သဓီု၊ ဨပရဴ ၂၇
ပ္ဍဲတွဵုရးဍုၚ်မန် ခရိုၚ်သဓီု မွဲဒမြိပ်ဂၠံၚ်ကွဳစက် လ္ဂုၚ်−မတ်မလီုဂှ် လ္ပာ်ကံၚ်ဇြဳပၞာန် ဖျေံကၠုၚ်ကၚ်မၚ်တောပ်ဗ္တိုက်တံ ဂၠိုၚ်ကၠုၚ်ရောၚ် ညးဒေသတံကဵု ဂကောံဒပ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန်ဝွံ စနူဂိတုဨပရဴ သတ္တာဟတတိယတုဲ ပ္ဍဲကဵုသ္ကုတ်ဂၠံၚ် အကြာပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ် ကေုာံ ပွိုၚ်ဍုၚ်သဓီုတံဂှ် ဂေတ်ကၚ် ကေုာံ မၚ်တောပ်ဗ္တိုက် ဂၠိုၚ်တိုန်ကၠုၚ်ရ။
အတိုၚ်ဂလာန် ဒပ်ပၠန်ဂတးဖျေံသ္ဇိုၚ်ဒေသတံဂှ်မ္ဂး ဒၞါဲရေၚ်ယာန်ကွဳစက်တံ ဒးဒုၚ်ဗ္တိုက်ဒၟံၚ် မွဲဏှမွဲဏှဂှ် ဒပ်ကံၚ်ဇြဳပၞာန် မၚ်တောပ်ဗ္တိုက်ကၠုၚ် ဂၠိုၚ်ကၠုၚ်တုဲ မွဲဂကောံမ္ဂး ဗွဲတွဵုမအောန် ရပ်စပ်စကာလဝ်ဇြဟတ် နူ ၂၀ စဵုကဵု ၃၀ ရ။
မွဲဒမြိပ်ဂၠံၚ်ကွဳစက် လ္ဂုၚ်−မတ်မလီုဂှ် သၞေဟ်ကၚ်စၟဳတ် ဒပ်ကံၚ်ဇြဳပၞာန် နွံၜိုတ် ၂၀ တုဲ ဒပ်ပၠန်ဂတးတံ အာစိုပ်ဗ္တိုက်ဒၟံၚ် သၞေဟ်ကၚ်စၟဳတ်တံဏံ မွဲဏှမွဲဏှရ။
လ္ပာ်ကံၚ်ဇြဳပၞာန် ဟိုတ်နူဖျေံဂလိုၚ်ပ္တိုန်လဝ် ကၚ်မၚ်တောပ်ဗ္တိုက်တံဂှ်တုဲ ပ္ဍဲအရာအာကၠုၚ်တရဴတံဂှ် ပရေၚ်ဒှ်ဓဝိၚ်ဂွိၚ်ဂွါဲတံ ဂၠိုၚ်တိုန်ကၠုၚ် နူကဵုကၠာတေံရောၚ် ညးဒေသတံ ဟီုရ။
မွဲဒမြိပ်ဂၠံၚ်ကွဳစက် လ္ဂုၚ်−မတ်မလီုဂှ် အပ္ဍဲဂိတုဏံ အကြာဒပ်ကံၚ်ဇြဳပၞာန်ကဵု ဒပ်ပၠန်ဂတးတံဂှ် ပေါဲဗ္တိုက်ဆေၚ်မုက်တံ က္တဵုဒှ်လဝ် ဟွံအောန်နူပန်ဝါတုဲ ပရေၚ်ဇီုကပိုက်ချိုတ်ဂျိုၚ် သီုၜါလ္ပာ်လေဝ် နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