မတ်မလီု၊ ဨပရဴ ၂၆
အပ္ဍဲဍုၚ် ဟိုတ်နူဂွံကၠုၚ်ကၠေၚ်ရုမ်မ်ဂပ်ပ်တုဲ ၚုဟ်ကၠေၚ်စှ်ေကၠုၚ်ဂှ်ရ ညးဍုၚ်ကွာန်ဂမၠိုၚ် ဂွံရာန်သုၚ်စောဲဒၟံၚ် ဗွဲမမိပ်မြဟ်ရောၚ် ထ္မံက်ထ္ၜးလဝ် ပ္ဍဲလိက်ပရိုၚ်တြးဝါဒ ကံၚ်ဇြဳပၞာန် မလလောၚ်ပ္တိတ်လဝ် ပ္ဍဲဂိတုဨပရဴ ၂၃ တေံရ။
ၚုဟ်ကၠေၚ်စက်ကံၚ်ဇြဳပၞာန်ဝွံ စဵုကဵုဂိတုဨပရဴ ၁၇ ဂှ် ကၠေၚ်စက်မွဲလဳတာ နွံကၠုၚ်လဝ် ၃၁၀၀ ဒ္ကေဝ်တုဲ စနူဂိတုဨပရဴ ၁၈ တုဲဂှ် စှ်ေအာလဝ် ၂၈၀၀ ဒ္ကေဝ်ပြၚ်ဂှ်ရ ညးဍုၚ်ကွာန်ဂမၠိုၚ် ဂွံရာန်သုၚ်စောဲဒၟံၚ် ဗွဲမမိပ်မြဟ်ရောၚ် လ္ပာ်ကံၚ်ဇြဳပၞာန် တြးလဝ်ဝါဒရ။
ကံၚ်ဇြဳပၞာန် ကြဴနူတြးကၠုၚ်ဝါဒ ၚုဟ်ကၠေၚ်စှ်ေတုဲဂှ် ပ္ဍဲဂိတုဨပရဴ ၂၅ ဂှ် ကၠေၚ်စက်မွဲလဳတာ ၚုဟ်ကလေၚ်တိုန်အာ စဵုကဵု ၂၉၀၀ ဒ္ကေဝ်ရ။
ညးဍုၚ်ကွာန်မွဲတၠဂှ်တှ်ေ ၚုဟ်ကၠေၚ်စက်စှ်ေအာ ၜိုတ်မွဲကၠံၜါကၠံဂှ် ညးဍုၚ်ကွာန်တံ မုဟွံဒှ်တုဲ ၚုဟ်စှ်ေအာ ၜိုတ်ၜါကၠံတုဲ ညးဍုၚ်ကွာန်ဂမၠိုၚ် ရာန်သုၚ်စောဲကၠုၚ်ဒၟံၚ် ဗွဲမမိပ်မြဟ်ဟီုဂှ် ဒှ်အရေဝ်ပရအ်ရဏောၚ်ဂှ် ပါ်ပါဲလဝ်ရ။
“လၟုဟ် စှ်ေဏောၚ်ဟီုဂှ် ၜိုတ်မွဲကၠံ ၜါကၠံရဏောၚ်။ ၜိုတ်မွဲကၠံ ၜါကၠံရဟီုဂှ် ညးဍုၚ်ကွာန်တံ မုဟွံဒှ်ပုဟ်။ ၚုဟ်ကၠေၚ်စက်ဏံ စှ်ေအာၜိုတ်ၜါကၠံဂှ် ညးဍုၚ်ကွာန်တံ မိပ်ဒၟံၚ်ဟီုတှ်ေ ညအ်ဂှ် မအရေဝ်ပရအ်ဏောၚ်၊ ညးဍုၚ်ကွာန်တံ ဒှ်ဒၟံၚ်ဒဒိုက်ၜိုတ်လဵုရောဟီုဂှ် စှ်ေကျောဝ်သၟဝ်ဏံညိ” သာ်ဝွံ သ္ဂးရ။
