ကံၚ်ဇြဳပၞာန် ဟီု ကလိဂွံမဒါန်သြန်ဘဲတိချဳ မွဲကိုဋ်မွဲဠက် ဗဳလျာန်ဒ္ကေဝ်ပြၚ်

နေဗျဳဒဝ်၊ ဨပရဴ ၂၇

ပ္ဍဲဍုၚ်ဗၟာ ကြဴနူဒးအာဘဲတိချဳ ပ္ဍဲဂိတုမာတ် ၂၈ တေံတုဲဂှ် စဵုကဵုဂိတုဨပရဴ ၂၄ ဂှ် ကလိဂွံလဝ်မဒါန်သြန် မွဲကိုဋ်မွဲဠက်ဗဳလျာန်ဒ္ကေဝ်ပြၚ်ရောၚ် ဒုက္ဍိုပ်သ္ကိုပ်ပၞာန် ဒုသ္ကိုပ်ပၞာန်ဇၞော် သဵုဝေန် ဟီုရ။

ပ္ဍဲကဵုကောံဓရီုကမ္မတဳကောပ်ကာဲ စပ်ကဵုဘဲအန္တရာယ်သဘာဝကောန်ဂကူ ကံၚ်ဇြဳပၞာန် မကၠောန်ဗဒှ်လဝ် ပ္ဍဲနေဗျဳဒဝ် ပ္ဍဲဂိတုဨပရဴ ၂၅ ဂှ် ဟီုကၠုၚ်လဝ် ပရေၚ်မဂွံဒုၚ်တဲကလိဂွံလဝ် မဒါန်သြန်သွက်ဘဲတိချဳဂှ်ရ။

ကလိဂွံမဒါန်သြန်ဂှ်တှ်ေ နူကဵုတၠဒါန် အပ္ဍဲဍုၚ်၊ မ္ၚးဍုၚ်တံဂှ် အပံၚ်ဖအိုတ် မွဲကိုဋ်မွဲဠက်ဗဳလျာန်ဒ္ကေဝ်ပြၚ်၊ ဒဝ်ဠာအမေရိကာန် ၂ ပြကောဋိကိုဋ်ပြၚ်၊ သြန်ကိုဝ်ရဳယျာ ၅ ကိုဋ်ဝါန်၊ သြန်အိန္ဒိယ ၁၅ ပြကောဋိကိုဋ်ရူပဳ၊ သြန်သေံ ၂ ပြကောဋိကိုဋ်ၝာတ် ကေုာံ သြန်သေန်ကာပေါဝ် ၃၁၅၀ ဒဝ်ဠာရ။

မဒါန်သြန်ကလိဂွံလဝ်လဝ်တံဂှ်တှ်ေ စုတ်လဝ်ပ္ဍဲစရၚ်သြန် ကမ္မတဳကောပ်ကာဲဘဲအန္တရာယ်သဘာဝကောန်ဂကူဂှ်တုဲ ဖန်ဇန်မဒါန်သြန်တံဏံ ဗွဲမစှ်ေကဵုသၞောတ်တုဲ ရပ်စပ်ဒၟံၚ် ပ္ဍဲကဵုကမၠောန်ကလေၚ်ဖျေံဒၞါဲဝါဲတံကဵု ကမၠောန်ရီုဗၚ်ဟံၚ်ပြာ်တံဂှ်ရောၚ် ဒုက္ဍိုပ်သ္ကိုပ်ပၞာန် သ္ဂးရ။

ညးဍုၚ်ကွာန်မွဲတၠဂှ်တှ်ေ ကံၚ်ဇြဳပၞာန် ၜိုန်ဟီုဒၟံၚ် ဒဒှ်ရရီုဗၚ်ဟံၚ်ပြာ်ကၠောန်ကဵုဒၟံၚ် နကဵုမဒါန်သြန် မကလိဂွံလဝ်တံဂှ်ကီုလေဝ် ပ္ဍဲဗလးတိဏံ ရီုဗၚ်ကဵုလဝ် ဗွဲမစိုပ်တရဴဂှ် ဟွံမွဲတုဲ သြန်ဍုၚ်သ္အာၚ်တံ ရီုဗၚ်ကဵုတံဂှ်ဝွံ ဒှ်ကၠုၚ်ခရိတ်အရပ်စပ်ပၞာန်တုဲ ညးဍုၚ်ကွာန်တံ သာတုဲဒးဂိဂှ် ပါ်ပါဲလဝ်ရ။

