တၞၚ်သဳ၊ ဨပရဴ ၂၃
ပ္ဍဲရးတၞၚ်သဳ အပ္ဍဲဂိတုမာတ်တုဲကၠုၚ်တေံ ဟိုတ်နူဒပ်ကံၚ်ဇြဳပၞာန်ကဵု ဒပ်ရပ်လွဟ်ဂမၠိုၚ် ရပ်ဒက်ပြိုက်ဂစိုတ်ကၠုၚ်ဂှ်တုဲ ကောန်အရာပ် ၁၂ တၠ ချိုတ်အာလဝ်တုဲ ဟွံအောန်နူ ၃၀၀ တၠ ဒးဒုၚ်ရပ်လဝ်ဂှ် ဂကောံသုတေသနအပ္ဍဲဒေသ FE5 Thanintharyi လလောၚ်ပ္တိတ်လဝ်ရ။
အပ္ဍဲဂိတုမာတ်တုဲကၠုၚ်တေံဂှ်လေဝ် ပ္ဍဲကဵုပေါဲဗ္တိုက် က္တဵုဒှ်လဝ် ပ္ဍဲရးတၞၚ်သဳဂှ် ဟိုတ်နူဒပ်ကံၚ်ဇြဳပၞာန် ပန်ပှော်ပြိုက်ဂစိုတ်ကၠုၚ်ဂှ်တုဲ ကောန်အရာပ်ဂမၠိုၚ် ဒးချိုတ်အာလဝ်ရ။
ညးမချိုတ်အာဂမၠိုၚ်ဝွံ ဟိုတ်နူဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန်တ္ၚဲဇမၠိၚ် မွဲဒမြိပ်ကွာန်တုၚ်ဃောန် ပွိုၚ်ဍုၚ်တၞၚ်သဳ ဒၞါဲပေါဲဗ္တိုက်သ္ကာတ်မြဟ်ဒၟံၚ်ဂှ်တုဲ ညးဍုၚ်ကွာန်ဒေသဂမၠိုၚ် ဒးဂြိပ်ဒဴပါဲဒလေတ်ဒၟံၚ်တုဲ ဗွဲမဂၠိုၚ်ဝွံ ဒးဒုၚ်ပန်ဂစိုတ်ကဵုလွဟ်ဇၞော်တုဲ ဒးချိုတ်အာလဝ်ရ။
ဟိုတ်နူကံၚ်ဇြဳပၞာန် ပြိုက်ဂစိုတ်လဝ်တုဲ ပ္ဍဲကဵုပွိုၚ်ဍုၚ်တၞၚ်သဳ ပရေၚ်ပၞာန်မကြံၚ်မ္ၚိုဟ်ဒၟံၚ်ဂှ် ညးဍုၚ်ကွာန်ကောန်အရာပ် စဵုကဵု ၈ တၠ ချိုတ်အာလဝ်ရောၚ် ညးတာလျိုၚ် FE5 Thanintharyi မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
မွဲလ္ပာ်ဂှ်ပၠန် ဟိုတ်နူဂကောံဇြဟတ်ပၠန်ဂတးဂမၠိုၚ် ပသောၚ်ကၠုၚ်ဒၟံၚ်ရဲကဵုပရိုၚ် ( ဒလန်) တံဂှ်တုဲ က္ဍိုပ်သ္ကိုပ်ပျူသဝ်ထဳ ပွိုၚ်ဍုၚ်ပဠဝ် မွဲတၠကဵု သ္ကိုပ်အုပ်ဓုပ်မွဲတၠ ဒးချိုတ်အာလဝ်ရောၚ် သ္ဂးရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန် ထ္ၜးဟိုတ်နာနာသာ်တုဲ ရပ်ဒက်ကၠုၚ်လဝ်ကောန်အရာပ် ဟွံအောန်နူ ၃၃၄ တၠ နွံတုဲ ၆၃ တၠ ကလေၚ်ဗလးကၠုၚ်လဝ်ရောၚ် ထ္မံက်ထ္ၜးလဝ်ရ။
အပ္ဍဲပွိုၚ်ပိသၞာံတုဲကၠုၚ်တေံ ပ္ဍဲရးတၞၚ်သဳဂှ် ဟိုတ်နူဒပ်ကံၚ်ဇြဳပၞာန် ပန်ဂစိုတ်လဝ်တုဲ ညးဍုၚ်ကွာန်ကောန်အရာပ် ၇၂၃ တၠ ဟွံအောန် ချိုတ်အာလဝ်ရောၚ် ဂွံတီကေတ် အတိုၚ်လိက်ဒုၚ်စဳရေၚ် FE5 Thanintharyi ရ။
ပရိုၚ်−သြၚ်လောန်တိုၚ်(မ်)
ဗီု−CJ