နေဗျဳဒဝ်၊ ဨပရဴ ၂၅
တၚ်တုပ်စိုတ်အာဇြဳယာန် မသုန်သာ် အကြာအာဇြဳယာန်ကဵု က္ဍိုပ်သ္ကိုပ်ပၞာန်ဗၟာဂှ်ဝွံ ဗဒေါအ်ကၠေံ ပွပကီုပရာပ်ကံၚ်ဇြဳပၞာန်ဟွံဂွံတုဲ ဒှ်အာၜိုတ်အစဳဇန်ပရေၚ်ၜိုဟ်လလမ်လီုလီုရဂှ် Justice For Myanmar ထ္မံက်ထ္ၜးလဝ်ရ။
ပ္ဍဲဍုၚ်ဗၟာ ကြဴနူဒပ်ပၞာန်သီအဝဵုတုဲ ပ္ဍဲသၞာံ ၂၀၂၁ ဂိတုဨပရဴ ၂၄ တေံ အလဵုက္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် တုပ်စိုတ်ထ္ပက်လဝ်စၟတ်တဲ ကုတၚ်တုပ်စိုတ်အာဇြဳယာန် မသုန်သာ် မသ္ဂုတ်သွာတ်လဝ် ဂတမုက်က္ဍိုပ်သ္ကိုပ်အာဇြဳယာန်ဂမၠိုၚ်ရ။
ဆ္ဂး တၚ်တုပ်စိုတ်မသုန်သာ်ဏံဝွံ ၜိုန်ပေၚ်အာပန်သၞာံကီုလေဝ် စပ်ကဵုလ္ပာ်ကံၚ်ဇြဳပၞာန် ထ္မံက်ကၠုၚ်ရုပ်ရဴ ဗွဲမပြာကတ်ဟွံမွဲဂှ်တုဲ Justice For Myanmar ထံက်ထ္ၜးလဝ်ရ။
ပ္ဍဲကဵုတၚ်တုပ်စိုတ်မသုန်သာ်ဂှ် သွက်ဂွံကလေၚ်ဗလးကဵု က္ဍိုပ်သ္ကိုပ်ကၟိန်ဍုၚ် မရပ်ဒက်လဝ်တံကဵု ကောန်ထံၚ်ပရေၚ်ဍုၚ်ကွာန်ဂမၠိုၚ်ဂှ်ကီု၊ သွက်ဂွံဒေါအ်ကဵု ပွပကီုပရာပ်တံဂှ်ကီု၊ သွက်ဂွံဆဵုဂဗသဳကၠဳကဵု ဂကောံမဆက်စပ်သီုဖအိုတ်ဂှ်ကီု၊ သွက်ဂွံကဵုအရီုဗၚ်ပရေၚ်ဗ္စာရဏာမၞိဟ်တံ ဒှ်တမ် တၚ်နၚ်တံဏံ ပါလုပ်ရ။
အစဳဇန်ပရေၚ်ၜိုဟ်လလမ် အာဇြဳယာန်ဂှ်လေဝ် ဟွံအံၚ်ဇၞး၊ ပွမဓဇန်ကြမ်ကြ ကံၚ်ဇြဳပၞာန်တံဂှ်လေဝ် ဆက်နွံဒၟံၚ်တုဲ၊ ဆ္ဂး နကဵုအာဇြဳယာန် ကေုာံ ဍုၚ်မလုပ်ဂကောံဂမၠိုၚ်ဝွံ ဆက်တုဲဆက်ဆောံဒၟံၚ်ကဵု က္ဍိုပ်သ္ကိုပ်ပၞာန်ဖိုဟ်ရ။
သ္အာၚ်နူဂှ်ပၠန် ၜိုန်ဟီုဒၟံၚ် ဒဒှ်ရအာဒၟံၚ်က္ဍိုပ် ပ္ဍဲအရာဂ္စါန်လွဳပရာ သ္ဂောံသောၚ်ကလးအကြေပ်အဂြတ် အပ္ဍဲဍုၚ်ဗၟာဂှ်ကီုလေဝ် နတဲဏံဂှ်တှ်ေ က္တဵုဗဒှ်ကၠေံ အကာဲအရာညံၚ်ဂွံပရေံတုဲ ကၟာတ်လဒဵုဒၟံၚ် ပရေၚ်ဍုၚ်သ္အာၚ်တံ မကေတ်အရေဝ် ဗွဲမစိုပ်တရဴတံဂှ်ရောၚ် Justice For Myanmar သ္ဂးရ။
ဟိုတ်နူဘဲတိချဳတုဲ သွက်ဂွံကဵုအရီုဗၚ်ပရေၚ်ဗ္စာရဏာမၞိဟ်ဂှ် ပ္ဍဲဂိတုဨပရဴ ၁၇ တေံ သ္ကိုပ်ဝန်ဇၞော်မလေဝ်ယှာ ဥက္ကဌဒးအလန် အာဇြဳယာန်ဂှ် ဆဵုဂဗလဝ်ကဵု က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ရ။
