ထဝါဲ၊ ဨပရဴ ၂၅
ရးတၞၚ်သဳ ပ္ဍဲကဵုဒေသ (အရှေ့တော) ပွိုၚ်ဍုၚ်ထဝါဲဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ထောံမခတိုဟ် နကဵုပၞာန်ကျာတုဲ ညးဍုၚ်ကွာန်ကောန်အရာပ် မွဲတၠ ချိုတ်တုဲ စမြိုၚ်ဘာဗ္တောန်လိက်လ္ၚဵု ဇီုကပိုက်ဒးလီုအာလဝ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဨပရဴ ၂၃ အခိၚ်လဒေါဝ်တ္ၚဲ ၜိုတ် ၁ နာဍဳဂှ် ဒပ်ကံၚ်ဇြဳပၞာန် ကၠုၚ်ဂြာတ်ဖျေံဏာလဝ် မခတိုဟ်လျိုၚ် ၂၀၀ ၜါမ ပ္ဍဲကဵုဒေသ (အရှေ့တော) ထဝါဲ အကြာကွာန်တောၚ်သုံးလုံးကဵု ကွာန်ကျောက်မဲတောၚ်ဂှ်ရ။
ဟိုတ်နူပရေၚ်ထောံမခတိုဟ်ဂှ်တုဲ ကိုဝ်အဳသာ အာယုက်မၞုံ ၃၀ သၞာံပြၚ် ဒၟံၚ်ကွာန်(တောၚ်သုံးလုံး) ဂှ် ဒးအာကဝေက်ဗုမ် လက္ကရဴစးတုဲ ဒးချိုတ်အာလဝ်တုဲ ဘာတန်မူလ ကွာန်(တောၚ်သုံးလုံး) လီုအာလဝ်ရ။
ဟိုတ်နူဒပ်ကံၚ်ဇြဳပၞာန် ထောံကၠုၚ်မခတိုဟ်ဂှ်တုဲ ညးဒေသ နူကဵုကွာန် (တောၚ်သုံးလုံး၊ ကျောက်မဲတောၚ်) တံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံဂှ်တုဲ လ္ၚဵုတံဂှ်တှ်ေ ဒးမံၚ်ဒၟံၚ် အပ္ဍဲကွာန်သၟးရတုဲ ဒးမၚ်ရံၚ်ဒၟံၚ်အကာဲအရာတံအိုတ်ဂှ် သ္ဂးရ။
မွဲလ္ပာ်ဂှ်ပၠန်လေဝ် ဟိုတ်နူဒပ်ပၠန်ဂတးတံ လုပ်စိုပ်ကၠုၚ် မွဲဒမြိပ်(ကျောက်မဲတောၚ် ကဵု တောၚ်သုံးလုံး) တံဂှ်တုဲ ဗ္ဒိုပ်ဗျူဟာကံၚ်ဇြဳပၞာန် နွံပ္ဍဲဍုၚ်မေတ္တာဂှ်လေဝ် ပန်ပှော်ဒၟံၚ်လွဟ်ဇၞော် လ္ပာ်(တောၚ်သုံးလုံး) ကဵု လ္ပာ်ကွာန်(ကျောက်မဲတောၚ်) နွံဒၟံၚ်ရောၚ် ဂွံတီကေတ်ရ။
တုဲကၠုၚ် ပ္ဍဲဂိတုဨပရဴ ၁၉ တေံဂှ်လေဝ် ပ္ဍဲကဵုရးတၞၚ်သဳ ပွိုၚ်ဍုၚ်တယိတ်ချံၚ် ကွာန်(ရငဲ) ဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ကဵုပၞာန်ကျာတုဲ အပါနော်ကဵုကောန်စဴၜါတၠ ချိုတ်အာတုဲ ပန်တၠ ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−CJ