အပ္ဍဲပေါဲဗ္တိုက်ကအ်ကြိက်−ကြုၚ်ဒဵုဂှ် ညးပါဲဘဲပၞာန်ဂမၠိုၚ် ဒးဒုၚ်ဗ္တိုက်ဒၟံၚ်

ကအ်ကြိက်၊ ဨပရဴ ၂၅

ပ္ဍဲဍုၚ်ကအ်ကြိက်ကဵုဍုၚ်ကြုၚ်ဒဵု တွဵုရးကရေၚ် ဒၞါဲပေါဲဗ္တိုက်ၜါလ္ပာ် မသ္ကာတ်မြဟ်ဒၟံၚ်ဂှ် ဒၞါဲညးဍုၚ်ကွာန်ပါဲဘဲပၞာန်တံ မပါဲဒလေတ်ဒၟံၚ်ဂှ် ဒပ်ကံၚ်ဇြဳပၞာန် စွံကၠုၚ်ပွန်တုဲ ဗ္တိုက်ဒၟံၚ် နူကဵုပၞာန်ကျာရောၚ် တမ်ရိုဟ်ပရိုၚ်ဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုဨပရဴ ၂၃ အခိၚ်ဗ္တံဂှ် ပေါဲဗ္တိုက်ဒှ်လဝ်ဟွံမွဲမွဲသာ် ဒပ်ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာ ပ္ဍဲကွာန်ဝေန်က ပွိုၚ်ဍုၚ်ကြုၚ်ဒဵုဂှ်တုဲ သ္ၚိ ၃ မ၊ ဘာဗ္တောန်လိက် မွဲမ ဇီုကပိုက်လီုလာ်အာလဝ်တုဲ မၞိဟ်တြုံဒေသမွဲတၠ ဇီုကပိုက်ကလိဂွံလဝ်ဝပ်ဂှ် တမ်ရိုဟ်ပရိုၚ်ဒေသဂမၠိုၚ် သ္ဂးရ။

အခိၚ်ဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ ဒှ်ဒၟံၚ်ပေါဲဗ္တိုက်ၜါလ္ပာ် သ္ကာတ်မြဟ် ဗ္ဒါဲဍုၚ်ကြုၚ်ဒဵုကဵု ဍုၚ်ကအ်ကြိက်ဂှ် ပ္ဍဲကဵုကွာန်ဗ္ဒါဲပေါဲဗ္တိုက်ဒှ်ဒၟံၚ်တံ သီုကဵုဒၞါဲမသ္ၚောဲကဵုပေါဲဗ္တိုက်တုဲ ဒၞါဲညးဍုၚ်ကွာန်ပါဲဘဲပၞာန်တံ ဇူတန်တဴဒၟံၚ်ဂှ်လေဝ် ဒပ်ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာ လၟေၚ်ဒဒှ်တ္ၚဲရ။

ဒပ်ကံၚ်ဇြဳပၞာန် စွံပွန်ကဵု ဘာဗ္တောန်လိက် ကေုာံ စမြိုၚ်ဘုတ်ဘာ ဒၞါဲညးဍုၚ်ကွာန်ပါဲဘဲပၞာန်တံ ဇူတန်တဴဒၟံၚ် အဓိကတံဂှ်တုဲ ဗ္တိုက်ဒၟံၚ်ဂှ်ရ စွံသတိဗွဲတၟေၚ်တုဲ သွက်ဂွံဇူတဴ ပ္ဍဲကဵုဘာဗ္တောန်လိက်ကေုာံ ဘာလကျာ်တံအိုတ်ဂှ် အကြာညးဍုၚ်ကွာန်ရေၚ်သ္ကအ် ကဵုဒၟံၚ်သမ္တီတံလေဝ် နွံဒၟံၚ်ရ။

