မတ်မလီု၊ ဨပရဴ ၂၃
ပ္ဍဲတွဵုရးဍုၚ်မန် ပေါဲဗ္တိုက်ၜါလ္ပာ် မကလေၚ်ညိၚ်ဒၟံၚ်ဂှ် ပ္ဍဲဂိတုဨပရဴ ၂၂ အခိၚ်နူဂယးဂှ် စပံက်ကၠုၚ်လဝ် တန်ဗ္တောန်ကွတ်ပၞာန် လၟေၚ် ၁၂ ဂှ် ဂွံတီကေတ် အတိုၚ်မဳဒဳယျာတြးဝါဒ ကံၚ်ဇြဳပၞာန်ရ။
သၟတ်ဒးဒုၚ်ပကောံပလဝ်ကောန်ပၞာန် သွက်တန်ဗ္တောန်ကွတ်ပၞာန် လၟေၚ် ၁၂ ဂှ် ပ္ဍဲဂိတုဨပရဴ ၂၁ တေံ သ္ကိုပ်ဝန်ဇၞော်တွဵုရးဍုၚ်မန် ဥူအံၚ်ကျဳတုၚ် အာစိုပ်ဆဵုဂဗလဝ် ပ္ဍဲဘာပရေၚ်ပညာ စၟတ် (၆) ဌာန်ဂအုပ်ပၞာန်ရးအဂၞဲရ။
ကံၚ်ဇြဳပၞာန် ၜိုန်ဟွံထ္မံက်ထ္ၜးလဝ် လၟိဟ်သၟတ်မတိုန်စိုပ်တန်ဗ္တောန်ကွတ်ပၞာန် လၟေၚ် ၁၂ ဂှ်ကီုလေဝ် အတိုၚ်ဗီုဓာတ် မထ္မံက်ထ္ၜးလဝ် ပ္ဍဲမဳဒဳယျာတြးဝါဒတံဂှ်မ္ဂး လၟိဟ်ညးမတိုန်တန်ဗ္တောန် ၜိုတ် ၁၀၀ နွံရောၚ် ချိၚ်ကေတ်ရ။
ညးဒေသတွဵုရးဍုၚ်မန် ဟွံမိက်ထ္မံက်ယၟုမွဲတၠဂှ်တှ်ေ သၟတ်မ္ဒးတိုန်စိုပ် တန်ဗ္တောန်ကွတ်ပၞာန် လၟေၚ် ၁၂ တံဂှ် ဒးဒုၚ်ရပ်ဒက် အခိၚ်ဗ္တံတုဲ ဒးဒုၚ်ပကောံပကောန်ပၞာန်ကီု၊ လ္ၚဵုတံဂှ်တှ်ေ ဂကောံအုပ်ဓုပ်ဂမၠိုၚ် ကဵုမက်ဂၠက်တုဲ ဒးဒုၚ်စန်ဒက်လဝ်တံလေဝ် ပါလုပ်ဂှ် ဟီုရ။
“ကၠောန်ကၠုၚ်ဝိုၚ်ဝေၚ် ဝိုၚ်(အာဝါဒေ) တံ ဂၠိုၚ်ၚ်တုဲ ကောန်ၚာ်စဴကၠုၚ်ဗ္တံဂၠု လ္ၚဵုတံဂှ်တှ်ေ ရပ်ဏာလဝ်ရ။ လ္ပာ်ကွာန်ရးတံဂှ်လေဝ် နွံ။ စန်ဒက်တုဲ ကော်ကၠုၚ်ဂှ် ဂၠိုၚ်အာရ။ က္ဍိုပ်သ္ၚိကၠံ၊ ညးအုပ်ဓုပ်ဂမၠိုၚ် ကဵုကၠုၚ်မက်ဂၠံက်တုဲ လ္ၚဵုတံဂှ်လေဝ် ဟိုတ်နူပရေၚ်စသုၚ်မံၚ်စံၚ် ကြေပ်ဂြတ်၊ လ္ၚဵုဂှ်ပၠန်လေဝ် လတက်ယူနဳဝှမ်တုဲ မိက်ဂွံကြမ်ကြ ဗီုတံဏံဂှ်လေဝ် နွံတုဲ အခိၚ်ဗ္တံတှ်ေ ကဵုလဝ်အခေါၚ်ကၠောန်တံဂှ်တုဲ ဍေံတံစန်ဒက်တုဲ ကော်ကၠုၚ်ဂှ် ဂၠိုၚ်” သာ်ဝွံ သ္ဂးရ။
သ္အာၚ်နူဂှ်ပၠန် ဂကောံအုပ်ဓုပ်ကွာန်အရာပ် ကံၚ်ဇြဳပၞာန်ဂမၠိုၚ်ဝွံ သွက်ဂွံလိၚ်စုတ်မၞိဟ်စၞး သွက်ဂွံယိုက်လျိုၚ်ပၞာန်ဂးတုဲ ဗက်ဒၟံၚ်သြန် လၟေၚ်ဂိတု နွံတုဲ သၟတ်မဖံက်ပလီု အမိၚ်ဒေသန္တရတံဂှ်တှ်ေ ရပ်ဒက်တုဲ ပကောံကၠုၚ်ဒၟံၚ်ကောန်ပၞာန်တၟိတံဂှ် ဆက်ကၠောန်သ္ပဒၟံၚ်ရ။
အပ္ဍဲဒေသဂှ်တှ်ေ ဟိုတ်နူသၞောဝ်ယိုက်လျိုၚ်ပၞာန် ကံၚ်ဇြဳပၞာန် မပၠောပ်လဝ်လမျီုဂှ်တုဲ သၟတ်အဝဲဍောတ်သွတ်ဗွဲမဂၠိုၚ် ဒးတိတ်စ္ဍးအာ လ္ပာ်ဍုၚ်ဇိုၚ်ဝုတ်ဒိုဟ်တံအိုတ်တုဲ ဒးဒုၚ်စသိုၚ်ဒၟံၚ် ဘဲကောန်ကလောန်အောန်တအ် ဇၞော်ကဵုဇြဟတ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ပကောံပကေဝ်ဂွံလဝ်ဂှ်မ္ဂး နူတန်ဗ္တောန်ကွတ်ပၞာန် လၟေၚ် ၁ စဵုကဵု လၟေၚ် ၁၁ ဂှ် အပ္ဍဲဒေသ လၟိဟ်ညးဒးဒုၚ်ပကောံပကောန်ပၞာန် နွံကၠုၚ် ၂၀၀၀ ပြၚ်ကၠုၚ်ယျ မဒှ်ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram