ကအ်ကြိက်၊ ဨပရဴ ၂၉
ဟိုတ်နူပေါဲဗ္တိုက်ၜါလ္ပာ် က္တဵုဒှ်ဒၟံၚ် ဗွဲမသ္ကာတ်မြဟ် ပ္ဍဲဍုၚ်ကြုၚ်ဒဵုကဵုကအ်ကြိက် တွဵုရးကရေၚ်ဂှ်တုဲ ဖျေံစွံလဝ်က္ၜၚ်ပၞာန် လ္တူဍုၚ်ဘာအၚ်သၟးဟွံတုဲ ပ္ဍဲကဵုကွာန် နွံဗ္ဒါဲဇိုၚ်ၜဳ လ္ၚဵုတံဂှ် ဖျေံစွံလဝ်ဒပ်ကၚ်မၚ်တောပ်ဗ္တိုက်တံ နွံဒၟံၚ်ရောၚ် တမ်ရိုဟ်ပရိုၚ်ဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူတ္ၚဲတုဲကၠုၚ်တေံတုဲ ပ္ဍဲဇိုၚ်ၜဳသၚ်လောန် လ္တူဍုၚ်ဘာအၚ်ဂှ် ဒပ်ကံၚ်ဇြဳပၞာန် ဖျေံစွံလဝ် က္ၜၚ်ပၞာန်မွဲဖ္ဍိုက်၊ ဗ္ဒါဲကွာန်ခယျးဂှ် ဖျေံစွံလဝ်က္ၜၚ်ပၞာန်မွဲဖ္ဍိုက်တုဲ ကၠောန်သ္ပဒၟံၚ်ပရေၚ်မၚ်ရံၚ်ဂီုကၠီုအပ္ဍဲဒေသတံရောၚ် တမ်ရိုဟ်ပရိုၚ်ဒေသဂမၠိုၚ် သ္ဂးရ။
သ္အာၚ်နူဂှ်ပၠန် ပ္ဍဲကဵုကွာန်(နှစ်ခြား၊ ကော့ဂွန်း) မွဲဒမြိပ်ၜဳသၚ်လောန် ပလိုတ်ဍုၚ်ဘာအၚ်ဂှ် စနူဂိတုဨပရဴ ၁၉ တုဲ ဒပ်ကံၚ်ဇြဳပၞာန် ဖျေံဒပ်ကေတ်လဝ်ဒၞါဲတုဲ မၚ်ဂီုကၠီုကီု၊ မၚ်တောပ်ဗ္တိုက်ဒၟံၚ်ကီု နွံဒၟံၚ်ရ။
ကောန်ဒပ်ကံၚ်ဇြဳပၞာန် ဖျေံလဝ်ဒပ် အပ္ဍဲကွာန်(နှစ်ခြား) တအ်ဂှ်ဝွံ ဘပဠဒၟံၚ် လ္တူညးဍုၚ်ကွာန်ဒေသတံ နွံတုဲ ကောန်ဒပ်ကံၚ်ဇြဳပၞာန်တံ ဟိုတ်နူကၠုၚ်စိုပ်ဖျေံလဝ်ဒပ်ဂှ်တုဲ ကောန်ကွာန်ညးဒေသဂမၠိုၚ် ပါဲဒလေတ်ကၠုၚ်ဒၟံၚ်တံ နွံဒၟံၚ်ရောၚ် ညးဒေသဂမၠိုၚ် သ္ဂးအိုတ်ရ။
ပြဝ က္ၜၚ်ပၞာန်ဒပ်ကံၚ်ဇြဳပၞာန် မကေတ်လဝ်ဂီုကၠီု လ္တူဇိုၚ်ၜဳသၚ်လောန်ဂှ်ကီု၊ ကောန်ဒပ်ကံၚ်ဇြဳပၞာန်တံ မမၚ်တောပ်ဗ္တိုက်ကေတ်ဒၟံၚ်ဂီုကၠီု ပ္ဍဲကဵုကွာန်နွံမွဲဒမြိပ်ၜဳတံဂှ်ကီု ကၠောန်သ္ပဒၟံၚ်သာ်ဏံဂှ်ဝွံ ဒှ်ဒၟံၚ်ဓဝိၚ် ဖေက်ဂကောံဇြဟတ်ပၠန်ဂတးတံ လုပ်စိုပ်ဗ္တိုက်ကၠုၚ် ဍုၚ်ဘာအၚ်ဂှ်တုဲ ဒစးဒုၚ်ဖျေံလဝ်ဂီုကၠီုဂှ်လေဝ် ညးဒေသဂှ်ဂမၠိုၚ် သ္ၚဳဂၠိပ်ဟီုဂးဒၟံၚ်တံ နွံဒၟံၚ်ရ။
မွဲလ္ပာ်ဂှ်ပၠန် ဒပ်ကံၚ်ဇြဳပၞာန် ပန်ပှော်ကဵုလွဟ်ဇၞော် ဘပဠကၠုၚ်ဒၟံၚ် လ္တူကွာန် မၞုံဗွဲဒိုဟ်ပလိုတ်ၜဳသၚ်လောန် ဍုၚ်ဘာအၚ် တိဍာ်ဒပ်မဟာ ၁ KNU ဂှ်လေဝ် ကၠောန်ဒၟံၚ်မွဲဏှမွဲဏှရောၚ် ဂွံတီကေတ် အတိုၚ်ဂလာန် တမ်ရိုဟ်ပရိုၚ်ဒေသတံရ။
အခိၚ်လၟုဟ် ဗ္ဒါဲဍုၚ်ကြုၚ်ဒဵုကဵု ကအ်ကြိက် တွဵုရးကရေၚ်ဂှ် အကြာဂကောံဇြဟတ်ပၠန်ဂတး သၟဝ်ပၠတရဴ KNLA ကဵု ဒပ်ကံၚ်ဇြဳပၞာန်ဂှ် ပေါဲဗ္တိုက်ၜါလ္ပာ်တံ ဆက်က္တဵုဒှ်ဒၟံၚ်ဖိုဟ်တုဲ ညံၚ်ဍုၚ်ကအ်ကြိက် ကြုၚ်ဒဵု ဟွံဂွံစှ်ေအာဂှ် ဒပ်ကံၚ်ဇြဳပၞာန် ရပ်စပ်စကာပၞာန်ကျာ ဗွဲမသ္ကာတ်မြဟ်တုဲ ဗပေၚ်ဒၟံၚ်ဇြဟတ်ဒပ် ဗွဲမဂၠိုၚ်ဂၠေၚ်ရောၚ်ဂှ်လေဝ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