တၞၚ်သဳ၊ ဨပရဴ ၂၄
ပ္ဍဲရးတၞၚ်သဳ အပ္ဍဲဂိတုမာတ်တုဲကၠုၚ်တေံ မ္ၚးနူပေါဲဗ္တိုက်ၜါလ္ပာ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ဟိုတ်နူဗ္တိုက်ကဵုပၞာန်ကျာတုဲ ကောန်အရာပ် ဗ္ဒါဲထပှ်တၠ ဒးပါဲလဝ်ဘဲပၞာန်ရောၚ် ဂွံတီကေတ် အတိုၚ်လိက်ဒုၚ်စဳရေၚ် ဂကောံသုတေသနအပ္ဍဲဒေသ FE5 Thanintharyi ရ။
အပ္ဍဲဂိတုမာတ်ဂှ် ဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် လ္ပာ်ဂၠံၚ်ဇၞော်သွံရာန်ဗၞိက်တံ၊ ထ္ပက်ဒၟံၚ်ကရောၚ်ပၞာန် ဒၞါဲဒေသသၞေဟ်ဍာ်ဒမျိုဟ်တံဂှ်တုဲ ဒၟါနူပေါဲဗ္တိုက်၊ ဒၟါနူပရေၚ်ဗ္တိုက် နူကဵုတရဴဍာ်၊ တရဴကျာ ကေုာံ ဟိုတ်နူပရေၚ်ရပ်ဒက်ပြိုက်ဂစိုတ်တံဂှ်တုဲ ဒးဂြိပ်ဒဴထောံလသာဌာန်ဒၟံၚ် သာဂၠိုၚ်ကၠုၚ်လဝ်ရ။
ပ္ဍဲခရိုၚ်ထဝါဲ ပ္ဍဲကဵုပွိုၚ်ဍုၚ်ထဝါဲ၊ ပွိုၚ်ဍုၚ်လံၚ်လုၚ်၊ ပွိုၚ်ဍုၚ်ဍာ်ဗု ကေုာံ ပွိုၚ်ဍုၚ်တယိတ်ချံၚ်တံဂှ် ညးဍုၚ်ကွာန်ထောံလသာသ္ၚိဌာန် ဒးဂြိပ်ဒဴဒၟံၚ်တံ အောန်အိုတ် ၂၇၃၀၀ ပြၚ် နွံလဝ်ရ။
လအာတုပ်သာ်ဂှ်ကီု ပ္ဍဲခရိုၚ်ဗိက် ပ္ဍဲပွိုၚ်ဍုၚ်ပဠဝ်၊ ပွိုၚ်ဍုၚ်တၞၚ်သဳ၊ ပွိုၚ်ဍုၚ်ဗိက် ကေုာံ ပွိုၚ်ဍုၚ်ကျောန်သုတံဂှ်လေဝ် ပါဲနူပေါဲဗ္တိုက်ဒှ်ဂှ် သီုဒးဒုၚ်ဗ္တိုက်ကဵုပၞာန်ဍာ် ကေုာံ ပၞာန်ကျာတံဂှ်တုဲ ညးဒးထောံလသာဌာန်ဒၟံၚ် အောန်အိုတ် ၃၉၅၀၀ ပြၚ် နွံလဝ်ရောၚ် FE5 Thanintharyi သ္ဂးရ။
ပ္ဍဲကဵုဏံ ညးမမံၚ်စံၚ် ပ္ဍဲဗ္ဒိုပ်ပါဲဘဲပၞာန်ပဠဝ်ဂှ် ၜိုတ်ပွဳပွူ ၃၀၀၀ ရနွံတုဲ မၞိဟ်သှ်ေတံဂှ်ဝွံ ဒးဂြိပ်ဒဴပါဲဒလေတ်ဒၟံၚ် လ္ပာ်ဒဵုဂြိုပ်၊ ကၠအ်ဂူ၊ ဍုၚ်၊ ကွာန် ဒၞါဲမကြပ်တံဂှ်ရောၚ် ထ္မံက်ထ္ၜးလဝ်ရ။
ပ္ဍဲပွိုၚ်ဍုၚ်တၞၚ်သဳဂှ်လေဝ် ဟိုတ်နူဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် အရိုဟ်ဒဒှ်တ္ၚဲကီု သီုကဵုဗ္တိုက်ဒၟံၚ်ပၞာန်ကျာတံဂှ်တုဲ ညးဍုၚ်ကွာန် ဗ္ဒါဲ ၁၈၅၀၀ ကြပ်အလုံကွာန်မွဲ ဒးဂြိပ်ဒဴပါဲဒလေတ်ဒၟံၚ်ရောၚ် သ္ဂးရ။
သ္အာၚ်နူဂှ်ပၠန် ညးပါဲဘဲပၞာန် မၞုံအပ္ဍဲရးတၞၚ်သဳတံဂှ်ဝွံ ဒှ်ဒၟံၚ်ယဲဇွဟ်ဂစေံ၊ ယဲဂၞဴ၊ ယဲဇၞော် ကေုာံ ယဲစပ်ကဵုဂၠံၚ်ယဝီုကျာတံဂှ်တုဲ တ္ၚဲဂၠိၚ်သ္ၚောဲကၠုၚ်ဗက် ဟိုတ်နူဒၟါဲမံၚ်၊ ဂဥုဲဇဗ ဟွံရုမ်ဂပ်တံဂှ်တုဲ သာတုဲဒှ်ဒၟံၚ်ဒဒိုက်ယျဂှ် ကိုဝ်ကျဝ်သာန်မေန် မဒှ်ကောန်ဂကောံ FE5 Thanintharyi ဟီုရ။
ပ္ဍဲဂိတုဖေဖဝ်ဝါရဳတုဲကၠုၚ်တေံဂှ်လေဝ် ပ္ဍဲရးတၞၚ်သဳဂှ် မ္ၚးနူပေါဲဗ္တိုက်ၜါလ္ပာ်ဂှ် ဟိုတ်နူပရေၚ်ဗ္တိုက်ကဵုပၞာန်ကျာတုဲ ညးဒးဂြိပ်ဒဴထောံလသာဌာန်ဒၟံၚ် နွံကၠုၚ် စဵုကဵု ၆၈၄၀၀ ပြၚ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−ဒေါနတနၚ်္သာရီ