ကအ်ကြိက်၊ ဨပရဴ ၂၃
သၞေဟ်ကၚ်စၟဳတ် ဒၞါဲမလုပ်တိတ်ဍုၚ်ကအ်ကြိက် တွဵုရးကရေၚ်ဂှ် ဒပ်ကံၚ်ဇြဳပၞာန် ကၟာတ်လဝ်တုဲ ဟွံကဵုညးဍုၚ်ကွာန်လ္တူဍုၚ်တံ တိတ်မ္ၚးတုဲ အခိၚ်မကၟာတ်လဝ်ဂှ် လ္တူဍုၚ်ဂှ် ၚုဟ်ဗၞိက်စၞစသုၚ် မပ္တံကဵုကၠေၚ်စက်၊ သ္ၚုတံ ၚုဟ်သၠုၚ်တိုန်ကၠုၚ်ဂှ် ညးဒေသဍုၚ်ကအ်ကြိက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတး သၟဝ်သ္ကိုပ်သ္က KNLA တံ အခိၚ်ပေါဲဗ္တိုက်သ္ကာတ်မြဟ်ဒၟံၚ် ဗ္ဒါဲဍုၚ်ကြုၚ်ဒဵုကဵုကအ်ကြိက်ဂှ် စနူဂိတုဨပရဴ ၁၉ တုဲကၠုၚ်တေံတုဲ ဒၞါဲလုပ်တိတ်ဍုၚ်ကအ်ကြိက်တံဂှ် ဒပ်ကံၚ်ဇြဳပၞာန် ကၟာတ်လဝ်သၞေဟ်ကၚ်စၟဳတ်တံသီုဖအိုတ်ရ။
ဒပ်ကံၚ်ဇြဳပၞာန် ဟိုတ်နူကၟာတ်ထောံလဝ် သၞေဟ်ကၚ်စၟဳတ် မလုပ်ဍုၚ်တိတ်ဍုၚ်သီုဖအိုတ်ဂှ်တုဲ အခိၚ်ပေါဲဗ္တိုက်သ္ကာတ်မြဟ်ဒၟံၚ်ဂှ် ညးဍုၚ်ကွာန်ဒေသကအ်ကြိက်ဂမၠိုၚ်ဝွံ ဟွံဂွံအခေါၚ်တိတ်မွဲသာ် ဗွဲမဂၠိုၚ် အာကၠုၚ်ဟွံဂွံ သှ်ေနွံဒၟံၚ်ပ္ဍဲဍုၚ်ကအ်ကြိက်ဂှ်တုဲ အပ္ဍဲဍုၚ်ကအ်ကြိက်ဂှ်ပၠန်လေဝ် နူကဵုမ္ၚး မၞိဟ်လုပ်စိုပ် ဟွံဂွံပုဟ်ဂှ် ညးဒေသကအ်ကြိက်မွဲတၠ ဟီုရ။
အခိၚ်လၟုဟ် သၟာပရေၚ်ပိုန်ဒြပ်တၠကမၠောန်သၟာဗၞိက်ဂမၠိုၚ်ဝွံ ကြိုၚ်စွံလဝ် ကၠေၚ်စက်ကေုာံသ္ၚုတံတုဲ ပ္တိုန်ၚုဟ်သွံတြးကၠုၚ်ဒၟံၚ်ဂှ်ရ မ္ၚးနူကၠေၚ်စက်ဂှ် ၚုဟ်ဗၞိက်စၞစသုၚ်သ္ဇိုၚ် ကေုာံ သ္ၚုတံလေဝ် သၠုၚ်တိုန်ဒၟံၚ်ရောၚ် သ္ဂးရ။
သ္အာၚ်နူဂှ်ပၠန် အခိၚ်ကာလပေါဲဗ္တိုက်လအ်ကၠုၚ်မ္ဂး ကဖျုန်လုပ်စိုပ်ကၠုၚ် လ္ပာ်ဍုၚ်သေံတံ ပိုတ်ကၠုၚ်မာန်တုဲ သၞေဝ်ကေဝ်တံဂှ်တှ်ေ အခိၚ်လၟုဟ် နွံဒၟံၚ်ဏီဂှ် သ္ဂးရ။
