ဍာ်ဗု၊ ဨပရဴ ၂၃
အကြာဂကောံရပ်လွဟ်ဂမၠိုၚ် ရန်တၟံသွက်ဂွံသၠုၚ်ပ္တိုန်အသိၚ် ပံၚ်တောဲရေၚ်တၠုၚ်အာ လ္ဂောံကဵုပရေၚ်ပၞာန်မာန်ဂှ်တုဲ ကရောၚ်ပၞာန်ဒဝ်ဏ မပါလုပ် ABSDF ကေုာံ ဒပ်ရပ်လွဟ် မန်၊ ကရေၚ်၊ ထဝါဲတံ ပံၚ်တောဲလဝ် နဒဒှ်မဟာမိတ်ပရေၚ်ပၞာန်ရ။
ပ္ဍဲကဵုဂကောံပံၚ်တောဲလဝ် နဒဒှ်မဟာမိတ်တံဂှ် ကရောၚ်ပၞာန်ဒဝ်ဏ (၃) ( ဒပ်စြေက်−၄၊ ဒပ်စြေက်−၆၊ ဒပ်စြေက်−၇) ၊ တမ်ဒပ် ဒပ်မဟာ ၆ KNU ၊ ဗော်ဍုၚ်မန်တၟိ AD ၊ ဒပ်ပၠန်ဂတးဍုၚ်မန် MSRF၊ ABSDF တမ်ဒပ်−၁ ကေုာံ ဒပ်ပၞာန်ထဝါဲ DNLA တံ ပါလုပ်ရ။
ဂကောံရပ်လွဟ်တံဏံဂမၠိုၚ်ဝွံ ပ္ဍဲဂိတုဨပရဴ ၁၇ တေံ ညးတာလျိုၚ်ဂမၠိုၚ် ဆဵုဂဗသဳကၠဳလဝ်တုဲ ဂွံလဝ်တၚ်တုပ်စိုတ် သွက်ဂွံပံၚ်တောဲ နဒဒှ်မဟာမိတ်ပရေၚ်ပၞာန်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ်တှ်ေ ပံၚ်တောဲရေၚ်တၠုၚ်အာ ကုဒပ်မချဳဒရာၚ်ဒၟံၚ်အပ္ဍဲဒေသတံတုဲ ဗ္တိုက်အာသၞတံ ဗွဲမအံၚ်ဇၞးမာန်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“လၟုဟ် စပ်ကဵုဗော်ဍုၚ်မန်တၟိ AD ပါလုပ်ကၠုၚ်ဂှ်တုဲ သွက်ဂွံထပ်ပံၚ်တောဲရေၚ်တၠုၚ်ဂှ် ဒးထပ်ဟီုအရေဝ်သဳကၠဳ ကေတ်တၚ်တုပ်စိုတ်ဏောၚ်။ တၟေၚ်ဂှ်တှ်ေ တမ်ဒပ် ၂၇ ဒပ်မဟာ ၆ KNU လေဝ် ပါလုပ်ကၠုၚ်ရ။ တမ်ဒပ် ၂၇ ဂှ်လေဝ် နူကၠာတေံရ ပိုယ်တံ လဆောဝ်လဆောဝ် ပံၚ်တောဲဒၟံၚ်ပရေၚ်ပၞာန်တံ နွံ။ ဟိုတ်ဂှ်ရ ပၚ်တောဲကၠောန်အာ တုပ်ပ်တုဲ ပိုယ်တံ ဗ္တိုက်အာသၞတံ လောဲလောဲမာန်ဏောၚ်။ ရန်ကဵုညအ်တုဲ ပံက်တောဲကၠုၚ်လဝ်မဟာမိတ် သာ်ဏံရောၚ် နကဵုအဲ မိက်ဂွံဟီုရ” သာ်ဝွံ သ္ဂးရ။
အကြာဒပ် မန်၊ ကရေၚ် ကေုာံ ဒပ် PDF တံဂှ် ဂွံထိၚ်ဒဝ်ညးသ္ကအ်၊ သွက်ဂွံကဵုအရီုဗၚ် ညးသ္ကအ် မပါလုပ် ဂွံထ္မံက်ပရေၚ်ပၞာန် မအံၚ်ဇၞးမာန် ရန်တၟံသာ်ဏံတုဲ စွံတၚ်တုပ်စိုတ်တုဲ ဒးရေၚ်တၠုၚ်ဒၟံၚ်ရောၚ် ကဵုလဝ်သမ္တီရ။