လအာတုပ်သာ်ဂှ်ကီု ပ္ဍဲဂိတုဨပရဴ ၁၈ ဂှ် ဆဵုဂဗလဝ် ကုသ္ကိုပ်ဝန်ဇၞော် အလဵုအသဳညဳသၟဟ်ဂကူ NUG မာန်ဝေန်ခိုၚ်တာန် နူကဵုလပှ်ကျာ အလန်ကိုပ်ကၠာအိုတ် ဗွဲမလုပ်သၞောဝ်ရ။
အပ္ဍဲပရေၚ်ဆဵုဂဗ ဗွဲတၞဟ်ခြာဂှ် သ္ကိုပ်ဝန်ဇၞော်မလေဝ်ယှာ အာန်ဝါအဳဗရာဟေန်ဂှ် ညံၚ်ပေါဲသဳကၠဳပရေၚ်ၜိုဟ်လလမ် ပ္ဍဲဍုၚ်ဗၟာ ဂွံဒှ်ဂှ် ကဵုဇြဟတ်ဓရိုဟ် အာတ်မိက်ကၠုၚ်ဂှ်ကီု၊ ကြဴနူဒးဘဲတိချဳတုဲ ဖ္တိုက်ဖ္အောဝ်ကၠုၚ် ပရေၚ်ဒေါအ်ပန်ပှော်တံ နွံဒၟၚ်ရ။
စပ်ကဵုပရေၚ်ဏံတုဲ သမ္မတယာယဳ အလဵုအသဳညဳသၟဟ်ဂကူ NUG ဒူဝါလယှဳလဂှ် နကဵုဗွိုၚ်ဍုၚ်သ္အာၚ်တံလေဝ် သွက်ဂွံကလေၚ်သ္ၚဳဂၠိပ်စၟဳတ် လစွံစိုတ် လ္တူပေါဲသဳကၠဳပရေၚ်ၜိုဟ်လလမ် ကံၚ်ဇြဳပၞာန် ဗွဲမဇြိုဟ်နက်ဂှ် ဖ္တိုက်ဖ္အောဝ်လဝ်ရ။
နကဵုကံၚ်ဇြဳပၞာန်လေဝ် ပ္ဍဲဍုၚ်ဗၟာဂှ် ပရေၚ်အုပ်ဓုပ်ပၞာန်သာ်လဵုဟွံဟီု ညံၚ်ဍုၚ်ကွာန်ဂွံတောတက်ဍာံဍာံဂှ် ကၠောန်ဟွံမာန်ပုဟ်ဟီုဂှ် ပၞာန်အပ္ဍဲဍုၚ် မလအ်ကၠုၚ်ပွိုၚ် ၇၀ သၞာံဝွံ ဒှ်သက်သဳတုဲ ဒးကၠိုဟ်လဝ်ဏောၚ်ဂှ် သမ္မတယာယဳ ဟီုလဝ် ပ္ဍဲကောံဓရီုအလဵုအသဳ NUG မကၠောန်ဗဒှ်လဝ် ပ္ဍဲဂိတုဨပရဴ ၂၂ တေံရ။
Justice For Myanmar ဂှ်တှ်ေ နကဵုအာဇြဳယာန် ယဝ်မိက်ဂွံထ္ၜးပျး ကတိကဝတ် သွက်ပရေၚ်ၜိုဟ်လလမ်ဂှ်မ္ဂး ဒးရှ်ေသှ်ေ ရမျာၚ်ညးဍုၚ်ကွာန်ဍုၚ်ဗၟာ မသၠးပွးကၠေံလမျီု မဆက်တဝ်စၞေဟ်ပၠန်ဂတးဒၟံၚ် ကံၚ်ဇြဳပၞာန် သွက်ဖေဝ်ဒရာဒဳမဝ်ကရေဇြဳဂှ်ဏောၚ်ဂှ် ထံက်ထ္ၜးလဝ်ရ။
အတိုၚ်ဂကောံမှာဇန်ဂမၠိုၚ် မအာတ်မိက်လဝ်ဂှ်မ္ဂး နကဵုနဲကဲမသ္ပဗဟဵုကဵုညးဍုၚ်ကွာန်ဍုၚ်ဗၟာတုဲ မလောန်ၜက်နူတၚ်တုပ်စိုပ်အာဇြဳယာန် မသုန်သာ်ဂှ်ဟေၚ် ရေၚ်တၠုၚ်အာ ပရေၚ်ၜိုဟ်လလမ်မာန်ဏောၚ်ဂှ် ကဵုသမ္တီထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပရိုၚ်−သြၚ်လောန်တိုၚ်(မ်)
ဗီု−AFP