ၚုဟ်ကၠေၚ်စက်ဝွံ ဟွံကလေၚ်စိုပ်ၚုဟ် လက်ထက်အလဵုအသဳကၠာတေံမွဲသာ် ၚုဟ်စှ်ေရောၚ် ဟီုဟွံဂွံတုဲ ၚုဟ်စှ်ေကၠုၚ် ၜိုတ်မွဲကၠံ၊ ၜါကၠံညိကီုဂှ် ညးဍုၚ်ကွာန်တံ ရာန်သုၚ်စောဲဒၟံၚ် ဗွဲမမိပ်မြဟ်ဂှ်ဝွံ ဒှ်ဆၜိုတ်ဂရိုၚ်တြးဝါဒရဂှ် ညးဆက်ဟီုရ။
ကံၚ်ဇြဳပၞာန်ဂှ်တှ်ေ ကၠေၚ်စက် နွံဒၟံၚ် ၜိုတ်သွက်မွဲသတ္တာဟတုဲ က္ၜၚ်ဖ္ဍိုက်ကၠေၚ်စက်တံဂှ်လေဝ် လုပ်စိုပ်ဒၟံၚ် ဟွံပိုတ်သ္ကုတ်ဂှ်ရ ကၠေၚ်ပိုတ်အာ ဒှ်ဟွံမာန်ပုဟ်ဂှ် သ္ဂးရ။
သ္အာၚ်နူဂှ်ပၠန် နကဵုညးဍုၚ်ကွာန်ဂမၠိုၚ် ဒှ်ဓဝိၚ်ကဵုကၠေၚ်စက်ပိုတ်အိုတ်မာန်ဂှ်တုဲ ဟွံမွဲပၟိက်မွဲသာ် လ္ပမၚ်ရာန်ဒၟံၚ်ကၠေၚ်စက်တံဂှ်ကီု၊ လ္ပကြိုၚ်စွံလဝ်အပဵုတံဂှ်ကီု တုဲမ္ဂး ၜိုတ်နွံပၟိက်ရဟေၚ် သွက်ဂွံရာန်သုၚ်စောဲအိုတ်ညိဂှ် ကံၚ်ဇြဳပၞာန် ဖ္တိုက်ဖ္အောဝ်လဝ်ရ။
ကံၚ်ဇြဳပၞာန် ၜိုန်ဟီုဒၟံၚ် ကၠေၚ်စက်နွံပေၚ်ၚ်ကီုလေဝ် အခိၚ်ကာလတုဲကၠုၚ်တေံ ကၠေၚ်စက်ပိုတ်ဒၟံၚ် မွဲဏှမွဲဏှကီု၊ ဒးမၚ်ရာန်ဒၟံၚ်ကၠေၚ် အခိၚ်ဗွဲမလအ်လတံသၟးဟွံက သီုကဵုဒးဂဗကၠုၚ်လဝ် အကာဲအရာရာန်ကေတ် ၜိုတ်နွံပၟိက်ဟွံဂွံတံဂှ်ရ။
ပ္ဍဲဍုၚ်ဗၟာ ပ္ဍဲလက်ထက်အလဵုအသဳတုဲကၠုၚ်တေံ ကၠေၚ်စက်မွဲလဳတာ ၚုဟ်မၞုံကၠုၚ်လဝ် ပွဳပွူ ၆၀၀ ဒ္ကေဝ်ရတုဲ အပ္ဍဲကာလဒပ်ပၞာန်သီအဝဵုဏံ ၚုဟ်သၠုၚ်တိုန်ကၠုၚ် ၅ ဆပြၚ်တုဲ ၚုဟ်ဟွံညိၚ်ဝတ်တံလေဝ် က္တဵုဒှ်ဒၟံၚ်မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)
ဗီု−CJ