လာယှိုဝ်၊ ဨပရဴ ၂၄
သွက်ဂွံမၚ်ရံၚ် ပရေၚ်ဒေါအ်ပန်ပှော် အကြာကံၚ်ဇြဳပၞာန်ကဵု MNDAA တုဲ ဍုၚ်ကြုက် ဗလးနၚ် ဂကောံမၚ်ရံၚ်ပရေၚ်ဒေါအ်ပန်ပှော် ပ္ဍဲဍုၚ်လာယှိုဝ်ဂှ် ကံၚ်ချေန်ဂါန် ညးမၞုံအခေါၚ်ဟီုဂး ဌာနဝန်ဇၞော်ကာဍုၚ်သ္အာၚ်ဍုၚ်ကြုက် ဟီုပ္တိတ်လဝ် ပ္ဍဲဂိတုဨပရဴ ၂၂ တေံရ။
ကောန်ဂကောံ MNDAA တအ် ကြဴနူဆုတ်ကလေၚ် နူကဵုဍုၚ်လာယှိုဝ် ဍုၚ်ဗၟာသ္ကုတ်သၟဝ်ကျာဂှ်တုဲဂှ် ပ္ဍဲဂိတုဨပရဴ ၂၂ ဂှ် ကောန်ဂကောံဒပ်ကံၚ်ဇြဳပၞာန်တံ လုပ်စိုပ်ကၠုၚ်တုဲ စပ်ကဵုကလေၚ်လှဲပြံၚ် အခေါၚ်အုပ်ဓုပ်ဒေသမဆေၚ်စပ်ဂှ်တုဲ အလဵုအသဳကြုက် ကလေၚ်သှ်ကၠုၚ်လဝ် ပ္ဍဲပေါဲသောၚ်ကလးလိက်ပရိုၚ်ရ။
ပေါဲသဳကၠဳ ကံၚ်ဇြဳပၞာန် ကဵု MNDAA ပ္ဍဲကူမေန်ဂှ် သွက်ဂွံထ္မံက်ရုပ်ရဴ တၚ်တုပ်စိုတ်ဂမၠိုၚ်မာန်ဂှ် ဟိုတ်နူဂကောံၜါလ္ပာ် ကော်ဘိက်ကၠုၚ်လဝ်တုဲ ခြာဟွံလအ်ဂှ် ဍုၚ်ကြုက် ဗလးနၚ်ဂကောံမၚ်ရံၚ်ဒေါအ်ပန်ပှော် ပ္ဍဲဍုၚ်လာယှိုဝ်ရောၚ် သ္ဂးရ။
ဂကောံဏံဝွံ မၚ်ရံၚ်အာ ပရေၚ်ဒေါအ်ပန်ပှော် အကြာကံၚ်ဇြဳပၞာန်ကဵု MNDAA ဏောၚ်တုဲ သ္ပအာသက်သဳ ဒဒှ်မလှဲပြံၚ်ဍုၚ်လာယှိုဝ် ဗွဲမကလိတ်ကလောတ်တုဲဒှ်ဂှ်ဏောၚ်ဂှ် ညးမၞုံအခေါၚ်ဟီုဂး ဌာနဝန်ဇၞော်ကာဍုၚ်သ္အာၚ်ဍုၚ်ကြုက် ထံက်ထ္ၜးဟီုလဝ်ရ။
ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ်ဂှ်တှ်ေ ကံၚ်ဇြဳပၞာန် သ္ပပဓာန်ကဵုကြုက်တုဲ ပ္ဍဲကဵုတိဍာ်ကဝ်ကထိၚ်ဒက်လဝ်တံဂှ် ကဵုကၠုၚ်ဇြဟတ်ဓရိုဟ် စဵုကဵုကၠောန်ကၠုၚ်ပေါဲရုဲမာဲမာန်တုဲ ဂကောံၜါလ္ပာ်ဂှ်လေဝ် ဟိုတ်နူဒေါအ်လဝ်ပန်ပှော်တုဲ အာဇီုကပိုက် လ္တူ TNLA နကဵုပရေၚ်ပၞာန်မာန်ဂှ် သ္ၚဳဂၠိပ်လဝ်ရ။
