ထဝါဲ၊ ဨပရဴ ၂၇
ပ္ဍဲရးတၞၚ်သဳ နူဍုၚ်ထဝါဲဂှ် လ္ပာ်ကံၚ်ဇြဳပၞာန် ကၟာတ်လဒဵုလဝ်အခေါၚ်ယိုက်ဏာနၚ် ကၠေၚ်စက် ကေုာံ ဗၞိက်စၞစသုၚ် လ္ပာ်ဒေသလံၚ်လုၚ်၊ တယိတ်ချံၚ် ကေုာံ ထဝါဲ(အရှေ့တော) တံဂှ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဨပရဴ သတ္တာဟစတုတ္ထဏံတုဲ ပ္ဍဲကဵုဂၠံၚ်လုပ်တိတ်ဍုၚ်ထဝါဲ ဒၞါဲသၞေဟ်ကၚ်စၟဳတ်ဂမၠိုၚ်နွံ မပ္တံကဵုသၞေဟ်ကၚ်ဒဒန်ကမျဝ်ကေန်၊ သၞေဟ်ကၚ်(ဗျောတောဝ၊ ပေါက်တိုၚ်း၊ အိမ်ရှေ့ပြင်) တံဂှ် ကၟာတ်လဒဵုလဝ် အခေါၚ်ယိုက်ဏာနၚ် ကၠေၚ်စက် ကေုာံ ဗၞိက်စၞစသုၚ်ရ။
အတိုၚ်ဂလာန်ညးဒေသတံဂှ်မ္ဂး ပ္ဍဲကဵုသၞေဟ်ကၚ်စၟဳတ်ကံၚ်ဇြဳပၞာန်တံဂှ် ယဝ်ဖ္ဍိုက်ပ္တိုန်နၚ် ဗၞိက်စၞစသုၚ် ကေုာံ ကၠေၚ်စက်တံဂှ်မ္ဂး သီကေတ်ဒၟံၚ်ရ။
ဟိုတ်နူကံၚ်ဇြဳပၞာန် ကၟာတ်လဒဵုကၠုၚ်ဂှ်တုဲ ပ္ဍဲကဵုပွိုၚ်ဍုၚ် ( ထားဝယ်အရှေ့တော၊ လောင်းလုံး ကေုာံ သရက်တော) တံဂှ် နွံပၟိက်ကၠုၚ်ဒၟံၚ်ကဵုဗၞိက်စၞစသုၚ် ကေုာံ ကၠေၚ်စက်တံဂှ်တုဲ ၚုဟ်ဗၞိက်ဖျာတိုန် ကေုာံ ကပေါတ်ပိုတ်အိုတ်တံ နွံဒၟံၚ်ရောၚ် သ္ဂးရ။
ပြဟ်ဟ်ဏံ ဒးရပ်စပ်ဒၟံၚ် ဇွောံမ၊ ကၠေၚ်စက် မၞုံပ္ဍဲကွာန်ဂမၠိုၚ်တံဂှ်တုဲ ယဝ်ကၟာတ်အာဍာ်ဇမၠိၚ်မ္ဂး ညးဒေသဂမၠိုၚ် ဒှ်ကၠုၚ်အခက်အခုဲမာန်ရောၚ် သ္ဂးရ။
ဟိုတ်နူကံၚ်ဇြဳပၞာန် ကၟာတ်လဒဵုကၠုၚ်သာ်ဏံဂှ်တုဲ ပ္ဍဲကဵုဒေသတံဂှ် ကပေါတ်ဗၞိက်မွဲဂကူမ္ဂး အောန်အိုတ် ၚုဟ်သၠုၚ်တိုန်ကၠုၚ် နူ ၂၀ တၟံကၠံ စဵုကဵု ၃၀ တၟံကၠံတုဲ ကၠေၚ်စက်မွဲလဳတာ ၚုဟ်မၞုံဒၟံၚ် ပွဳပွူ ၅၀၀၀ ဒ္ကေဝ်ရ။
ပ္ဍဲကဵုပွိုၚ်ဍုၚ်တယိတ်ချံၚ် ကေုာံ ဒေသ ( ထားဝယ်အရှေ့တော) လ္ပာ်ကံင်ဇြဳပၞာန်တံ ကၟာတ်လဒဵုလဝ် အခေါၚ်ယိုက်ဏာနၚ် ကၠေၚ်စက် ကေုာံ ဗၞိက်စၞစသုၚ်တံဂှ် ပရေၚ်ပၞာန်ကြံၚ်မ္ၚိုဟ်ဒၟံၚ်တုဲ ပေါဲဗ္တိုက်တံလေဝ် က္တဵုဒှ်ဒၟံၚ်လၟေၚ်ဒဒှ်တ္ၚဲတုဲ လ္ပာ်ကံၚ်ဇြဳပၞာန် ထောံမံၚ်မခတိုဟ် နူကဵုပၞာန်ကျာတံလေဝ် နွံဒၟံၚ်ရ။
မွဲလ္ပာ်ဂှ်ပၠန်လေဝ် ပါဲနူလ္တူဍုၚ်ထဝါဲတုဲ ညံၚ်ဟွံဂွံသွံတြးကၠေၚ်စက် မ္ၚးဍုၚ်ဂှ် ကံၚ်ဇြဳပၞာန် ဓရတ်တာဒၞါဒၟံၚ် တၠဆေၚ်သွံတြးကၠေၚ်စက်တံဂှ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