လာယှိုဝ်၊ ဨပရဴ ၂၇
ပွမဒးဆုတ်ကလေၚ်နူဍုၚ်လာယှိုဝ် ပ္ဍဲရးသေံသ္ကုတ်သၟဝ်ကျာ မသီဂွံလဝ် ကရောံဒပ်ပံၚ်ကောံဂမၠိုၚ် ပ္ဍဲကဵုပရေၚ်ပၞာန် ၁၀၂၇ သ္ကုတ်ဒုတိယဂှ်ဝွံ ဒှ်ဟိုတ်နူကရေပ်ဓရတ်ကၠုၚ် နကဵုပရေၚ်ဍုၚ်ကွာန်ဏောၚ်ဂှ် နိဿဲကေတ် ဂလာန်ညးတာလျိုၚ် ဌာနပရေၚ်ထတ်ယုက် ဒပ်ကဝ်က MNDAA ဂှ်တုဲ လလောၚ်ပ္တိတ်လဝ်ရ။
ပ္ဍဲဍုၚ်လာယှိုဝ်ဂှ် ထ္မံက်ရုပ်ရဴရေၚ်တၠုၚ်ကဵုလဝ် ပရေၚ်ထတ်ယုက် ပွိုၚ်ဒ္စါံဂိတုတုဲ ဟိုတ်နူဇြဟတ်ဓရိုဟ် လ္ပာ်ပရေၚ်ဍုၚ်ကွာန်ဂမၠိုၚ်တုဲ ဒးကလေၚ်ဆုတ်ကလေၚ်လဝ်ဂှ်ရ ဒဒှ်ရဒးအောန်စိုတ် သာ်ဝွံ ဟီုကၠုၚ်လဝ်ဂှ် ပ္ဍဲဂိတုဨပရဴ ၂၆ တေံ နူမဳဒဳယျာ The Kokang လလောၚ်ပ္တိတ်လဝ်ပရိုၚ်ရ။
ကြဴနူ MNDAA သီဂွံဍုၚ်လာယှိုဝ်တုဲဂှ် အကြာကံၚ်ဇြဳပၞာန် မဗ္တိုက်ထောံကၠုၚ်မခတိုဟ်နကဵုပၞာန်ကျာ၊ အကြာတၚ်ကော်ဆဴ ပ္ဍဲအခိၚ်ကာလကလေၚ်ဖျေံကဵုဒၞါဲဝါဲတံဂှ် စဂေတ်ဂြိပ်ကၠုၚ် ကဏ္ဍပရေၚ်ထတ်ယုက် ဗွဲမအံၚ်ဇၞးမာန်ရောၚ် သ္ဂးရ။
သ္ဇိုၚ်ဝန်ပရေၚ်ထတ်ယုက် ဒေသတၟေၚ်ကဝ်က စၟတ် (၁) ဂှ်ဝွံ စနူသၞာံ ၂၀၂၄ ဂိတုအဝ်ဂါတ် ၁၀ တုဲ စဵုကဵုသၞာံဏံ ဂိတုဨပရဴ ၈ ဂှ် လွဳလွတ်ကဵုလဝ် ညးယဲအပ္ဍဲ၊ ညးယဲမ္ၚး ပ္ဍဲကဵုရုၚ်ဂဥုဲညးဍုၚ်ကွာန်လာယှိုဝ်ဂှ် အပံၚ်ဖအိုတ် ၉၅၂၅၀ တၠပြၚ်ရောၚ် ထ္မံက်ထ္ၜးလဝ်ရ။
အခိၚ်ကောန်ဒပ် MNDAA တံ ဒးဆုတ်ကလေၚ်နူဍုၚ်လာယှိုဝ်ဂှ် ကေတ်ဏာဂဥုဲဇဗ ကေုာံ ကပေါတ်စက် နူရုၚ်ဂဥုဲဂှ် နွံတုဲ စက်ကြာတ်ကောန်တၟံဂှ်တှ်ေ ဆုဲပြံၚ်ဏာလဝ် ပ္ဍဲရုၚ်ဂဥုဲ(သိန္နီ) ဂှ်ရောၚ် ညးတာလျိုၚ် ဌာနပရေၚ်ထတ်ယုက်မွဲတၠ သ္ဂးရ။
ဟိုတ်နူအလဵုအသဳကြုက် လုပ်အကြာပ္ညဳပ္ညပ်ကဵုလဝ်တုဲ အတိုၚ်တၚ်တုပ်စိုတ် MNDAA ကဵု ကံၚ်ဇြဳပၞာန်တံ ဆဵုဂဗသဳကၠဳလဝ် ပ္ဍဲသၞာံဏံ ဂိတုဂျာန္နဝါရဳဂှ်တုဲ ကြဴနူကၠောံသၞာံတၟိတုဲ ပ္ဍဲဂိတုဨပရဴ ၂၁ ဂှ် ကောန်ဒပ်ကဝ်ကတံ ဒးဆုတ်ကလၚ်အာလဝ် နူကဵုလ္တူဍုၚ်လာယှိုဝ်ရ။
ပ္ဍဲဂိတုဨပရဴ ၂၂ ဂှ် ဂကောံအုပ်ဓုပ်ဌာနမဆေၚ်စပ်တံ လုပ်စိုပ်ကၠုၚ်ဍုၚ်လာယှိုဝ် ကရောံရေၚ်ယာန်ကွဳစက် မဖ္ဍိုက်ပ္တိုန်လဝ် ကောန်ဒပ်ကံၚ်ဇြဳပၞာန်တံဂှ်တုဲ ကလေၚ်ကေတ်အာဒၞါဲ ပ္ဍဲအရာပ်လ္တူဍုၚ် ၁၂ အရာပ်ဂှ်ဏောၚ် မဒှ်ရ။
ဟိုတ်ဂှ်ရ စပ်ကဵုကလေၚ်လှဲပြံၚ် အခေါၚ်အုပ်ဓုပ်ဒေသမဆေၚ်စပ်တံဂှ်တုဲ ဍုၚ်ကြုက် မလုပ်အကြာပ္ညဳပ္ညပ်ကဵုဒၟံၚ် ပ္ဍဲပရေၚ်ဍုၚ်ဗၟာဏံဂှ် ဗလးနၚ်လဝ် ဂကောံမၚ်ရံၚ်ဒေါအ်ပန်ပှော် ပ္ဍဲဍုၚ်လာယှိုဝ်ရ။
ဂကောံဏံဝွံ မၚ်ရံၚ်အာ ပရေၚ်ဒေါအ်ပန်ပှော် အကြာကံၚ်ဇြဳပၞာန်ကဵု MNDAA ဂှ်ဏောၚ်တုဲ ညံၚ်ပရေၚ်ပအပ်ပြာပ်ဍုၚ်လာယှိုဝ် ဂွံတုဲဒှ် ဗွဲမကလိတ်ကလောန်ဂှ် သ္ပအာသက်သဳဏောၚ် ညးမၞုံအခေါၚ်ဟီုဂး ဌာနဝန်ဇၞော်ကာဍုၚ်သ္အာၚ်ဍုၚ်ကြုက် ဟီုလဝ်ရ။
ညးလ္ၚတ်ဂမၠိုၚ်ဂှ်တှ်ေ နူစ MNDAA ကေုာံ ဂကောံပံၚ်တောဲဂမၠိုၚ် သီဂွံ ဍုၚ်လာယှိုဝ် ဒၞါဲဌာန်ဂအုပ်ပၞာန်ရးအဂၞဲ ဖျေံသ္ဇိုၚ်ဂှ်တုဲဂှ် အလဵုအသဳကြုက်ဝွံ ကဵုကၠုၚ်လဝ်ဇြဟတ်ဓရိုဟ် ညံၚ်ဂွံဒေါအ်ပေါဲဗ္တိုက် ကေုာံ ညံၚ်ဂွံဆုတ်ကလေၚ်နူ ဍုၚ်ဂှ်ရောၚ် ထံက်ထ္ၜးလဝ်ရ။
အလဵုအသဳကြုက် ကေတ်လဝ်အရေဝ် လ္တူ MNDAA နကဵုထပိုတ်မသုန်ထပိုတ် ဒဵုကဵုဆုတ်ကလေၚ်အာ နူဍုၚ်လာယှိုဝ်ဂှ်ဏောၚ်ဂှ်ရ မ္ဒးဒုၚ်လဝ်တဲ သွက်ဂွံသဳကၠဳ ကုကံၚ်ဇြဳပၞာန် နကဵုပရေၚ်ဍုၚ်ကွာန်ဂှ်တုဲ MNDAA ဒးဆုတ်ကလေၚ်လဝ် နူလ္တူဍုၚ်လာယှိုဝ် အတိုၚ်သွဟ်ဒေါအ်ပန်ပှော်ၜါလ္ပာ်ဂှ်ရ။
ပ္ဍဲအကာဲအရာမက္တဵုဒှ်ဒၟံၚ်သာ်ဏံဂှ် စပ်ကဵုပရေၚ်ပါ်ပါဲ လ္တူအလဵုအသဳကြုက် ဒဒှ်ရလုပ်ပထုဲပလာပ်ဒၟံၚ် လ္တူပရေၚ်အဝဵုစၟိန်ပြမာန်ဍုၚ်ဗမာဂှ်ဏောၚ်ဂှ်တုဲ က္ဍိုပ်သ္ကိုပ်ပၞာန်ဂှ်တှ်ေ ညးမပါ်ထ္ကး ပရေၚ်ညဳသာ အကြာကြုက်ကဵုဒပ်ပၞာန်ဗၟာတံ နွံဒၟံၚ်ဂှ်ရ စွံသတိအိုတ်ညိဂှ် ဟီုလဝ် ကုသၞာဲဒဴဒပ်ပၞာန်ဂမၠိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−MOI/The Kokang