“ကံၚ်ဇြဳပၞာန်ဂှ်တှ်ေ ပ္ဍဲဒၞါဲကဝ်ကထိၚ်ဒက်လဝ်တံဂှ် ကေတ်သဂံၚ်ကဵုကြုက်တုဲ စဵုကဵုကၠောန်ဗဒှ်ပေါဲရုဲမာဲထ္ၜးစမာန်ဂှ် ကဵုကၠုၚ်ဇြဟတ်ဓရိုဟ်မာန်ဏောၚ် အဲချိၚ်ခယျကေတ်ရ။ ကဵုလာယှိုဝ်တုဲတှ်ေ ပရေံမွဲဂှ်တှ်ေ ဒေါအ်လဝ်ပန်ပှော် ကုဂကောံကဝ်က MNDAA ဂှ်နွံ။ အေ ဂှ်တှ်ေ လ္ပာ်တေံ အာကဵုဇြဟတ်ဓရိုဟ် လ္ပာ် TNLA ဒှ်မာန်ဏောၚ်။ မုဟိုတ်ရောတှ်ေ ပ္ဍဲရးသေံသၟဝ်ကျာဂှ် သၞကံၚ်ဇြဳပၞာန်ဟီုဂှ် ၜိုတ် TNLA, BPLA, PDF မာန္တလေဝ်တံရ နွံ ဒှ်အာဗီုဏံရ။ ဇြဟတ်ဂကောံမွဲမွဲဂကောံ ဒေါအ်အာပန်ပှော်ဂှ် စှ်ေအာကွေံကွေံဏောၚ်။ Side Effects ဂှ် အာဒးလ္ပာ် TNLA ဂၠိုၚ်” သာ်ဝွံ သ္ဂးရ။
ဒပ်ကဝ်က MNDAA မ္ဒးဆုတ်ကလေၚ်အာ နူလ္တူဍုၚ်လာယှိုဝ် မထိၚ်ဒက်လဝ်ဂှ်ဝွံ ဆက်ကေတ်လဝ်ဒၞါဲ မ္ၚးဍုၚ်ကေုာံ ပ္ဍဲကွာန်ရးတံဂှ်တုဲ ကံၚ်ဇြဳပၞာန်ဂှ်တှ်ေ ဂကောံအုပ်ဓုပ်ဌာနမဆေၚ်စပ်တံကဵု ကောန်ဂကောံဒပ်ဂမၠိုၚ် ကလေၚ်ကေတ်အာဒၞါဲ ပ္ဍဲအရာပ်လ္တူဍုၚ် ၁၂ အရာပ်ဂှ်ဏောၚ် မဒှ်ရ။
ကံၚ်ချေန်ဂါန် ညးမၞုံအခေါၚ်ဟီုဂး ဌာနဝန်ဇၞော်ကာဍုၚ်သ္အာၚ်ဍုၚ်ကြုက်ဂှ်တှ်ေ ပ္ဍဲအရာထိၚ်ဒဝ် ပရေၚ်ၜိုဟ်လလမ် ကေုာံ ပရေၚ်ညိၚ်ဝတ် ပ္ဍဲဍုၚ်ဗၟာသ္ကုတ်သၟဝ်ကျာဂှ် ဂကောံၜါလ္ပာ် ဒဒှ်ရတၚ်တဴဂုန် အခန်ကဏ္ဍဍုၚ်ကြုက် မဒှ်တဴအထံက်အပၚ်တံဂှ်ရောၚ် သ္ဂးရ။
အခိၚ်လၟုဟ် ဂကောံမၚ်ရံၚ်ဒေါအ်ပန်ပှော် ဍုၚ်ကြုက် မဗလးလဝ်ဂှ်ဝွံ တိတ်စ္ဍးအာ နူဍုၚ်လာယှိုဝ်တုဲ၊ ဟွံတုဲဂှ် ဟွံဂွံတီကေတ်ဏီတုဲ စပ်ကဵုပရေၚ်လှဲပြံၚ်ဍုၚ်ဂှ်တုဲလေဝ် ကံၚ်ဇြဳပၞာန်ကေုာံ MNDAA တံ လလောၚ်ပ္တိတ်လဝ်ပရိုၚ်ဂှ် ဟွံမွဲဏီရ။
ကြဴနူ ဂကောံပံၚ်ကောံတံကဵု MNDAA တံ သီဂွံ ဍုၚ်လာယှိုဝ် ဒၞါဲဌာန်ဂအုပ်ပၞာန်ရးဨသာန် နွံပ္ဍဲရးသေံသၟဝ်ကျာတေံ ပ္ဍဲသၞာံ ၂၀၂၄ ဂိတုအဝ်ဂါတ်မံက်ဂှ်တုဲ အလဵုအသဳကြုက် ကဵုလဝ်ဇြဟတ်ဓရိုဟ် သွက်ဂွံဒေါအ်ပေါဲဗ္တိုက်ရ။
လုကဴဟွံဆုတ်ကလေၚ်နူဍုၚ်လာယှိုဝ်မ္ဂး အလဵုအသဳကြုက် ကေတ်လဝ်အရေဝ် ကု MNDAA နကဵုထပိုတ် ၅ ထပိုတ်ဂှ်ရ ဒးလလောၚ်တြးလဝ် သွက်ဂွံသဳကၠဳ လ္ဂောံကဵုပရေၚ်ဍုၚ်ကွာန်ဂှ်တုဲ အရာမဖဍိုန်ဖျေံလဝ် ပရေၚ်ကရေပ်ဓရတ်တံလေဝ် နွံလဝ်ရ။ ပ္ဍဲဂိတုဂျာန္နဝါရဳဂှ်တှ်ေ ဟိုတ်နူအလဵုအသဳကြုက် ပ္ညဳပ္ညပ်ကဵုတုဲ ပ္ဍဲဍုၚ်ကူမေန်ဂှ် ကံၚ်ဇြဳပၞာန် ကေုာံ MNDAA ဆဵုဂဗသဳကၠဳလဝ်ရ။
