မတ်မလီု၊ ဨပရဴ ၂၄
ၚုဟ်ထဝ်မဳဠေန်အပ္ဍဲဍုၚ် မကဆေတ်တိုန်ကၠုၚ်ဒၟံၚ်သိုက်က်ဂှ်ဝွံ ကရောံၚုဟ်ထဝ်ဂၠးတိသၠုၚ်တိုန်ကၠုၚ်ဂှ် မွဲဒ္ကေဝ် ၚုဟ်သၠုၚ်တိုန်ကၠုၚ် စဵုကဵု ၇၅ ကိုဋ်ဒ္ကေဝ်ရောၚ် တၠကမၠောန်ထဝ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်((မ်) ရ။
ကၠာအတးဟွံဂွံစှ်ေ ပ္ဍဲဂိတုဨပရဴ သတ္တာဟပထမတေံဂှ် ၚုဟ်ထဝ် မွဲဒကေဝ် ၇၀ ကိုဋ်ရ နွံကၠုၚ်လဝ်ဂှ်ဝွံ အတးတုဲ ပ္ဍဲဂိတုဨပရဴ ၂၃ ဂှ် မွဲဒ္ကေဝ် ၚုဟ်ထ္ပက်တိုန်ကၠုၚ်လဝ် စဵုကဵု ၇၅ ကိုဋ်ဒ္ကေဝ်ရ။
ၚုဟ်ထဝ်ဂၠးတိဂှ်လေဝ် ထံၚ်မွဲအံက်သ နူ ၃၀၄၀ အမေရိကာန်ဒဝ်ဠာဂှ် ဒှ်ကၠုၚ် စဵုကဵု ၃၃၂၀ ဒဝ်ဠာအမေရိကာန်တုဲ မွဲအံၚ်သမ္ဂး ၚုဟ်သၠုၚ်တိုန်ကၠုၚ် ဗ္ဒါဲ ၃၀၀ ဒဝ်ဠာရ။
တၠကမၠောန်ထဝ်မွဲတၠဂှ်တှ်ေ ၚုဟ်ထဝ်အပ္ဍဲဍုၚ်ဝွံ ဟိုတ်နူပေါဲပၞာန်ဗၞိက် အကြာအမေရိကာန်ကဵုကြုက်ဂှ်တုဲ ၚုဟ်ထဝ်ဂၠးတိ မ္ဒးသၠုၚ်တိုန်ကၠုၚ်တုဲ ၚုဟ်ထဝ်အပ္ဍဲဍုၚ်လေဝ် ဗက်တိုန်ကၠုၚ်ကီုဂှ် ဟီုလဝ်ရ။
“လၟုဟ်ဂှ် အမေရိကာန်ကဵုကြုက် ဒှ်ဒၟံၚ်ပေါဲပၞာန်ပရေၚ်ပိုန်ဒြပ်တုဲ ဟိုတ်နူအကာဲအရာတံဏံတုဲ လ္တူဂၠးတိဏံ ကမၠောန်ဂမၠိုၚ် ဇြဟတ်ဍိုန်စှ်ေအာတုဲ ဂတးကၠုၚ်က္ဍိုပ် လ္ပာ်သတံက်မာကေတ်၊ လ္ပာ်ထဝ်တံဂှ်တုဲ ၚုဟ်ထဝ်ဂၠးတိဂှ် တိုန်အာရ။ အခါၚုဟ်ထဝ်ဂၠးတိတိုန်အာဂှ် ၚုဟ်ထဝ်ဍုၚ်ဗမာဂှ်လေဝ် ဗက်တိုန်ကၠုၚ်ကီုရ” သာ်ဝွံ သ္ဂးရ။
ၚုဟ်ထဝ်အပ္ဍဲဍုၚ် သၠုၚ်တိုန်ကၠုၚ်တုဲ ပ္ဍဲကဵုဒေသ ဒးဘဲဒဏ်သဘာဝတံဂှ် လ္တူနူဇြဟတ်ရာန်ဂှ် ဇြဟတ်သွံ ဂၠိုၚ်ဒၟံၚ်တုဲ ပ္ဍဲဒေသသှ်ေတံဂှ်တှ်ေ ဗွဝ်ဖျာညိၚ်ဒၟံၚ် နွံဂှ် တၠကမၠောန်ဂမၠိုၚ် သ္ဂးအိုတ်ရ။
ကြဴနူၚုဟ်ထဝ်အပ္ဍဲဍုၚ် သၠုၚ်တိုန်ကၠုၚ်တုဲဂှ် နကဵုဆေၚ်ဖျာ သွံတြးဒၟံၚ်ထဝ်လ္ၚဵုတံ သွံရာန်ဒၟံၚ် မွဲဒ္ကေဝ်မ္ဂး ခြာလဝ်ၚုဟ် နူ ၆၀၀၀၀ ဒ္ကေဝ် စဵုကဵု ၈၀၀၀၀ ဒ္ကေဝ် နွံတုဲ လ္ပာ်ကံၚ်ဇြဳပၞာန် မၚ်ရံၚ်ဒၟံၚ်တံ နွံဒၟံၚ်ရ။
ၚုဟ်ထဝ်အပ္ဍဲဍုၚ် သၠုၚ်တိုန်ကၠုၚ် စဵုကဵု ၇၅ ကိုဋ်ဒ္ကေဝ်ကီုလေဝ် ပ္ဍဲဂိတုဨပရဴ ၂၃ ဂှ် ၚုဟ်ထဝ်ကံၚ်ဇြဳပၞာန်တံ မခုတ်ပ္တန်လဝ်ဂှ် နွံၜိုတ် ၅၆ ကိုဋ်ဒ္ကေဝ်ဓဝ်ရတုဲ မွဲဒ္ကေဝ်မ္ဂး ၚုဟ်ဍေံကွာဒၟံၚ် ဗ္ဒါဲ ၁၉ ကိုဋ်ဒ္ကေဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media