အတိုၚ်ပရိုၚ် ဂွံမိၚ်ကေတ်လက္ကရဴအိုတ်ဏံဂှ်မ္ဂး လ္တူဍုၚ်ကအ်ကြိက်ဂှ် ကၠေၚ်ဓာတ် ၁ လဳတာ ၚုဟ်မၞုံ ၁ ဠက်ဒ္ကေဝ်၊ ခၟာဲစၚ်မွဲမ ၚုဟ်မၞုံ ၂ လ္ၚီဒ္ကေဝ်ရောၚ် ဂွံတီကေတ်ရ။
နကဵုကံၚ်ဇြဳပၞာန် ဟွံပံက်သၞေဟ်ကၚ်စၟဳတ်တံမွဲသာ် ယဝ်ကၟာတ်လဝ်အခိၚ်ဗွဲမလအ်လမ္ဂး ညးဍုၚ်ကွာန်ဒေသကအ်ကြိက် နွံဒၟံၚ်အပ္ဍဲဍုၚ်ဂှ်ဂမၠိုၚ် ဒးဂဗကၠုၚ်ကဵု အခက်အခုဲတၟာဂလိုၚ်မာန်တုဲ ဂွံဂွံအခေါၚ်တိတ်မ္ၚးဂှ် ခမဳသၚ်ဂမၠိုၚ် ပ္ညဳပ္ညပ်သဳကၠဳဒၟံၚ်ကဵု ကံၚ်ဇြဳပၞာန် နွံလဝ်ကီုလေဝ် ဟွံပြေပြံၚ်ပုဟ်ဂှ် ဂွံမိၚ်ကေတ်ရ။
သၞေဟ်ကၚ်စၟဳတ် လုပ်တိတ်ဍုၚ်ကအ်ကြိက်သီုဖအိုတ်ဂှ် ဒပ်ကံၚ်ဇြဳပၞာန် ကၟာတ်လဝ်တုဲ မွဲလ္ပာ်ဂှ်ပၠန်လေဝ် ဒပ်ပံၚ်ကောံပၠန်ဂတးတံ ကၟာတ်လဝ် ဗ္ဒိုပ်သၞေဟ်ကၚ် ဂၠံၚ် ၉ တိုၚ်ဂှ်တုဲ ဟိုတ်နူဂကောံဒပ်ၜါလ္ပာ်တံ ကၟာတ်လဝ်ဂှ်တုဲ နူ(လှိုၚ်ဝ တံတားကျိုး) စဵုကဵုဂၠံၚ် ၉ တိုၚ်ဂှ် ယာန်ဖ္ဍိုက်ဗၞိက်ဗွဲမဂၠိုၚ်ဂၠေၚ် အာကၠုၚ်ဟွံဂွံ နွံဒၟံၚ်ဂှ် ညးဒေသတံ သ္ဂးရ။
ပေါဲဗ္တိုက်ၜါလ္ပာ် ဗ္ဒါဲဍုၚ်ကြုၚ်ဒဵုကဵု ဍုၚ်ကအ်ကြိက် ပွိုၚ် ၁ သတ္တာဟပြၚ်ဂှ်ဝွံ စဵုကဵုဂိတုဨပရဴ ၂၂ ဂှ် ဆက်သ္ကာတ်မြဟ်ဒၟံၚ်ဖိုဟ်တုဲ ဒပ်ကံၚ်ဇြဳပၞာန် ဟိုတ်နူပန်ပှော်ကၠုၚ်ကဵုပၞာန်ကျာ ဗွဲမသ္ကာတ်မြဟ်ဂှ်ရ ညးဍုၚ်ကွာန်ကောန်အရာပ်ကလိဂွံဝပ်၊ စမြိုၚ်သ္ၚိဒၟံၚ် ဇီုကပိုက်လီုလာ်ဒးအာတံ ဆက်ဒှ်ဒၟံၚ်ရောၚ် ဂွံတီကေတ် အတိုၚ်ဂလာန် ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