ကျာ်ထဝ်၊ ဨပရဴ ၂၅
တွဵုရးဍုၚ်မန် ပွိုၚ်ဍုၚ်ကျာ်ထဝ် ပ္ဍဲကဵုကွာန်(ခရွဲ) ကဵု ကွာန်(ၚှက်ပျောတော)ဂှ် ပေါဲဗ္တိုက်ဟွံမွဲမွဲသာ် ဟိုတ်နူဒပ်ကံၚ်ဇြဳပၞာန် ပန်ပှော်ကဵုလွဟ်ဇၞော်တုဲ ညးဍုၚ်ကွာန်ကောန်အရာပ်ပန်တၠ ဇီုကပိုက်ကလိဂွံလဝ်ဝပ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ်ဂိတုဨပရဴ ၂၄ အခိၚ်လဒေါဝ်တ္ၚဲ ၜိုတ် ၁၂ နာဍဳဂှ် နူဒပ်အမၠံက် စၟတ် ၃၁၀ ဖျေံသ္ဇိုၚ်ကျာ်ထဝ်ဂှ် ပန်ခ္ဍိုၚ်နၚ် လွဟ်ဇၞော် အပ္ဍဲကွာန်ခယဲ ဟွံအောန်နူပန်မ ကြာန်န်ရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်တုဲ ကိုဝ်ချက်ကျဳ ကေုာံ ကိုဝ်ဒဝ်က ညးၜါတၠ အာယုက် ၄၀ သၞာံပြၚ် ဒၟံၚ်ကွာန်ခယဲဂှ် ဇီုကပိုက်ကလိဂွံအာလဝ်ဝပ်ရ။
လအာတုပ်သာ်ဂှ်ကီု ပ္ဍဲဂိတုဨပရဴ ၂၄ အခိၚ်လဒေါဝ်တ္ၚဲ ၜိုတ် ၁၂ နာဍဳဂှ်လေဝ် ဒပ်ကံၚ်ဇြဳပၞာန် ထပ်ပန်ပှော်လဝ်လွဟ်ဇၞော်ၜါမတုဲ ဒတုံဗ္တိုဟ်ထ္ကးအာလဝ် ပ္ဍဲကွာန်( ၚှက်ပျောတော) တုဲ မၞိဟ်တြုံဒေသၜါတၠ ဇီုကပိုက်ကလိဂွံလဝ်ဝပ်ရောၚ် သ္ဂးရ။
အတိုၚ်ဂလာန်ညးဒေသတံဂှ်မ္ဂး ဟိုတ်နူဒပ်ကံၚ်ဇြဳပၞာန် ပန်ပှော်ကဵုလွဟ်ဇၞော်တုဲ ပ္ဍဲပယျဵုတွဵုရးဍုၚ်မန်ကဵု ရးဗဂေါ ပ္ဍဲကဵုလ္ပာ်ပွိုၚ်ဍုၚ်ယှိုဲကျေန် ကွာန်ကွေန်သုက်ဂှ် ပေါဲဗ္တိုက်သ္ကာတ်မြဟ်ဒၟံၚ်ဂှ်ရ ဒၞါဲဂကောံပၠန်ဂတးတံ နွံမာန်ရောၚ် ဒၞါဲမထေၚ်ကေတ်တံဂှ် ပန်ပှော်ဒၟံၚ်ကြာန်န် ဒှ်မာန်ရောၚ် သ္ဂးရ။
ပ္ဍဲပွိုၚ်ဍုၚ်ကျာ်ထဝ်ဂှ် စနူဂိတုဨပရဴ သတ္တာဟတတိယဂှ်တုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံဂှ် ပရေၚ်ပၞာန်ၜါလ္ပာ် သာကြံၚ်မ္ၚိုဟ်ဒၟံၚ်တုဲ လ္ပာ်ကံၚ်ဇြဳပၞာန် ပန်ပှော်ဒၟံၚ်ကဵုလွဟ်ဇၞော် သီုဗ္တံသီုတ္ၚဲရ။
ပရိုၚ်−သြၚ်လောန်တိုၚ်(မ်)
ဗီု−CJ