တယိတ်ချံၚ်၊ ဨပရဴ ၂၆
ပ္ဍဲရးတၞၚ်သဳ ပ္ဍဲပွိုၚ်ဍုၚ်တယိတ်ချံၚ်ဂှ် ပေါဲဗ္တိုက်က္တဵုဒှ်ဒၟံၚ် အရိုဟ်တ္ၚဲ ဗွဲမသ္ကာတ်မြဟ်ဂှ်တုဲ ပ္ဍဲဂၠံၚ်ပျဳထံၚ်သု စၟတ် (၈) နူအပ္ဍဲတိဍာ် ပေါဲဗ္တိုက်ဒှ်ဒၟံၚ်တံဂှ် ညံၚ်ဟွံဂွံတတ်ကၠောံအာကၠုၚ် အခိၚ်ဗ္တံအိုတ်ဂှ် ဂကောံစဵုဒၞါညးဍုၚ်ကွာန် ပွိုၚ်ဍုၚ်တယိတ်ချံၚ် လလောၚ်ပ္တိတ်ကဵုလဝ်သတိရ။
ကုန်ဗ္ဒိုပ်ဝေန်ဝ နွံပ္ဍဲကွာန်ဝေန်ဝ ပွိုၚ်ဍုၚ်တယိတ်ချံၚ်ဂှ် စနူတ္ၚဲအကြာဏံတုဲ ဒပ်ပံၚ်ကောံစဵုဒၞါညးဍုၚ်ကွာန်တံ လုပ်ဒၟံၚ်ပေါဲဗ္တိုက်သီဗ္ဒိုပ်ဂှ်ရ ပေါဲဗ္တိုက်ၜါလ္ပာ် က္တဵုဒှ်ဒၟံၚ် လၟေၚ်ဒဒှ်တ္ၚဲရ။
ဟိုတ်ဂှ်ရ ဂၠံၚ်ဇၞော်ပျဳထံၚ်သု စၟတ် ၈ ဂၠံၚ်ဗိက်−ထဝါဲ ဒၞါဲပေါဲဗ္တိုက်ဒှ်ဒၟံၚ်ဂှ် စနူဂိတုဨပရဴ ၂၄ တုဲ နူဗ္တံ ၇ နာဍဳ စဵုကဵုပယျာံဂယး ၅ နာဍဳဂှ် ဟၟဲကဵုအပိုၚ်အခြာ ညံၚ်ဟွံဂွံတတ်ကၠောံအာကၠုၚ်ဂှ် ဂကောံစဵုဒၞါညးဍုၚ်ကွာန် ပွိုၚ်ဍုၚ်တယိတ်ချံၚ် လလောၚ်ပ္တိတ်လဝ်ရ။
မ္ၚးနူကဵုပေါဲဗ္တိုက်ၜါလ္ပာ် မက္တဵုဒှ်ဒၟံၚ် ပ္ဍဲပွိုၚ်ဍုၚ်တယိတ်ချံၚ်ဂှ် ဟိုတ်နူကံၚ်ဇြဳပၞာန် ထောံဂြာတ်မံၚ်မခတိုဟ် နူကဵုပၞာန်ကျာ လၟေၚ်ဒဒှ်တ္ၚဲဂှ်တုဲ ညးဒေသ ဗ္ဒါဲ ၆၀၀၀ ဒးဂြိပ်ဒဴပါဲဒလေတ်ဒၟံၚ်ရောၚ် ညးတာလျိုၚ် ဂကောံရီုဗၚ်ညးပါဲဘဲပၞာန် ပွိုၚ်တိုက်ဒံၚ်ပျံက် မွဲတၠ ဟီုရ။
မွဲလ္ပာ်ဂှ်ပၠန်လေဝ် ပ္ဍဲပွိုၚ်ဍုၚ်(ပလောက်) ပယျဵုပွိုၚ်ဍုၚ်တယိတ်ချံၚ်ကဵု ပွိုၚ်ဍုၚ်ပဠဝ်ဂှ်လေဝ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံဂှ် ပေါဲဗ္တိုက်ၜါလ္ပာ် က္တဵုဒှ်ဒၟံၚ်တုဲ ဟိုတ်နူဂၠံၚ်ဇၞော်ပျဳထံၚ်သု ဗိက်−ထဝါဲ အာကၠုၚ်ဟွံဂွံဒှ်ဒၟံၚ်တုဲ ဒးဆေၚ်ဒၟံၚ်မုက်ကဵု အကာဲအရာဇွောံမစၞစ ကေုာံ ကၠေၚ်စက်ပိုတ်တံဂှ်ရောၚ် သ္ဂးရ။
အပ္ဍဲပေါဲဗ္တိုက် မက္တဵုဒှ်ဒၟံၚ် ပ္ဍဲပွိုၚ်ဍုၚ်တယိတ်ချံၚ်ဂှ် ဟိုတ်နူကံၚ်ဇြဳပၞာန် ထောံမခတိုဟ် နကဵုပၞာန်ကျာတုဲ ကောန်အရာပ်ဇီုကပိုက်ချိုတ်အာလဝ် နွံဒၟံၚ်တုဲ ပ္ဍဲဂိတုဨပရဴ ၂၅ အခိၚ်နူဂယးဂှ်လေဝ် ဟိုတ်နူပရေၚ်ဗ္တိုက်ကဵုပၞာန်ကျာဂှ်တုဲ သ္ၚိကွာန်ကျဲချာန်(ကျွဲခြံ) မွဲမ လီုလာ်အာလဝ်ရောၚ် ဂွံတီကေတ်ရ။
ဟိုတ်ဂှ်ရ ဒၟါနူအကာဲအရာပရေၚ်ပၞာန်တုဲ အခိၚ်တတ်ကၠောံအာကၠုၚ် အပ္ဍဲအခိၚ်မစၟတ်လဝ်တံဂှ် သွက်ဂွံဒုၚ်စၟဳတ် ကုဂကောံဒပ်စဵုဒၞါညးဍုၚ်ကွာန်တံကီု၊ ဟွံဂွံအခေါၚ်မွဲသာ် ယဝ်တတ်ကၠောံအာကၠုၚ်မ္ဂး ကေတ်အာတာလျိုၚ်ဟွံသေၚ်တုဲ သ္ဇက်ဒးဒှ်သံသယတံဂှ်တှ်ေ ကေတ်အာအရေဝ် ဗွဲမစိုပ်တရဴဏောၚ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