ဟိုတ်နူသွဟ်နူကဵုပေါဲသဳကၠဳဂှ်တုဲ ထ္ပက်လဝ်စၟတ်တဲ လိက်ကသုက်ဒေါအ်ပန်ပှော်ၜါလ္ပာ်ရောၚ် လ္ပာ်အလဵုအသဳကြုက် ဟီုပ္တိတ်လဝ်တုဲ အခိၚ်လၟုဟ်ဂှ်တှ်ေ MNDAA ဒှ်ကၠုၚ်သ္ဂောံဆုတ်ကလေၚ် နူကဵုဍုၚ်လာယှိုဝ်ရ။
နကဵုကံၚ်ဇြဳပၞာန် ၜိုန်ကျဒၟံၚ် လ္ပာ်ပရေၚ်ပၞာန်ကီုလေဝ် ဟိုတ်နူဂွံကၠုၚ်အခေါၚ်လုပ်စိုပ်ဍုၚ်လာယှိုဝ် အလန်ပထမ နကဵုဇြဟတ်ဓရိုဟ်ကြုက်ဂှ်တုဲ ဒးစွံသတိဏောၚ်ဂှ် ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ်ဂှ် ထံက်ထ္ၜးလဝ်ရ။
“လ္ပာ်ပရေၚ်ပၞာန်ဂှ် ကျဒၟံၚ်နွံကီုလေဝ် မွဲလ္ပာ်ဂှ်တှ်ေ အလန်ပထမကၠာအိုတ် စလုပ်ကၠုၚ်ဍုၚ်လာယှိုဝ် နကဵုဇြဟတ်ဓရိုဟ်ဍုၚ်(ကြုက်) ဇြဟတ်ဇၞော်ရ။ ဆ္ဂး ဗျူဟာကံၚ်ဇြဳပၞာန် ဗျူဟာက္ဍိုပ်လုပ်ဇကုတိတ်ဏံဂှ် ဒးစွံသတိဏောၚ်။ လၟုဟ်လေဝ် ကရေပ်ဓရတ်တုဲ အာတ်မိက်ကၠုၚ်ဒၟံၚ်တံ နွံဒၟံၚ်ဂှ် ဂွံမိၚ်ကေတ်တုဲ MNDAA ကဵု ဒပ်ပံၚ်ကောံ ဒပ်ပၠန်ဂတးတံ သာ်လဵုခၠေဝ်ပလန်အာရောဟီုဂှ် ဆက်တုဲဒးမၚ်ရံၚ်ဏောၚ်” သာ်ဝွံ သ္ဂးရ။
အလဵုအသဳကြုက်ဂှ်တှ်ေ ညံၚ်လၟေၚ်ကမၠောန်ပေါဲသဳကၠဳကူမေန် ဂွံတောတက်ဂှ် ဆက်ကၠောန်အာဏောၚ်တုဲ ပ္ဍဲဍုၚ်ဗၟာသ္ကုတ်သၟဝ်ကျာ ညံၚ်ပေါဲပၞာန်ဂမၠိုၚ် ဂွံဒေါအ်ဒေၚ်အာဂှ် ကၠောန်အာပေါဲသဳကၠဳတံဏောၚ်ဂှ် ကဵုလဝ်သမ္တီ ပ္ဍဲပေါဲသောၚ်ကလးလိက်ပရိုၚ်ဂှ်ရ။
သ္အာၚ်နူဂှ်ပၠန် ပံၚ်တောဲရေၚ်တၠုၚ်အာ ပရေၚ်ၜိုဟ်လလမ် ကေုာံ ပရေၚ်ညိၚ်ဝတ် ပယျဵုကြုက်−ဗၟာ မွဲဟာန်ကေုာံဂကောံနာနာ နူကဵုဍုၚ်ဗၟာတံဏောၚ်ဂှ် ညးမၞုံအခေါၚ်ဟီုဂး ဌာနကာဍုၚ်သ္အာၚ်ဍုၚ်ကြုက် ဟီုလဝ်ဂှ် ရုၚ်ကလုတ်ကြုက်စပ်ကဵုဍုၚ်ဗၟာ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media