ကအ်ကြိက်၊ ဨပရဴ ၂၄
ကံၚ်ဇြဳပၞာန် ၜိုန်လလောၚ်တြးလဝ် ပပဵုပ္တိုန်အာယုက်ဒေါအ်ပန်ပှော် ဒဵုကဵုဂိတုဨပရဴအိုတ်ဏောၚ်ကီုလေဝ် ကွာန်နွံပွဳဗွိုၚ်ကရပ်ဍုၚ်ကအ်ကြိက်ကဵု ဍုၚ်ကြုၚ်ဒဵု တွဵုရးကရေၚ်တံဂှ် ဒပ်ကံၚ်ဇြဳပၞာန် ဆက်ဗ္တိုက်ဒၟံၚ်ကဵုပၞာန်ကျာရောၚ် တမ်ရိုဟ်ပရိုၚ်ဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုကွာန် နွံဗွဲဒိုဟ်သၟဝ်ကျာ ဍုၚ်ကအ်ကြိက်ကဵု ပ္ဍဲကဵုကွာန် နွံမွဲဒမြိပ်ဂၠံၚ်ကွဳစက် ကြုၚ်ဒဵု−ကအ်ကြိက်ဂှ် စနူဂိတုဨပရဴ ၁၄ တေံတုဲ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတး သၟဝ်သ္ကိုပ်သ္က KNLA တံ ဒှ်လဝ်ပေါဲဗ္တိုက်ဗွဲမသ္ကာတ်မြဟ်တုဲ ပေါဲဗ္တိုက်ဆက်ဒှ်ဒၟံၚ် စဵုကဵုဂိတုဨပရဴ ၂၃ ရ။
ပ္ဍဲဂိတုဨပရဴ ၂၃ ဂှ်တှ်ေ ဒပ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ် နကဵုက္ၜၚ်ကျာ Y-12 ပ္ဍဲကဵုကွာန် နွံကရပ်ဍုၚ်ကြုၚ်ဒဵုကဵု ဍုၚ်ကအ်ကြိက်တံဂှ်တုဲ ပ္ဍဲဂိတုဨပရဴ ၂၂ ဂှ်လေဝ် ကွာန်နွံပွဳဗွိုၚ်ဗ္ဒိုပ်(ရၚ်ကွဲတောၚ်) ကွာန်မျပတိုၚ်ကဵု ကွာန်ကမ္မရာ နွံသ္ကုတ်သၟဝ်ကျာဍုၚ်ကအ်ကြိက်တံဂှ် ဒပ်ကံၚ်ဇြဳပၞာန် ဗ္တိုက်လဝ်နကဵုပၞာန်ကျာရ။
ဟိုတ်နူဒပ်ကံၚ်ဇြဳပၞာန် ဗ္တိုက်လဝ်ကဵုပၞာန်ကျာဂှ်တုဲ နူကွာန်ကမ္မရာဂှ် ကောန်ၚာ်သၟတ်မပါလုပ် ညးဍုၚ်ကွာန်ကောန်အရာပ် ၅ တၠ ဇီုကပိုက်ကလိဂွံလဝ်ဝပ်တုဲ ဒးပလံၚ်ပ္တိုန်လဝ်ရုၚ်ဂဥုဲတုဲ လွဳလွတ်ဒၟံၚ်ရောၚ် တမ်ရိုဟ်ပရိုၚ်ဒေသဂမၠိုၚ် ဟီုလဝ်ရ။
အပ္ဍဲပေါဲဗ္တိုက်ပွိုၚ်မွဲသတ္တာဟပြၚ်ဂှ် ဒပ်ကံၚ်ဇြဳပၞာန် စွံပွန် လ္တူကွာန်ဒၞါဲညးဍုၚ်ကွာန်ကောန်အရာပ်တံ မံၚ်တန်တဴတံဂှ်တုဲ ဟိုတ်နူထောံမခတိုဟ်ကဵုပၞာန်ကျာ ကေုာံ ပန်ပှော်ကဵုလွဟ်ဇၞော်တံဂှ်တုဲ ညးဍုၚ်ကွာန်ကောန်အရာပ် ၂၀ တၠပြၚ် ဒးချိုတ်အာလဝ်တုဲ ၂၀ တၠပြၚ် ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြး ဂကောံပၠန်ဂတးတံကဵု ညးဒေသတံရ။
အပ္ဍဲကဵုပရေၚ်ဗ္တိုက်ပန်ပှော် ဒပ်ကံၚ်ဇြဳပၞာန်တံဂှ် မ္ၚးနူစမြိုၚ်သ္ၚိဒၟံၚ် ညးဍုၚ်ကွာန်ကောန်အရာပ်တံဂှ် ဘာဗ္တောန်လိက်ကဵု ဘာလကျာ် ဗွဲမဂၠိုၚ် ဇီုကပိုက်ဒးလီုလာ်အာလဝ်တုဲ ဒပ်ကံၚ်ဇြဳပၞာန်ဂှ်တှ်ေ ဒၞါဲပေါဲဗ္တိုက်ဒှ်ကီု သီုဒၞါဲပေါဲဗ္တိုက်ဟွံဒှ်ကီုတံဂှ် ထောံမံၚ်မခတိုဟ်ပန်ပှော်ဒၟံၚ်ရောၚ် တမ်ရိုဟ်ပရိုၚ်ဒေသဂမၠိုၚ် သ္ဂးရ။
ပ္ဍဲကဵုပေါဲဗ္တိုက်ကြုၚ်ဒဵု ကအ်ကြိက် လအ်ကၠုၚ်ပွိုၚ်မွဲသတ္တာဟပြၚ်ဂှ် ဂကောံဇြဟတ်ပၠန်ဂတးတံ သီဂွံလဝ် ဗ္ဒိုပ်သၞေဟ်ကၚ်သီုဖအိုတ် မၞုံပ္ဍဲကဵုသ္ကုတ်ဂၠံၚ်ကြုၚ်ဒဵု−ကအ်ကြိက် နူ(နွားခြံကုန်း) စဵုကဵု ၉ တိုၚ်ဂှ် သ္ဂးရ။
သ္အာၚ်နူဂှ်ပၠန် ပ္ဍဲကဵုလ္ပာ်ဂၠံၚ် နဘူး−တံတားကျိုး သၟဝ်ကျာဍုၚ်ကအ်ကြိက်ဂှ် သီဂွံလဝ် ဗ္ဒိုပ် ( ရၚ်ကွဲတောၚ်) မဒှ်ဗ္ဒိုပ်ကၚ်စဵုဒၞါ ဌာန်ဂအုပ်ပၞာန် စကခ ၁၂ ဂှ် ဂွံတီကေတ် အတိုၚ်ဂလာန် ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