အပ္ဍဲပေါဲဗ္တိုက်ဒေသကြုၚ်ဒဵု ကအ်ကြိက်ဂှ် ဒပ်ကံၚ်ဇြဳပၞာန် စွံပွန်လ္တူညးဍုၚ်ကွာန်ကောန်အရာပ်တံတုဲ ဟိုတ်နူဗ္တိုက်ကဵုပၞာန်ကျာ ကေုာံ ပန်ကဵုလွဟ်ဇၞော်တံဂှ်တုဲ အပ္ဍဲကာလပေါဲဗ္တိုက် ပွိုၚ်မွဲသတ္တာဟပြၚ်ဂှ် ညးဍုၚ်ကွာန်ကောန်အရာပ် ၂၀ ပြၚ် ချိုတ်အာလဝ်တုဲ ဗ္ဒါဲ ၃၀ တၠ ဇီုကပိုက်ကလိဂွံလဝ်ဝပ်တုဲ ညးဍုၚ်ကွာန်မဂၠိုၚ်ဂၠေၚ် ဒးဂြိပ်ပါဲဒၟံၚ်ဘဲပၞာန်ရ။

ညးဍုၚ်ကွာန်ပါဲဘဲပၞာန် နူကဵုဒေသကြုၚ်ဒဵု ကအ်ကြိက် ဂမၠိုၚ်ဝွံ ပြဟ်ဟ်ဏံ ဒးဂဗဒၟံၚ်ကဵုအခက်အခုဲ ပရေၚ်ဇွောံမစၞစ ပရေၚ်လွဳလွတ် ဂဥုဲဇဗတံဂှ်တုဲ နွံပၟိက်ဒၟံၚ် သီုကဵုအရီုဗၚ်ပရေၚ်ဗ္စာရဏာမၞိဟ်ကာတၟေၚ်ဂှ် ဂကောံမှာဇန်ကရေၚ် မရီုဗၚ်ကဵုဒၟံၚ်ပရေၚ်ပါဲဘဲပၞာန် ပ္ဍဲဗလးတိဏံ သ္ဂးရ။

စနူဂိတုဨပရဴ ၁၄ တုဲ ဂကောံဇြဟတ်ပၠန်ဂတးတံ လုပ်စိုပ်ဗ္တိုက်လဝ် ဗ္ဒိုပ်သၞေဟ်ကၚ်ကံၚ်ဇြဳပၞာန် မဖျေံလဝ်ဒပ် လ္တူဂၠံၚ်အာယှ မဆက်စၠောံလဝ် ဍုၚ်ကြုၚ်ဒဵုကဵု ဍုၚ်ကအ်ကြိက် နူကဵု(နွားခြံကုန်း) ၄ တိုၚ် စဵုကဵု ၉ တိုၚ်ဂှ်တုဲ ပေါဲဗ္တိုက်ၜါလ္ပာ် က္တဵုဒှ်လဝ်ဗွဲမသ္ကာတ်မြဟ်တုဲ ဒပ်ကံၚ်ဇြဳပၞာန် ထောံလဝ်မခတိုဟ် ဗ္တိုက်လဝ် ကဵုပၞာန်ကျာ ဗွဲမသ္ကာတ်မြဟ်ရ။

အခိၚ်ကာလပေါဲဗ္တိုက် လအ်ကၠုၚ်စဵုကဵုပွိုၚ်မွဲသတ္တာဟပြၚ်ဂှ် ဂကောံဇြဟတ်ပၠန်ဂတးတံ သီဂွံလဝ် ဗ္ဒိုပ်  (ရၚ်ကွဲတောၚ်) ကအ်ကြိက်သ္ကုတ်သၟဝ်ကျာဂှ်ကဵု ဗ္ဒိုပ်ဒပ်ကံၚ်ဇြဳပၞာန် နွံမွဲဒမြိပ်ဂၠံၚ်ကြုၚ်ဒဵု−ကအ်ကြိက်ဂှ်တုဲ မ္ၚးနူကဵုဍုၚ်ကြုၚ်ဒဵုဂှ် ဂကောံဇြဟတ်ပၠန်ဂတးတံ ဗိုၚ်ကၟာတ်လဒဵု ဗ္တိုက်ဒၟံၚ် ဌာန်ဂအုပ်ပၞာန် စကခ ၁၂ ကဵု ဍုၚ်ကအ်ကြိက်ဂှ် ဂွံတီကေတ် အတိုၚ်ဂလာန် တမ်ရိုဟ်ပရိုၚ်ဗလးတိဂမၠိုၚ်ရ။

ပရိုၚ်−သြၚ်လောန်တိုၚ်(မ်)

ဗီု−CJ