သ္အာၚ်နူဂှ်ပၠန် ရန်တၟံလဝ် သီုသ္ဂောံတာဒၞါ ကရောၚ်ပၞာန်ကံၚ်ဇြဳပၞာန် မလုပ်စိုပ်ဒၟံၚ် အပ္ဍဲပွိုၚ်ဍုၚ်ဍာ်ဗု ရးတၞၚ်သဳ ဗွဲမစိုပ်တရဴမာန်ကီု မဒှ်ရ။
ဒပ်ကံၚ်ဇြဳပၞာန်ဝွံ သၞာံဏံ အပ္ဍဲရာသဳကညၚ်ဏံ ထ္ပက်ကၠုၚ်ကရောၚ်ပၞာန် ချဳဒရာၚ်ကၠုၚ်ပရေၚ်ပၞာန် မွဲဒမြိပ်ပွိုၚ်ဍုၚ်ဍာ်ဗုတံ နွံကၠုၚ်စေအ်အ်ဏောၚ်ဂှ် နာဲနဂါ ဟီုလဴထ္ၜးလဝ် သာ်ဏံရ။
“ပွဳပွူကွာန်မေန်တာ ဒၞါဲဌာန်ဂအုပ်ဒပ်ဍာ် မောရဝတဳ ဖျေံသ္ဇိုၚ်ဂှ် ချဳဒရာၚ်ဒၟံၚ် နကဵုကရောၚ်ပၞာန်ၜါ ပံၚ်လဝ် တမ်ဒပ်သၞ ပိပန်ဒပ်ဂှ် နွံတုဲ နူကဵုမှာသၟိတ်ဂှ်လေဝ် သွက်ဂွံထံက်ပၚ်ရီုဗၚ် ချဳဒရာၚ်ဒပ်ဍေံတံဂးတုဲ က္ၜၚ်ပၞာန်ဇၞော်ဇၞော်တံ ချဳဒရာၚ်ဒၟံၚ် စေအ်အ်နွံဒၟံၚ်ရ။ ပွိုၚ်ဍုၚ်ဍာ်ဗု ဗွဲတၟေၚ် ပ္ဍဲဗ္ဒိုပ်ဒပ်ဍာ် မောရဝတဳဂှ်ရ” သာ်ဝွံ သ္ဂးရ။
ပ္ဍဲဂိတုဨပရဴ ၂၀ တေံ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံပၠန်ဂတးရပ်လွဟ် ချဳဒရာၚ်ဖျေံဒၟံၚ်သ္ဇိုၚ် ပ္ဍဲကွာန်မေန်တာဂှ် ပေါဲဗ္တိုက်ဆေၚ်မုက်တံ က္တဵုဒှ်လဝ်ရ။
လ္ပာ်ကံၚ်ဇြဳပၞာန် ချဳဒရာၚ်ထ္ပက်ကၠုၚ်ကရောၚ်ပၞာန်သာ်ဏံ သ္ကာတ်တ်မြဟ်ဟ်ဂှ်ဝွံ ပ္တိတ်ကၠုၚ်ဇြဟတ် သွက်ဂွံကလေၚ်ထိၚ်ဒက် ဂၠံၚ်ဇၞော်ပျဳထံၚ်သု စၟတ် ၈ သ္ကုတ်ဂၠံၚ်ရေဝ်−ထဝါဲဂှ်ဏောၚ် သ္ဂးရ။
ဣဏံဝွံ သွက်ဂွံထ္မံက်ရုပ်ရဴ ကိုန်စဳမာန်ပရေၚ်ပိုန်ဒြပ်တၟေၚ်ထဝါဲ အကြာရုယှာကဵုကံၚ်ဇြဳပၞာန် မတုပ်လဝ်စိုတ်ဂှ် ဗွဲမပြဟ်မာန်ဂှ်တုဲ ပလေဝ်ပလေတ်ကၠုၚ် ဒပ်တိုက်၊ ဒပ်ဍာ်၊ ဒပ်ကျာ အပ္ဍဲပွိုၚ်ဍုၚ်ဍာ်ဗုဂှ် နာဲနဂါ ဟီုလဝ်ရ။
ပ္ဍဲအပိုၚ်အခြာဒေသပရေၚ်ပိုန်ဒြပ်တၟေၚ်ထဝါဲဂှ် ပ္ဍဲဂိတုဖေဖဝ်ဝါရဳသၞာံဏံဂှ် ကံၚ်ဇြဳပၞာန် ကေုာံ ရုယှာ တုပ်လဝ်စိုတ်ထ္ပက်လဝ်စၟတ်တဲ လိက်ကသုက်စပ်ကဵုပရေၚ်ဓလိုက်တမ်ရိုဟ် ၉ ဂကူ ပါလုပ်သီုကဵုပရေၚ်သိုၚ်ခၞံ သၞေဟ် ကေုာံ ရုၚ်စက်ဍုန်ကၠေၚ်ဍေန်တံရ။
ပရိုၚ်−သြၚ်လောန်တိုၚ်(မ်)
ဗီု−CJ