“ ဒၞါဲညးဍုၚ်ကွာန် မဒးဒၟံၚ်ဘဲဍာံဍာံ ညံၚ်ရဴဒၞါဲမာန္တလေဝ် သက်ကိုၚ်တံဂှ် ကံၚ်ဇြဳပၞာန် ရီုဗၚ်ကဵု ဗွဲမစိုပ်တရဴဟွံမာန်ပုဟ်။ ၜိုတ်ဒၞါဲညးတံ ၜိုတ်ပ္ဍဲနေဗျဳဒဝ်သၟးရဏောၚ်။ ဍေံတံဂှ်တှ်ေ သွက်ညးဒးဘဲတိချဳ သွက်ညးဍုၚ်ကွာန်တံဟွံသေၚ်မွဲသာ် သြန်ထံက်ပၚ် နူဍုၚ်သ္အာၚ်တံသီုဖအိုတ်ဂှ် ဒှ်ကၠုၚ်ဒၟံၚ်ခရိတ်အရပ်စပ်ပၞာန်တုဲ ညးဍုၚ်ကွာန်တံ သာတုဲကြေပ်ဂြတ်ကၠုၚ်ရ” သာ်ဝွံ သ္ဂးရ။

တၠဒါန်နူအပ္ဍဲဍုၚ်၊ မ္ၚးဍုၚ်တံသၟးဟွံက ညးမၞုံပၟိက်သၟိက်မိက်ဂွံကဵုဒါန်နူဍုၚ်သ္အာၚ်ဂမၠိုၚ် စၞးဒးကဵုဒါန် နူကံၚ်ဇြဳပၞာန်မွဲကဆံၚ်ဂှ် အလဵုပူဂဵုကၠုၚ်စိုပ်ကဵုဒါန်ဂှ်ဝွံဟေၚ် ဍေံဒှ်ဖဵုသွက်ညးဍုၚ်ကွာန်တံမာန်ဏောၚ်ဂှ် ညးဆက်ဟီုရ။

လ္ပာ်ကံၚ်ဇြဳပၞာန်ဂှ်တှ်ေ စပ်ကဵုဘဲတိချဳတုဲ အကာဲအရာဒေသ ဒးဘဲအန္တရာယ်၊ ဒၞါဲဒတန် ကေုာံ အကာဲအရာ ထပ်က္တဵုဒှ်မာန် ဟွံမာန်တံဂှ် စၟဳတ်ကီု၊ တန်တဴကဵုတၚ်နၚ်ကလိဂွံနၚ်တံဂှ်တုဲ သွက်ဂွံဂၠါဲဟံၚ်ပြာ်ဂှ်ကီု၊ ပရေၚ်ၚးတးသ္အးဇ္ၚးတံ ဒှ်တမ် ရေၚ်တၠုၚ်ဒၟံၚ် နကဵုကဆံၚ် ၅ ကဆံၚ်ရောၚ် ဟီုရ။

အတိုၚ်တၚ်နၚ်ကံၚ်ဇြဳပၞာန်တံဂှ်မ္ဂး အလုံဍုၚ်မွဲ ဟိုတ်နူဘဲတိချဳတုဲ သ္ၚိ ၆၃၀၀၀ မပြၚ်၊ ဘာဗ္တောန်လိက် ၆၇၀၀ မပြၚ်၊ ဘာလကျာ် ကေုာံ ဘာသဳလ ဗ္ဒါဲ ၅၅၀၀ မ၊ ကျာ်စေတဳ ၅၃၄၂ တၞုၚ် ကေုာံ စမြိုၚ်ဘာသာတၞဟ်ဟ်တံဂှ် ၆၁၃ မ ဇီုကပိုက်ဒးလဝ်ရ။

သ္အာၚ်နူဂှ်ပၠန် ရုၚ်ဂဥုဲ ဗ္ဒမ်ဂဥုဲ ၅၇၆ မ၊ ဂၠံၚ်ကွဳပၟတ် ၅၆ တၞုၚ် ၊ ဂၠံၚ် ၂၇၁ တၞုၚ်၊ ဂၠံၚ်ဇၞော် ၁၉၈ တၞုၚ် ၊ တၟိုန်ဍာ် ၅၈၆ ၊ ဒဒန် ၁၇၂ တၞုၚ်သၟးဟွံက ထရာမ်သဝှမ်မာ ၃၅၃ မ လီုအာလဝ်တုဲ အရာမလီုလာ်အာတံဂှ်တှ်ေ ပါ်ကၠေံ ကာလဇမၠေံ၊ ကာလလဒေါဝ် ကေုာံ ကာလဇမၠိၚ်တုဲ မွဲကဆံၚ်တုဲမွဲကဆံၚ် ရေၚ်တၠုၚ်အာဏောၚ်ဂှ် ဒုက္ဍိုပ်သ္ကိုပ်ပၞာန် ဟီုလဝ်ရ။

ပ္ဍဲဍုၚ်ဗမာ ကြဴနူတိချဳဇၞော်ကဵုဇြဟတ် က္တဵုဒှ်အာတုဲ စဵုကဵုဂိတုဨပရဴ ၂၅ ဂှ် မၞိဟ်ဒးချိုတ်အာ ၃၇၆၃ တၠ၊ ညးကလိဂွံဝပ် ၅၁၀၇ တၠ ကေုာံ ညးမကၠေံအာ ၁၁၀ တၠ နွံရောၚ် ဂွံတီကေတ် အတိုၚ်တၚ်လလောၚ်တြး ကံၚ်ဇြဳပၞာန်ရ။

ပရိုၚ်−သြၚ်လောန်တိုၚ်(မ်)

ဗီု−MOI