သဓီု၊ ဨပရဴ ၂၆
ပ္ဍဲတွဵုရးဍုၚ်မန် လ္တူဍုၚ်သဓီု အခိၚ်ဗ္တံမ္ဂး ဒပ်ဗၠာဲသၟိၚ်တံ ရပ်ဒက်ညးဍုၚ်ကွာန်ဒေသ ကွာ်ဂၠံၚ်တံဂှ်တုဲ အာတ်မိက်ဒၟံၚ်လှုဲတံ ဆက်နွံဒၟံၚ်ရောၚ် ညးဒေသလ္တူဍုၚ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ဒပ်ဗၠာဲသၟိၚ် ကံၚ်ဇြဳပၞာန်ဝွံ ပပ္တံနူဂိတုဨပရဴ သတ္တာဟတတိယတုဲ ပ္ဍဲကဵုသကဲဂၠံၚ်ကွဳစက် ဂတမုက်ကျာ် ကွာန်(ပေါ်တော်မူ) ၊ ပ္ဍဲဗွိုၚ်ကျာ်သဓီု (ရွှေစာရံ)၊ ဒၞါဲသၞေဟ်ကံက်အခေါန်လှာ ဂၠံၚ်တိတ်ဍုၚ်တံဂှ် စၟဳတ်ဒၟံၚ်တုဲ ညးအာကၠုၚ်အခိၚ်ဗ္တံတံဂှ် ရပ်ဒက်တုဲအာတ်မိက်ဒၟံၚ်လှုဲရ။
အတိုၚ်ဂလာန်ညးဒေသတံဂှ်မ္ဂး ဗွဲတၟေၚ် အခိၚ်ဗ္တံ ယဝ်ဂွံဆဵုကေတ် မၞိဟ်တြုံၜါတၠ ဍိုက်ကွဳလိုန်ဓာတ်တုပ်ပ်၊ မၞိဟ်တြုံမွဲတၠဓဝ် ဍိုက်ကၠုၚ်ကွဳလိုန်ဓာတ်တံဂှ်မ္ဂး စၟဳတ်တုဲရပ်ဒက်အာတ်မိက်ဒၟံၚ်လှုဲရောၚ် သ္ဂးရ။
ညးဒးဒုၚ်ရပ်တံဂှ် ကော်ဏာဇရေၚ်ဗ္ဒိုပ်ဗၠာဲသၟိၚ်တုဲ မွဲတၠမ္ဂး အာတ်ဒၟံၚ်သြန် နူအကြာ ၃ ကိုဋ်ဒ္ကေဝ် စဵုကဵု ၅ ကိုဋ်ဒ္ကေဝ် နွံတုဲ လှုဲၜိုတ်နွံဂှ် အာတ်ကေတ်တုဲ ကလေၚ်ဗလးဏာ ၜိုတ်ကဝက်ဂၠံၚ်ဂှ်လေဝ် နွံဒၟံၚ်ရ။
မွဲလ္ပာ်ဂှ်ပၠန် ကောန်ဒပ်ဗၠာဲသၟိၚ်ဂမၠိုၚ်ဝွံ ထ္ၜးဟိုတ်ကဵုပရေၚ်ဂီုကၠီုတုဲ ဂေတ်ဂေၚ်အပ္ဍဲဍုၚ်ကီု၊ ကၟာတ်လဒဵုဂၠိုက်ဂၠါဲစၟဳတ်တံသၟးဟွံက ဒၞါဲမၞိဟ်မံၚ်ဂၠိုၚ်တံဂှ် စၟဳတ်စရၚ်ကၟုဲတုဲ ဘပဠအာတ်မိက်ဒၟံၚ်သြန်တံရ။
ကောန်ဒပ်ဗၠာဲသၟိၚ်ဂမၠိုၚ် စပ်ကဵုရပ်ဒက်အာတ်မိက်ဒၟံၚ်သြန် လ္တူညးဍုၚ်ကွာန် ဗွဲအဓမ္မ သာ်ဏံဂှ်တုဲ ယဝ်အာတေၚ် ဇရေၚ်ညးတာလျိုၚ်ကံၚ်ဇြဳပၞာန်တံမ္ဂးလေဝ် မ္ၚးနူဟွံဒးဒုၚ်ကေတ်အရေဝ်ဂှ် ညးမအာတေၚ်စိုပ်တံရဟေၚ် ဒးဒုၚ်ဘပဠဒၟံၚ် ပရူဒဒှ်သာ်ဏံ နွံဒၟံၚ်ရ။
ပ္ဍဲတွဵုရးဍုၚ်မန် နကဵုကောန်ဒပ်ဗၠာဲသၟိၚ်ဂမၠိုၚ် ရပ်စပ်နဲကဲနာနာတုဲ ရပ်ဒက်အာတ်မိက်ဒၟံၚ်သြန် လ္တူညးဍုၚ်ကွာန်တံကီုလေဝ် ပရေၚ်ကွဳလိုန်ဓာတ်ကၠေံ၊ ပရေၚ်ကၠတ်ဂၠံက်ပၠံၚ်ၜး မက္တဵုဒှ်ဒၟံၚ် လၟေၚ်ဒဒှ်တ္ၚဲတံဂှ်တှ်ေ ထ္မံက်ပ္တိတ်ရပ်ဂွံတံဂှ် စဵုကဵုဟွံမွဲ အောန်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