဏီရ။
ပရေၚ်ကံၚ်ဇြဳပၞာန် ဒေါအ်ပန်ပှော် အာယုက်မအိုတ်အာ ပ္ဍဲဂိတုဨပရဴ ၂၂ တေံဂှ်လေဝ် သွက်ဂွံပပဵုပ္တိုန်အာယုက်ဂှ် ဟွံဂွံလလောၚ်တြးလဝ်ဏီကီုလေဝ် အခိၚ်ကာလပရေၚ်ဒေါအ်ပန်ပှော် လမျီုမလုပ်ဒၟံၚ်ဂှ်တှ်ေ ဟိုတ်နူပရေၚ်ဗ္တိုက်ကဵုပၞာန်ကျာတုဲ လၟိဟ်ကောန်အရာပ်ချိုတ်အာတံ သၠုၚ်တိုန်ဒၟံၚ် ဂၠိုၚ်ကဵုစှော်ရ။
စနူဂိတုဨပရဴ ၁၉ စဵုကဵုဂိတုဨပရဴ ၂၀ ပ္ဍဲကဵုကွာန် မၞုံပ္ဍဲပွိုၚ်ဍုၚ်တဗုက်ကျေန် ရးမာန္တလေဝ်ဂှ် ဟိုတ်နူဗ္တိုက်ထောံကၠုၚ်မခတိုဟ် နူကဵုပၞာန်ကျာတုဲ လၟိဟ်မၞိဟ်ချိုတ်အာ ဟွံအောန်နူ ၄၀ တၠ နွံကၠုၚ်ဂှ် ပရိုၚ်ဂမၠိုၚ် ထ္မံက်ထ္ၜးလဝ်ရ။
သ္အာၚ်နူဂှ်ပၠန် ပ္ဍဲဂိတုဨပရဴ ၂၀ အခိၚ်ဇိုၚ်သဝ်တ္ၚဲ ၜိုတ် ၆ နာဍဳပြၚ်ဂှ် ကံၚ်ဇြဳပၞာန် ထောံဂြာတ်လဝ်မခတိုဟ် ကွာန်(သင်တော) ၊ ပွိုၚ်ဍုၚ်ကဗလူ၊ ရးသက်ကိုၚ်တုဲ ဒတုံဗ္တိုဟ်ထ္ကးအာလဝ် လ္တူဆေၚ်ဖျာတုဲ သီုတၠဆေၚ်ဖျာ မပါလုပ် ကောန်အရာပ် တြဴတၠ ဒးချိုတ်အာလဝ်ရ။
ပ္ဍဲဂိတုဨပရဴ ၁၉ တေံဂှ်လေဝ် ကံၚ်ဇြဳပၞာန် ထောံလဝ်မခတိုဟ် လျိုၚ် ၅၀၀ မွဲမ နကဵုဂျက်ဖိုက်တာ လ္တူဘာလကျာ် ကွာန်မေန်သဝ် ပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ်တုဲ ကောန်ထပိုယ်မွဲဇကု ပဝ်အာတုဲ ကောန်အရာပ်ၜါတၠ ဒးချိုတ်အာလဝ်ရောၚ် ဗော်သွးကောန်ဂကူကရေၚ် KNU လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−MOI/Min Khant Kyaw